#LOLO #لولو_محمد
((((((((ته مربوطه ))))))))
الحلقه الحاديه عشر
حسام / يابنت اللذينه دانا بشت تحت الميه
سمر / تستاهل
حسام / خلاص خالصين بقى
سمر / ماشى بس بليز يا حسام احترم عقلى و احترم رغباتى انا عارفه انها مش حلوه بس انا برتاح فيها
حسام / اهم حاجه عندنا راحتك يا ست الكل و حقك عليا تانى يلا بقى نجيب الطلبات
سمر/ ممكن يا هندسه
حسام يبتسم
..................
قرب الفجر بشويه الكل قاعد عالارض بيتفرج عالتليفزيون و سمر عالكنبه حاطه اللاب على رجلها
مصطفى / انا مش قادر انا هموت و انام
ليلى / و انا كمان بس خساره اسهر كل ده و اجى قبل الفجر و انام
مصطفى / طب متيجوا نتسلى و نلعب لعبه
مرمر / لعبه الحروف
حسام / حلوه اللعبه دى
عليا / بتتلعب ازاى دى
مصطفى / بنكتب الحروف كلها على ورق و نطبقه و كل وحد ياخد دور و يشد حرف و يقول الحرف ده عامل زى ايه بصى احنا هنبدا و انتى هتتعلمى دى لعبه جامده
مرمر / محدش معاه ورق
سمر / معايا ادى ورق و دى قلم
مرمر تاخد الورق و تقطعه و تكتب عليه الحروف و تطبقه و تحطه فى طبق
حسام / هتلعبى معايا
سمر / اشوف الاول بتتلعب ازاى و اجرب
حسام / ايوه بقى
مرمر / الورق جاهز اتفضلوا ابدا يا مصطفى
مصطفى يشد حرف ى
مصطفى / حرف اليه بخط مرمر بيفكرنى بالتعبان ملوى كدا
حسام / هههههههههه دورى
حسام يشد حرف هـ
حسام / تحسه الحلزونه ياما الحلزونه
سمر / ههههههههههههههه
حسام / جربى
سمر / لا خلي عليا
مرمر / اجرب انا
مرمر تشد حرف أ
مرمر / عسكرى بالبورنيطه بتاعته
مصطفى / برنيطه ؟؟؟
حسام / ياعم احمد ربنا السنه اللى فاتت كانت بتقول عليها كسكته
مرمر / مش عجباكوا انا
حسام / معقول دانتى على راسنا
مرمر / بحسب
عليا / اجرب انا بقى
عليا تشد حرف ت
عليا/ مش عارفه انا اول مره اللعبها و مش عجبانى
سمر/ زى مركب فقلب النيل شايله اتنين حبيبه
الكل يسكت و يبص لسمر
سمر / ايه فى ايه قولت غلط
حسام / لا صح تشبيه جميل
عليا / الفكره انك قولتى تشبيه رومانسى تقريبا كلهم قالوا تعابين و حلزونه و لف ودوران و عسكرى يعنى مش مركب و حبيبه انتى تقولى حبيبه
سمر / اه و مقولش ليه
مصطفى / طب لو ث
سمر / الحبيبه هيكون تالتهم مين ابنهم طبعا بيفسحوه فى العيد
حسام / حلو اوى انزلى اللعبى معانا بقى
سمر / لا انا براجع دفتر الكميات بتاع مشروع مدينه ابراج السحاب عشان نقدمه فى المناقصه
حسام / رجعت ريما لعادتها القديمه
سمر / ايه انا مكنتش بلعب مالاول
عليا / طب ته مربوطه و اوعى تقولى كحكه بسكر اخر حرف اخر حرف
سمر / ماما
عليا / متناديش على ماما
سمر / لا ته مربوطه بيفكرنى بماما
حسام / ازاى يعنى مش فاهم
سمر / الته المربوطه حرف صغير كدا و كيوت مبياخدش مكان بس مهم متستغناش عنه فى اهم الكلمات زى حياة و مياة و فسحة و بيدل عالتانيث جميلة رقيقة هو رمز الست شبه الفيونكه بس للاسف شايله عيالها على راسها بعد متفسحت و هى مفتوحه فى المركب فى النيل اتربطت بالعيال و اتركنت عالرف و كتير مننا بيكتبوها هه مربوطه و يلغو دورها و فضلها و ينسبوها لحرف تانى
