#LOLO #لولو_محمد
((((((((ته مربوطه ))))))))
الحلقه الثانيه
فى اوضه المهندسين
شاب / هى ايه نامت جوه و لا ايه يا علاء
علاء/ تولع بقى انا هقوم اقولها انا مروح و اخلع انا مش هبات فى الشركه عشان خاطرها
ابراهيم / و انا كمان ياعم دى مبتستحيش قاعده فى الشركه مع اتنين شباب عادى يعنى و لا فى ادب و لا خشا
.....................
علاء / انت هتقولى دى تخنق ربايه شوارع
ابراهيم / انا هقوملها بقى مبدهاش
باب الاوضه يتفتح و سمر واقفه عالباب
سمر / ايه الهمه دى كلها انتوا مش ناوين تروحوا و لا ايه
ابراهيم / كنت والله قايم استاذنك يعنى نروح
سمر / طب و مستنين ايه يلا عشان اقفل المكتب انا مستنياكوا مالصبح
ابراهيم يبص لعلاء و يطفوا الاجهزه و يقوموا و سمر تقفل نور الشركه و تقفل الباب بالمفتاح و تنزل تشاور لحارس الامن اللى عالعماره و تركب عربيتها و تروح
..................
فى البيت عند سمر
هيام / حرام عليكى يا سمر انا اعصابى مبقتش مستحمله توترى عليكى كل يوم لحد نص الليل يا بنتى
سمر / فى ايه بس يا ماما كنت فى الشغل
هيام / و الجيران يا بنتى اللى شايفينك بتروحى كل يوم متاخر يقولوا عليكى ايه
سمر / يولعوا هو حد منهم بياكلنى
هيام / احنا ولايا يا بنتى و ملناش غير سمعتنا الناس مبترحمش
سمر / الناس مورهاش الا الكلام و كلامهم تحت جزمتى هى عليا نامت و لا ايه
هيام / من بدرى وراها كليه الصبح
سمر / طب خدتى دواكى يا ست الكل
هيام / اه اخدته احضرلك العشا
سمر / لا كتر خيرك مش جعانه خشى انتى نامى و انا هخلص كام حاجه كدا و ادخل انام
هيام / شغل فى البيت و شغل فى الموقع و شغل فى المكتب مترحمى نفسك شويه يا بنتى
سمر / بقولك ايه يا ست الكل متشغليش بالك انتى بيا سبينى عالوضع اللى يريحنى و اتفضلى انتى ادخلى نامى و ارتاحى
هيام / امرى لله تصبحى على خير
سمر / و انتى من اهله
هيام تدخل تنام و سمر تقفل اربع اقفال على باب الشقه و تقفل الباب بالمفتاح تكتين و تفتح اللاب و تقعد تشتغل و تسرح شويه و هى شغاله
//////////////////////////
قدام المدرسه و هى مروحه
هند / سلام يا سمر
سمر/ باى
حسام يروح عند سمر و يمشوا سوا
حسام /كل ده رغى انا رجلى ورمت مالوقفه
سمر / يعنى مشرقتش يعنى
حسام / اشرق ليه
سمر / اصلهم كانوا بيتكلموا عليك عاوزينى اعرفهم عليك
حسام / ايه العيال الهبله دى
سمر / حسام عشان خاطرى انا مصدقت هيبقالى صحاب
حسام / و دول اسمهم صحاب دول بنات مش كويسين على فكره بتوع مصالح و اول متعرف عليهم هينفضولك تانى
سمر / هو انا ليه محدش بيرضى يقعد معايا فى الفسحه
حسام / عشان الطيور على اشكالها تقع و انتى مش زيهم انتى اذكى و اشطر و اجمل
سمر / اجمل ؟؟؟
حسام / انتى ابوكى كسر المرايات اللى فبيتكوا و لا ايه انتى مش شايفه نفسك انتى قمر كل حاجه فيكى حلوه
سمر / بجد زى ايه
حسام/ زى شعرك الطويل الناعم و عنيكى مثلا و حاجات كتير اوى
سمر / انت بتقول كدا بس عشان احنا صحاب
حسام / بكره لما تلاقى العرسان بتقطع بعض قدام بيتكوا ابقى افتكرى كلامى
سمر / و انت هتكون فين ساعتها عشان افتكرك
حسام / اخص وصلنا يلا اسبقى انتى بقى و انا دقيقتين و هحصلك لحسن ابوكى يشوفك و يضربك زى المره اللى فاتت
سمر / اه متفكرنيش سلام
/////////////////////////////////////
اذان الفجر سمر تقوم تتوضى و تلبس الاسدال و تصلى و تحشر نفسها فى السرير بين امها و عليا
عليا / ايه اخيرا قررتى تنامى
سمر تبتسم و تنام فى حضنها
..................
