السلام عليكم ورحمة الله وبركاته.
ازيكم عاملين أيه؟
جماعة أنا في حاجة بجد بفكر فيها لوقت يعتبر طويل -قبل النوم كده-.
دلوقتي الاقتباسات الي بتكون مكتوبة، أي اقتباس مأساوي كدوت، مثلًا: "جميعهم سوف يسعون لتحطيمك؛ لذا كن على استعدادٍ لذلك." -ألفتها حالًا-، طيب الجملة ديت بتدلل أنه الكاتب بيحذر القارئ من الناس الي حوليه، بس دلوقت مش ممكن مأكونش أنا الي موجهالي الرسالة دي؟ مش ممكن أكون أنا هما الي هيسعون لتحطيمك؟
الي أقصده هو أنه لما بشوف كلام زي كده بلاقي كل الكومنتات موافقين والي هو اه ونعم وأجل ويس واحذر يبني ومعرفش أيه، طب إذا كانوا دول كلهم محطمين مين المحطّم؟ المسألة أنه أغلب الناس بتفكر بس فتجربتها الخاصة، الي هو ياجي يقولك "أنا تحطمت على يد فُلان وعلان، وأنا أبدًا مش هسامحهم علي عملوه فيا." طب هل أنت فكرت فكمّ الناس الي حضرتك حطمتهم؟ ولا الأنانية منعتك عن ذلك؟
أنا مش جاية أقولكم أنه أنا البنت المراعية الي محطمتش حد وخدوني قدوة ولولولولولي، لا أنا كمان يمكن حطمت حد بدون ما أعرف، يمكن قلت كلمة خلت حد ميعرفش ينام، وحد تاني يحقد عليا، ويمكن احتمالات كتير تانية، زي ما أنتوا كمان عندكم احتمالات!
أغلبنا احنا كبشر بقينا نتمحور حول دور الضحية المظلومة الي تخدعت كتير وملقتش يد عون ليها، ومش بقول برضو أنه مفيش ناس مظلومة فعلًا، بس في أكتر منهم موهومين! وأنت الي فاكر نفسك ضحية لأحمد ممكن تكون جاني بالنسبة لمحمد، رسالة الاعتذار الي بنشوفها فكل مكان وبتقولك أسف على الي عملوه الناس فيك، ممكن الرسالة ديت تفكرك بأي حد ظلمك أو أنت حسبته ظلمك، وممكن حد تاني غيرك يفتكرك أنت عادي جدًا.
أقعد مع نفسك شوية وحاول تفتكر الناس الي أنت ظلمتها، قادر توصلها؟ ياريت تعتذر أو تحاول علأقل تصلح غلطك، ولو مش قادر أدعي ربنا إن الجرح الي فخاطرهم من ناحيتك يلتئم.
أنت ممكن تكون الضحية فعلًا، بس ممكن تكون جاني فنفس الوقت، ممكن متكونش ضحية ولا عمرك هتكون بس أنت سفاح أهو شغال يضرب الناس نفسيًا -أو جسديًا عادي برضو-، وميبي، تكون ضحية بس مع أن متوقعش بس أكيد في ناس لسه مغلطتش يعني؟ أمل ذلك بجد.
فكر كمان فالناس الي أنت فاكرهم ظلموك، وتذكر أنت أيه عملت وهما أيه عملوا، أنت أيه قلت وهما أيه قالوا، أفتكر حاجاتهم وحاجاتك مش حاجاتهم هما بس؛ لأن ده ممكن يكون أكتر سبب بيخلينا نفكر كضحايا.
وبس والله، هو ده الي كنت عايزة أقوله، في محاولة الحفاظ على ذاتكم أتمنى أنكم متكسروش الأخرين، حاولوا وأنا كمان هحاول معاكم، مين يعرف يمكن نطلعلنا في الأخر بجيل عنده اقتباسات إيجابية بدال السلبية الي محتلة السوشيال ميديا حاليًا.
السلام عليكم ورحمة الله وبركاته، دمتم في أمان الله.
سبحان الله وبحمده، سبحان الله العظيم.
أنت تقرأ
سحابة عالقة
Sachbücherحيث الحروف المبعثرة، هناك أيضًا فصولٌ مبعثرة. معلومات؟ أفكار؟ وجهات نظر؟ أذكار؟ لا، بل كل هذا خلط معًا، خلط ليعطينا هذا الكتاب، سحابة عالقة!
