Ikhlas lan Legawa

Rohmat

Wayah ngaso kaping pisan ana ing kantin. Ana bocah nemoni aku. "Sampeyan sing jenenge Sepia mbak?" Takone bocah wadon mau, kang ora tak kenal sapa jenenge. "Inggih, la kenapa?" Takonku marang dheweke. Kok ana ora kenal-kenal ujug-ujug sinis kaya mengkono. Aku kan yo bingung tho, ana masalah apa aku karo dheweke. Wong aku wae ora kenal kok.

Cah mau nyauri maneh iseh nganggo nada sengak "aku pacare Rohmat, cah sing mbuk boncengke sampeyan wingi". "Owalah pacare tho, wonten perlu apa karo aku mbak?" Takonku marang dheweke. "Sampeyan ora ngerti opo yen Rohmat kuwi wis duwe pacar, kok jaluk bonceng karo dheweke" crocosanne. Lha piye no, aku mulo ngerti yen Rohmat duwe pacar, lha wong ra tau cerita kok. Tur lah Rohmat iku kancaku kawet cilik, ning ndi wae mesthi bareng. Kayata dhaptar ning SMAGA iki. Tapi kok dheweke ora ceria ya, yen duwe pacar. Biasane yen ana apa-apa mesthi cerita karo aku. Apa dheweke lali.

"Heh mbak, krungu rak aku ngomong" sentake mbak mau. "Eh, nggih pripun mbak?" Kaget no aku dibentak kaya kuwi. "Kok malah piye sih, ngerti ra yen Rohmat kuwi pacarku? Opo ora ana lanangan liya tho, kok kudu pacarku. Wis bola bali lho sampeyan bareng karo dheweke" protese dawa. Lho lha kan aku emang kancané kawet cilik mbak. Omong ku ing jero ati.

"Kula boten ngertos mbak, Rohmat boten naté cerita kalih kula. Nanging yen sampeyan ngira kula kalih Rohmat yen wonten hubungan khusus nggih salah. Lha wong aku kancane kawet bayi kok" jelasku marang mbak-mbak mau.

"Kanca kok cerak pol, nganti boncengan terus" lha kok tambah sinis mbak iki, piye no maksude. Aku kok dadi bingung. Lha wong aku wis biasa boncengan karo dheweke kok. Malahan kawit numpak pit, ngasi iso numpak motor kaya saiki. Yo wajar no.

"Nggih mbak kula nyuwun pangapunten, kula boten ngertos yen Rohmat kuwi duwe pacar. Dheweke ora tahu cerita soale. Terakhir kuwi cerita yen lagi keseng-sem karo cah wedok. Sopo kuwi aku lali, mungkin ya sampeyan mbak" jelasku dawa. "Wis ya mbak, aku ana urusan penting. Mangga" pamitku marang cah wedok mau. Yen ora ngunu ora rampung-rampung mengko. Malah isa dadi pusat perhatian ing kantin.

Pokoke mengko teka omah Rohmat kudu tak wawancara masalah iki. Lha kok iso aku dilabrak karo pacare. Dheweke barang kok isa ora cerita karo aku. Yen cerita kan aku dadi ngeri, lan ora bakal cerak-cerak karo wonge kaya sing wis-wis, yen dheweke nduwe pacar aku ngehindar ben ora salah paham. Parah iki, aku isin pol.

Cah lanang kang dimaksud bocah wadon mau Rohmat Wahyudi. Kancaku kawet SD. Omahe ora adoh saka omahku. Namung beda RW. Aku karo dheweke kuwi pancen sering bareng. Nganti, ing ngendi ana aku, ing kono ana dheweke. Kayata wong kang ora bisa dipisahake. Nanging kene amung kanca, ora luwih saka iki. Tapi ya ana-ana wae sing nganggep awak dhewe iki pasangan.

Okeh sing ngomong yen kekancan lanang karo wadon kuwi ora ana sing murni. Mesthi ana salah sawijining kang nduweni perasaan.Baper jare cah saiki. Tapi ya piye ya. Tapi nyatane aku karo dheweke gak ana perasaan babar blas. Aku wis biasa digoda wonge. Ora mempan, pancen dheweke iki kaya ngunu kok. Aku wis kebal. Tapi mbuh yen Rohmat marang aku. Kayake ya pada wae. Kan ya nyatane nganti saiki biasa wae tho.

Tekan kelas aku ora langsung ngechat Rohmat. Merga HP ku batrene ntek. Mengko yen HP ku wis urip bakal tak takoni. Yen ora ya mengko pas ning omah wae. Ben gak ana salah paham maneh, pacare Rohmat marang aku.