تانى يوم
عليا حاضنه سمر و هيام بصوت واطى اوى تصحى عليا
هيام / قومى يا عليا الساعه سبعه هتتاخرى عالمحاضره
سمر تقوم
هيام / انتى ايه نايمه على مسامير مبتصدقى همسه تصحى
سمر تدحك / والله فيكى الخير انا عندى صبه الساعه تسعه و يادوب اللبس و اروح ابص عليهم
عليا تفوق / هو الشركه دى مفيهاش غيرك ولا ايه
سمر / لا مفيهاش قومى يلا اما اوصلكوا فى طريقى
عليا / الحمد لله النهرده الخميس مفيش شركه بالليل و بكره الجمعه اجازه مليش دعوه انا عاوزه اتفسح
هيام / متحاوليش اختك ليها طقوس الخميس و الجمعه شوفى انتى عاوزه تروحى فين و انا هاخدك دى مفيهاش رجا
سمر / الله انا بحب الجمله دى اوى ياريت بقى تشوفوا اللى وراكوا و تفقدوا فيا الرجا
................
يوم الانترفيوا
سمر / كدا خلصنا شكرا يا بشمهندس مصطفى
مصطفى / انا كدا نجحت و لا هتتصلوا بيا
سمر/ لا نجحت ابقى سلملى على الدكتور ابراهيم و البشمهندس حسام قولهم سمر النمس بعتالكوا السلام
مصطفى / ايه ده معقول يوصل ان شاء الله بس سلام حسام بس لكن بابا بقى تعيشى انتى
سمر / الله يرحمه كان راجل محترم اتفضل تقدر تيجى تستلم من يوم السبت
مصطفى / شكرا
مصطفى يطلع مالمكتب و سمر تسرح
/////////////////////////////////
فى بيت سمر
هيام / دى اخرتها يا حسين عاوز تتجوز
حسين / انا صبرت عليكى كتير و بصراحه عدانى العيب و ازح
هيام / وطى صوتك البنات نايمين
حسين / لما جبتى سمر صبرت و قولت يابخت من كانت بناتها قبل صبيانها قعدتى تمن سنين تحملى و تسقطى تحملى و تسقطى و انا دايخ معاكى عالدكاتره و صبرت و قولت ماشى و لما خلفتى عليا صبرت و قولت مش مشكله هديه من ربنا لكن انا عاوز الواد عاوز اللى يشيل اسمى و يسندنى عاوز اللى ياخد باله مالبنات دول و انتى مبتحمليش
هيام / تقوم تتجوز
حسين / انا راجل مقتدر و مدخل بناتى احسن مدارس بالشئ الفلانى و ملبسكوا احسن لبس و ماكلكوا احسن اكل ناقصكوا ايه يا ست هانم و الشرع محللى اربعه
هيام / و انت اش ضمنك ان العروسه دى هتجيبلك الواد ميمكن تجيبلك بنت هى كمان هتعمل ايه هتتجوز تانى
حسين / مثنى و ثلاث و رباع شرع ربنا ميزعلش حد انا هفضل اتجوز لحد ملاقى اللى تجيبلى الواد انا عاوز الواد
سمر تدخل و هى بتدعك فعنبها/ بس احنا خدنا فى المدرسه ان الراجل هو المسؤل عن نوع الجنين بنت او ولد يعنى حضرتك اللى بتخلف بنات مش ماما
حسين يبرقلها و عنيه تطق شرار
هيام / ادخلى اوضتك انتى ايه دخلك فى كلام الكبار خشى اوضتك
حسين / شايفه يا هانم تربيتك ادى اخره خلفه البنات والله لربيها بنت الكلب دى انجرى قدامى
حسين يشد سمر من ضفيرتها عالمطبخ يجيب مقص و يجرها عالاوضه و هيام بتصرخ و سمر بتصرخ حسين يزق سمر عالاوضه و يرزع الباب و يقفله بالمفتاح
سمر / انا اسفه مش هعمل كدا تانى والله مهقول كدا تانى
هيام بره / افتح يا حسين ابوس ايدك افتح البت صغيره مهياش فاهمه حاجه
حسين يشد سمر من شعرها و يقصهولها و هى تصرخ
هيام من بره / حرام عليك يا حسين ان مفتحتش هنادى عالجيران يكسروا الباب
حسين / عليا الطلاق بالتلاته لو عملتيها متباتى فيها لانتى و لا بناتك
حسين يكمل قص شعر سمر و هى بتصرخ تحاول تحط ايدها عشان تمنعه يغرز المقص فى ايدها بغل تنزف دم و هى بتصرخ باب الاوضه يتكسر و حسام و ابراهيم ابوه عالباب و سمر فى الارض بتصرخ حسين يرمى ضفيرتها عالارض هيام تدخل تحضن بنتها اللى مبتفصلش صريخ