حسام / مش صح
سمر / هو ايه اللى مش صح
حسام / محدش يقدر يلغى دور الته المربوطه دورها مهم زى مقولتى و مش معنى انها ساعات كتير بتتنطق هه يبقى بقت هه طب ماحنا بننطق التنوين نون بقى نون و مين قال ان العيال هما اللى ربطوا الته هى الثه لما خلفت تلت عيال مش اتنين كانت اتربطت
سمر بعصبيه / يمكن العيل التالت كان ولد
الكل يسكت ثوانى و سمر تشيل اللاب و تقوم
سمر / عن اذنكوا
سمر تدخل الاوضه
هيام / انا هقوم اتوضى زمان الفجر هياذن
حسام / قومى بصى عليها لو سمحتى يا عليا
عليا / حاضر
عليا تقوم و تدخل الاوضه ورا سمر
مصطفى / هو ايه اللى حصل بالظبط
حسام يبص لمصطفى و يقوم يقف فى البلكونه امه تقوم وراه
ليلى / مالك
حسام / مفيش
ليلى / متنفعلكش
حسام / هى مين
ليلى / سمر متنفعلكش
حسام / ليه عشان مش عارفه تلعب الحروف طب معليا معرفتش اصلا
ليلى / انت فاهم يا حسام دى مريضه لازم تتعالج يابنى
حسام / المريضه دى اصغر من ولادك و هى مديرتهم فى الشغل
ليلى / الدنيا مش فلوس و شغل سمر عندها مشكله و الكل عارف بس مش عارفه ليه ساكتين
حسام / ماما انا مش صغير
ليلى / عارفه يا حبيبى انك مش صغير و عشان كدا بتكلم مينفعش تفضل مضيع عمرك جنبها كدا طب بص تحب اكلمك امها اخطبهالك
حسام يتنهد و يبص الناحيه التانيه
ليلى / سمر هترفض و ساعتها هتخسرها مش عشان مبتحبكش عشان مش عاوزه تتجوز هى انانيه على فكره
حسام / هى مطلبتش منى انى استناها هى متعرفش اصلا مشاعرى ناحيتها
ليلى / و انت خايف تعرفها تخسرها و لما تخسرها هتحبس نفسك فى اوضتك زى زمان و تقعد تعيط عشان ضاعت صح ياحبيبى انت معدتش صغير عالكلام ده العمر بيجرى و انا عاوزه افرح بعيالك
حسام / و مرمر الحل بالنسبالك
ليلى / الله يعنى انت واخد بالك طب و ماله و مالها مرمر بنت خالتك و متربيه معاك و عارف اخلاقها كويس و انت اولى بيها مالغريب
حسام / مرمر اصغر منى باكتر من عشر سنين ليه تظلميها معايا ربنا يكرمها بحد فى سنها
ليلى / هو عشر سنين كتير يعنى متشوف اصحابك على الاقل تاخدها صغيره تدلعك
حسام / دى بنت اختك يا شيخه ترضى تجوزيها لواحد مبيحبهاش و انتى عارفه و متاكده انه بيحب واحده تانيه مصعبتش عليكى تظلميها
صوت دحك مرمر و مصطفى من جوه حسام و ليلى يبصوا عليهم
حسام / بصى يا ماما لو فاكره ان مرمر هتقدر تملى مكان سمر فى قلبى تبقى بتظلمينى و تظلميها سمر عندها مشكله اه مش هنكر بس هى محتاجه وقت
ليلى / اكتر من كدا دى سته و عشرين سنه
حسام / و فيها ايه يعنى محسسانى انها سته و سبعين اديها وقتها سمر بتتغير انا حاسس بلاش تضغطى عليا و عليها ادينى فرصه اخيره
ليلى / بص ان كان فى سمر ميزه تخلينى استحملها عشانها انها رجعتك مصر ليا تانى ماشى يا حسام انا هصبر بس مش هصبر كتير انت مش صغير انت كمان انت تسعه و عشرين و كلها كام شهر و تبقى تلاتين
حسام / ايه عنست
ليلى / ليك نفس تهزر انا داخله اتوضى انا كمان الفجر هياذن
حسام / ماشى انا هدخل وراكى
........................
