ينتظرُكَ في آخرِ الطَّريق شخصٌ سيحملُ عنكَ البؤسَ كلَّه ، تُراضيكَ به الدُّنيا ، يصالحُكَ به الزَّمن، تعتذرُ الأيَّام لكَ بحضورِه عن غيابه ✨
جيت راجعه من المدرسه دخلت البيت و سمعت أصوات نسوان كتاااار جايه من بيوت اعمامي ،و امي و حبوبه ذاتم ما كانوا موجودين ، شكلهم مشوا ليهم بهناك ، قلت في شنو ؟!! اه ما اديت الموضوع اهميه كبيره ، غيرت ملابسي و جهزت لنفسي الفطور ، بعد ما انتهيت جاتني ابتهال و قالت لي مالك ما جيتينا بهناك ؟ قلت ليها عندكم شنو ؟ قالت لي م عارفه يعنى ؟ من امبارح نحنا بننضف و بنجهز في البيت عشان جية سندباد اقصد حيدر و اليوم من الصباح خالتو جونا ، ، قلت ليها ما كنت عارفه و نسيت جية حيدر والله ، قالت لي ما نسيتي اتناسيتي ، عموما امك رسلتني عشان اشوفك جيتي من المدرسه ولا لا ، اتحركت من جنبي و لمن وصلت باب الغرفه قالت لي حيدر حيجي بعدين المسا عشان ما تقولي ما كان عندك علم ، قالت كلامها دا و طلعت من عندي.....امي جات راجعه عملت الغدا لجدي و قالت لي انتي ما جايه بيت عمك ؟ قلت ليها لا ما ماشه ، قالت لي ما على كيفك ، هسي تلبسي اقرب توب أو عبايه و تلحقيني هناك ، مفهوم !! هزيت ليها راسي بضيق بمعنى حاضر....
استحميت و صليت العصر و لبست لي توب و لحقت أمي هناك ، كانوا راصين السراير في الحوش و خاتين كراسي و ترابيز و عاملين حلويات و أكلات خفيفه و عصاير و البيت كان مليان و الأصوات عاليه و اعمامي كلهم مجتمعين و بتونسوا و بضحكوا بأعلى صوت و حبوبه في نصهم ، اتكممت بالتوب و قعدت في طرف السرير بعيد منهم ، حبوبه أول ما شافتني نادتني ، مشيت ليها و سلمت على أعمامي ، عمي علي قال لي مختفيه وين طولنا ما شفناك ، قلت ليهو والله مضغوطه الفتره دي مع تالته ثانوي ، قال لي ربنا يوفقك يا بتي ، قلت ليهو آمين يا رب ، قلت لحبوبه ناديتيني لشنو ؟ قالت لي خشي ساعدي اخواتك ديل من قبيل شغلات ، اضايقت و قلت ليها غصبا عني حاضر ، دخلت ليهم في المطبخ في البتعمل في الشاي و في البتجهز في الجبنه و في البتعمل في العصير و في و في ، سلمت عليهن و قلت ليهن اعمل ليكن شنو ؟ في شغل اساعدكم فيو ؟ نمارق قالت لي لا ما محتاجين خلاصنا من زماااان و الباقي شويه و حاليا شغالين فيهو ، فأحسن اقعدي بره مع باقي الضيوف 😊 ما اتكلمت معاها و مشيت على ابتهال و قلت ليها جيب صينية العصير دي حأقدمها انا للضيوف ، قالت لي طيب شيليها ، فضلت اشتغل معاهم كدا لحدي ما المغرب أذن ، قلت ليهم بعد دا انا ماشه البيت أصلي و بجيكم بعد شويه ، نمارق قالت لي و هنا ماف مويه للوضوء ولا ماف مصالي ؟قايلانا كفار نحنا 😏 اساسا ما عاينت ليها و عملت نفسي ما سمعت شي ، طلعت مشيت بيتنا ، اتوضيت و صليت و قعدت اقرا حبه قلت تاني ما راجعه ليهم ، اثناء ما انا مندمجه كدا في القرايه سمعت أصوات زغاريت جايه من بيت عمي ، قلت معناها حيدر جا ، بعد شويه أمي جات فرحانه و قالت لي انتي هنا ؟ الجابك شنو يا مها و الناس كلها هناك ؟قلت ليها قبل شويه كنت هناك و دي دخلتي ، قالت لي سمح قومي امشي معاي و سلمي على ود عمك ، قلت امي ما حتخليني احسن امشي اسلم عليه سرعه سرعه و أجي راجعه ، دخلنا بيتهم و كان مليان ناس يتقاطعوا يمين و شمال زي عربات الطقااااش ، و خالاتو دي تفكوا و تمسكوا التانيه و أي وحده تبكي فيهو براها و أمو ماسكاهو من جهه تانيه التقول حيطير لو فكوه 🙂 و العجب بنات اعمام يتبسمن و يتكشمن سااااي و هو خبرن ما جايبوا ، عادي اتفاجأت لمن شفتهن لمن مشيت منهن كانن غبش و أي وحده شعرها عامل زي اشعة الشمس ، طلعن جعفر الجواهن و أي وحده تقول للتانيه زحي لي كدا من شدة السماحه ، أما انا توبي حق قبيل ما غيرتو و جيت بخلقتي دي ، قاعده قريب ساعه و ما لقيت فرصه عشان أسلم عليهو ، بنات اعمامي الخفيفات اللفيفات سلمن عليهو من قبيل و هسي مترصات جنبو في السرير ، ابتهال جات قعدت جنبي و قالت لي ليه ما سلمتي على حيدر ، قلت ليها ماشه بعد شويه اصبري بس ، قالت لي عليك الله شووووفيه بقى سمح كيف ، اقسم بالله سمح سمااااحه لمن غلط 😭😭قالت لي قووومي معاي أرح سلمي عليهو ، قلت ليها الناس كتار ، خليهو بسلم عليهو على راحتي ، قالت لي الناس ديل غريبين عنك ؟ ما كلهم أهلنا ، اشري لي على زول واحد بس غريب عننا و قاعد معانا...ماف صاح ؟قووومي ياخ يا مها و خلي الثقاله ، جرتني غصبا عني ، لحدي ما وصلناهو و وقفنا قدااامو ، قالت ليهو حيدر دي مها و قالت عايزا تسلم عليك ، اقسم بالله قربت أجري ، و الناس كلها انتبهت معانا 😭وقف على حيلو و قال لي أوووو مها المختفيه و سلم على بحرارة كدا و انا اكتفيت بإبتسامه بس ، بعديها طوااالي جريت على بيتنا و تاني ما رجعت ليهم ، العلي عملتو .
صباح اليوم التالي ، صحيت بدري كعادتي صليت و عملت الشاي شربت و شلت قروشي و على طووول للمدرسه و استمرت الأيام بالموال دا و من اليوم داك تاني ما مشيت بيت عمي ، في يوم بعد ما رجعت من المدرسه كنت قاعده بتونس مع حبوبه في نص الحوش ، و باب النص كان فاتح فأثناء ما نحنا بنتونس بمزااااج جا حيدر داخل ، و قال لينا السلام عليكم بحركه سريعه شلت توب حبوبه و إتلفيت بيه ، حبوبه ردت ليهو السلام و قالت ليهو اتفضل يا ولدي حبابك ألف ، قعد و انا طوالي قمت مشيت جبت ليهو مويه و عملت ليهو شاي هو و حبوبه و مشيت خليتهم ، انا اصلا كدا و طبعي كدا ما بحب الناس و ما بحب اقعد معاهم حتى ما بحب اتعرف على ناس جديده ، هسي حبوبه دي كما متعوده عليها ما كان قعدته معاها ، هم اكتر ناس عارفين طبعي و متحملين تقلبات مزاج و ما بزعلوا مني عشان كدا بتعامل بأريحيه معاهم و مرات من تلقاء نفسي بجي و بقعد معاها .