هيام / منك لله ياخى حرام عليك منك لله
حسام يقعد جنب سمر و هى بتدارى منه فى حضن امها و بتعيط
ابراهيم / فى حد عاقل فى الدنيا يعمل كدا فى بنته
عليا خمس سنين تصحى تعيط
حسين / انتى كسرتى كلامى لمى عيالك و اطلعى بره بيتى انتى طالق و اتفضلوا كلكوا اطلعوا بره بيتى و الا هتصل بالبوليس و اقول انكوا اتهجمتوا عليا
هيام / هى دى اخره العشره يا حسين هى دى اخرتها
ابراهيم / اتفضلى يا مدام هيام عندنا النهرده و الصباح رباح لما يهدى ابقوا اتكلموا
ابراهيم يشيل عليا و هيام تسند سمر و ايديها غرقانه دم مكلبشه فيها فى جلبيه امها
.....................
فى بيت ابراهيم
سمر ساكته بس عنيها مبتبطلش عياط و ابراهيم بيلفلها ايدها
حسام / المفروض تعملوله محضر باللى عمله اللى عمله فى سمر ده يتحاسب عليه اللى زى ده المفروض يتسجن
ابراهيم / روح يا حسام نام مع اخوك و ملكش دعوه بالموضوع ده
حسام يبص لسمر يلاقيها مصدومه و مبتنطقش
ابراهيم / بس كدا خلصت ان شاء الله هتخف و مش هتسيب اى اثر
هيام / كتر خيرك يا دكتور ابراهيم تقلنا عليك
ابراهيم يطلع مالاوضه و يسيب عليا و سمر و هيام فى الاوضه يلاقى مراته عالباب يتكلموا بصوت واطى
مراته / انت ازاى تجيبها هنا يا ابراهيم مش كفايه المشاكل اللى احنا فيها كل يوم بسبب الجيره الزفت دى
ابراهيم / خشى اطرديها قوليلها خدى بناتك و ناموا فى الشارع
مراته / لا ازاى يناموا فى بيتى
ابراهيم / حل مؤقت كام يوم بس و هنشوفلهم مكان تانى حل مؤقت يا ليلى اديكى بتعملى ثواب
ليلى / انا مش شايفه خير من ورا الست دى و بناتها اديك شايف الراجل المجنون ده كل يوم يتخانق معانا بمناسبه و منغير و مش ناقصين خناق
ابراهيم / انا هروح اخبط عليه و احاول اهديه يمكن اعرف اصلح الحال
ليلى / تخبط على مين دا راجل مجنون اسمع يا ابراهيم
ابراهيم / اسمعى يا ليلى انا بيتهيالى انى كبير كفايه انى اعرف الصح مالغلط و انك تسكتى عالغلط ده فحد ذاته غلط انا قررت و هروح
ليلى / براحتك
...................
قدام شقه حسين
ابراهيم يضرب الجرس حسين يفتح
ابراهيم / ممكن ادخل
حسين / لا
ابراهيم / بص انا جاى اتكلم معاك كلمتين مش اكتر
حسين / لو جاى عشان هيام فانا خلاص طلقتها بالتلاته و مش عاوزها و لو جاى عشان حاجتها او حاجه العيال فانا اللى شاري الحاجات دى بفلوسى و مدام اختارت تكسر كلامى يبقى ملهاش حاجه عندى و انا اتصلت بالبواب هيروح يجيب نجار يغير الكالون و اعلى مفخيلها تركبه و انا و هى و المحاكم بقى و اه لو فكرت تروح المحاكم انا معنديش مانع ارفع قضيه حضانه و اخد سمر و نشوف بقى
ابراهيم / للدرجادى
حسين / بيتهيالى الكلمتين خلصوا عن اذنك عشان عاوز انام الوقت اتاخر
حسين يقفل الباب فى وش ابراهيم ابراهيم يدخل شقته و يقفل الباب يلاقى ليلى بتبصله و تسيبه و تدخل اوضتها يبص على باب اوضه حسام يلاقى الباب متوارب و سمر واقفه وراه بتعيط تاخد بالها ان ابراهيم شافها تقفل الباب بسرعه
////////////////////////////////
فى بيت مصطفى
مصطفى / مش انا اتقبلت فى الوظيفه يا ست الكل
ليلى / الف الف مبروك انا دعيالك
مصطفى / تعرفى ان المديره طلعت تعرف بابا و حسام
ليلى / ابوك افضاله عالكل
مصطفى / هاتى التاب اما اكلم حسام عشان اوصله سلامها و ابشره ان اخوه الفاشل فلح اخيرا و لقى شغل
ليلى / بس كدا دا هيفرح اوى
ليلى تناول مصطفى التاب يتصل فيديو على حسام
...................