فى اوضه سمر
سمر بتشتغل
عليا / انتى ليه سبتينا وقومتى بره
سمر / انا قولت مجيش مش هتنبسطوا فوجودى
عليا / مين قال
سمر / انتى مشوفتيش ازاى بوظت اللعبه و قلب اليوم نكد
عليا / لا مقلبتيهوش اليوم زى الفل و كلنا دحكنا على المقلب اللى حسام عملوا فيكى و دحكنا اكتر لما عرفنا انك رديتيهوله و مصطفى بيقول مشفش رده فعل بالسرعه دى و مكنش متخيل ابدا انك هتاخدى حقك بالسرعه دى
سمر تتنهد
عليا / متكبريش الموضوع قومى اقلعى هدوم الخروج دى و اللبسى البيجامه بتاعتك عشان تنامى و سيبى بقى ام الشغل ده اللى هيضيع عنيكى هو ايه يا شيخه ادمان
سمر / دى الحاجه الوحيده اللى بعرف اعملها يا عليا
عليا / مين بقى اللى حط الهبل ده فى دماغك على فكره انتى شاطره فى كل حاجه بتعمليها انتى بتطبخى احلى منى و اشطر منى فى شغل البيت و تقديراتك فى الكليه اعلى منى فاضل ايه ادب و اخلاق و ذكاء و شطاره ناقصك ايه
سمر / انتى بتقولى ايه يا بنتى
عليا / بقولك كبرى دماغك و قومى فرفشى كدا فين بيجامتك
سمر تشاور عليها عالسرير عليا تفردها و تفطس مالدحك
سمر / خدت بالى بس الحمد لله انى مش هطلع بيها مالاوضه
عليا / لا ازاى استنى انا عندى معصم اللبسيه عالبجامه و اطلعى اصورك جنب حسام هيبقى شكلكوا مسخره و انتوا لابسين نفس البجامه و نفس اللون
سمر / سبحان الله
عليا / فعلا سبحان الله انتى و حسام دماغكوا واحده لا و الاغرب ازاى كل مره بتتقطع علاقتكوا بترجعوا تانى عادى جدا بصدفه تتقابلوا فى الكليه صدفه مصطفى يتعين فى الشركه صدفه سبحان الله عليكوا بجد انتى عارفه انا بحس ان فى بينكوا كميا
سمر / بطلى هبل حسام دا مجرد صديق
عليا / مفتكرش
سمر / مرمر حلوه اوى
عليا / مين دى دى غلاسه السنين
سمر / قدك مش كدا
عليا / اه بس مش عارفه مين فهمها انها ملكه جمال الاغريق دى تقيله على قلبى يا باااااى
سمر / هههههههههههههههههه هتسعد حسام انا متاكده هى باين عليها معجبه بيه
عليا / معجبه دى راميه نفسها حته راميه
سمر / ربنا يوفقهم و يسعدهم
عليا / من قلبك
سمر / ايه السؤال ده
عليا / لا مفيش انا هقوم اتوضى انا بقى لحسن الفجر هياذن
سمر / لا انا الاول وسعى
سمر تطلع مالاوضه
عليا / عينى فيه و اقول اخيه
...............