حسام / يا مساء الورد
مصطفى / ايه ياعم كنت نايم و لا ايه
حسام / كنت ناوى انام والله مطحون فى الموقع حر و شمس و تراب و قرف
ليلى / مش اخوك اتعين خلاص
حسام / الف مبروك يا صاصا
مصطفى / مش هتصدق المديره بعتالك السلام شكلها تعرفك
حسام / يا راجل اسمها ايه
مصطفى / سمر النمس
ليلى / بنت حسين النمس بقت المديره عليك
حسام يسرح ثوانى
///////////////////////////////////
فى بيت ابراهيم
حسام / يعنى ايه مشيوا راحوا فين
ليلى / و انت مالك بتسال ليه
ابراهيم / خدنالهم اوضه فوق سطوح فى مكان قريب و فى جمعيه خيريه بتتكفل بيهم
حسام / و سمر عامله ايه
ابراهيم / فى دكتور تبع الجمعيه هيتابعها و قال ان معندهاش مشكله عضويه فى الكلام يعنى باذن الله مع المتابعه هترجع تتكلم تانى
حسام / طب انا عاوز العنوان عاوز ازورهم
ليلى / مكفايانا قرف بقى ربنا يزيح عننا مش كفايه ابوها اللى اتجوز واحده و جابها و مفكرش يسال عن بناته
حسام / اه شوفتها و شوفت ابنها بكره الواد ده يخلص القديم و الجديد من على جتته
ليلى / خلاص يا حسام ملناش دعوه
حسام / طب هى مش هترجع المدرسه يا بابا
ابراهيم / الجمعيه قدمت شهاده طبيه لسمر هتحضر عالامتحانات بس اسمع انت ثانويه عامه و عاوزك تركز متشغلش بالك انت بالمساله دى
...................
بعد فتره طويله
ليلى / حسام الراجل بتاع الزباله زمانه جاى اطلع ارمى الكيس فى الزباله
حسام يجى يفتح الباب يسمع صوت ينت بتعيط
سمر بتعيط/ انا اسفه يا بابا عشان خاطرى افتح انا والله مش هعمل كدا تانى هو المستر فى المدرسه اللى قالنا الكلام ده انا مش عاوزه اروح المدرسه تانى هنام باقى عمرى عالسلم بس ماما و عليا معملوش حاجه ماما مبتبطلش عياط و البيت الجديد فى ناس بيجوا يخبطوا بالليل و انا خايفه بابا افتحلى عشان خاطرى انا اسفه والله مش هعمل كدا تانى ابدا
حسام يفتح الباب
حسام / عزل من هنا باع الشقه و نقل
سمر تتفزع من حسام و تجرى عالسلم حسام يجرى وراها لحد متستخبى فى بوابه بيت تانى حسام يعد ينادى عليها و هو بيجرى فى الشارع الكاب الاسمر يقع منه
حسام / سمر سمر
//////////////////////////
فى بيت مصطفى
مصطفى / يعنى دى سمر هى هياها والله معرفتها خالص
ليلى / شوف ربنا فتحها عليها ازاى و بقت مديره كبيره
مصطفى / سرحان فى ايه يا عم حسام
حسام / و لا حاجه الف مبروك ياعم بس متنسانيش فى الحلاوه
مصطفى / بس كدا انت تيجى بس و متقلقش هظبطك
حسام / سبها لله هسيبكوا بقى عشان يادوب انام
ليلى / ربنا معاك يا حبيبى
......................
أنت تقرأ
تة مربوطة بقلم / لولو_محمد ( كامله)
Romanceنعيش فى مجتمع تسيطر فيه الافكار القديمه و الرجعية على العقول فمهما بلغتى من نجاح لن تنالى الاحترام الا اذا كنتى زوجه و ام فان لم تكن لكى القدره على مواجهه هذا العالم المريض فلن تكونى ابدا بطله الحكايه