قدام الاوضه
سمر تطلع مالاوضه و حسام يطلع مالحمام
حسام / هتتوضى
سمر / اه
حسام / ماشى
سمر / انا اسفه
حسام / على ايه
سمر / انى بوظت اللعبه
حسام / مباظتش مهم لسه بيلعبوا بره اهو
سمر / انا كان دمى تقيل و كمان اتنرفزت عليك
حسام / لا عادى خدى راحتك انا مبزعلش منك خالص
سمر / شكرا
حسام / نعم
سمر / ايه
حسام / خشى اتوضى يا سمر خشى اتوضى
سمر / طيب وسع
سمر تدخل الحمام و تقفل الباب
حسام / ايه حجر مبتحسش قوينى يارب
حسام يمشى و يطلع الصاله
........................
تانى يوم
الكل لابس و جاهز
ليلى / امال سمر مش جايه البحر و لا ايه
عليا / لا بتقول فى ايدها شغل مهم
ليلى / شغل برده ماشى هى سلوى فين يا مرمر
مرمر / فى المطبخ مش عارفه بتعمل ايه
سلوى تطلع مالطبخ و فى ايدها كيسه كبيره
سلوى / كنت بطلع البانيه مالفريزر يلحق يفك على منيجى اكيد هنبقى ميتين مالجوع نعمل شويه مكرونه جنبهم و ناكل عالسريع
ليلى / جدعه والله
سلوى / و جبت شويه سندوتشات و فاكهه لزوم البحر
ليلى / يلا يا سلوى يلا ياختى خلينا نمشى
الكل يمشى و سمر قاعده لوحدها بتشتغل عاللاب تتكلم فى التليفون
سمر / ايوه يا علاء ازيك .....انا بعتلك الملف اطبعه بقى و حطه فى المظروف و بكره الصبح مالفجر تقدمه ......تمام فى اى جديد ....... طب عال اى حاجه ابقى بلغنى سلام .... سلام
سمر تقفل اللاب و تقوم تتمشى فى الشقه تروق فيها و تعدل التكايات و تدخل الحمام تلاقى طبق غسيل ميوهات و هدومها المبلوله من امبارح تشغل الغساله و تحطهم فيها و تروق الحمام و تدخل المطبخ تغسل المواعين
................
عالبحر
حسام يطلع مالميه
ليلى / طلعت و سبت مرمر
حسام / مصطفى معاهم تعبان رجلى شدت جوه
سلوى / سلامتك يا حبيبى
حسام / الله يخليكى يا خالتوا
حسام يقعد و يحط الفوطه على كتفه و يقعد زهقان يبص يمين و شمال
حسام / انا هقوم اتمشى عالبحر شويه يمكن رجلى تفك
ليلى / ماشى بس متبعدش
حسام يدحك / ايه هتوه يعنى حاضر مش هبعد
حسام يمشى و يتصل بسمر
حسام / كل ده عشان تردى
سمر / كنت بدخل الصينيه الفرن
حسام / صينيه ايه
سمر / مكرونه بشاميل
حسام / واو دانا ماما دعيالى بقى
سمر / الف هنا
حسام / و بتعملى ايه دلوقت
سمر / بفضى الغساله عشان انشر
حسام / تنشرى ايه يخربيتك انتى بتعملى ايه عندك
سمر / بص احنا مش هنسيب الحاجه تتكوم و بعدين هدومى لازم تتنشر عشان تلحق تنشف افرض استندلت معايا تانى هعمل ايه ساعتها
حسام / استندلت ماشى مقبوله منك بس على فكره يعنى هدوم عليا مبتشكش و لا بتشك
سمر / انت متصل ليه
..........................
أنت تقرأ
تة مربوطة بقلم / لولو_محمد ( كامله)
Romanceنعيش فى مجتمع تسيطر فيه الافكار القديمه و الرجعية على العقول فمهما بلغتى من نجاح لن تنالى الاحترام الا اذا كنتى زوجه و ام فان لم تكن لكى القدره على مواجهه هذا العالم المريض فلن تكونى ابدا بطله الحكايه
