السلام عليكم ورحمة الله وبركاته.
أنت أيه؟ قائد ولا مدير؟
النهاردة (الخميس) الأستاذة بتاعت الفيزيا ادتلنا محاضرة بعيد عن الدراسة. كانت المحاضرة بتتكلم عن الفرق بين مصطلح قائد ومصطلح مدير.
المدير هو مديرك فالعمل مثلًا الي بيديك الأوامر دون المشاركة معاك في إتمام المشروع الي أمره، ومن الحاجات الي تعتبر من الفروق بين المدير والقائد أنه المدير ببحتفظ بكامل الفضل لنفسه، بيصنع خوف لبعض الموظفين، بيدي غالبًا طاقة سلبية للعمال، إذا حصلت مشكلة بيضع كامل الحق على الموظف ويبدأ بتوبيخه.
طب والقائد الجميل ده الي هو أيه؟ أنا أقولك.
القائد هو الي بيبدأ في العمل معاك، بيعلمك أنت ازاي تعمل كده بالطريقة الصح، وهو كمان بيشتغل مش عاطل وبيدي أوامر بس حضرته، القائد بيكون زي أي فرد في المجموعة بيشتغل ويتعب بس الفرق أنه بيدير الشغل والباقي لاءاه.
الأستاذة وهي بتشرح في الموضوع جابت وحدة من شريحات البوربوينت كان مكتوب فيها بما يعني أنه حضرتك متقدرش تكون قائد على الأخرين بينما أنت مش قائد لنفسك حتى.
هنا قعدت أفكر، أيه معنى إني أكون قائد لنفسي؟ وهل يمكن أنه في شخص بيكون عبارة عن مدير لذاته؟ هل أنا قائد ولا مدير لنفسي؟ وتوصلت للتالي:
القائد للذات هو الشخص الي بيكون عنده هدف ويسعى إليه بأقصى ما يقدر، مثلًا أنا عايزة أقفل الامتحان الفلاني يبقى أنا هذاكر كل فسيفسة في الكتاب علشان أوصل للنتيجة المطلوبة، أنا عايزة التزم بالعادة الكويسة الفلانية فأنا هحارب نفسي الكسولة علشان أداوم عليها، وهكذا.
هل في شخص مدير لذاته؟ اه.
المدير للذات هو الشخص الي كمان عنده هدف بس لا يسعى إليه، باختصار يكون نايملك عالكنبة بيسمع التلفزيون ومستني يقفل اختبار بكرة بعد ما يتنزل عليه وحي الإجابات من اللا مكان سبحان الله. ولما ميوصلش للي هو عايزه بيتعكنن بقى والي هو ليه أنا عايزة أقفل وأيه القرف ده والامتحان كان صعب، وحضرته (غالبًا) بيكون غاضض البصر عن الي عمله قبليها.
هل أنا قائد ولا مدير لنفسي؟ اوك دي كانت للأمانة أكتر استنتاج محبط توصلت ليه؛ لأن اكتشفت إني مجرد مدير فاشل جدين جدين.
مع ذلك، ممكن الإنسان بجد يحسن من نفسه ويخليها قائد، نقدر نبدأ بس بحاجات بسيطة مقدور بزيادة عليها بس نحنا مكسلين نعملها، ثم ننتقل للأصعب حتى نصل للقائد اللطيف الي نحنا عايزينه -أنا عيزاه وقررت أخليكم تعوزوه معايا-.
طيب دلوقتي السؤال هيكون كالآتي:
أنت عايز تبقى أيه؟ قائد ولا مدير؟
السلام عليكم ورحمة الله وبركاته.
أنت تقرأ
سحابة عالقة
Non-Fictionحيث الحروف المبعثرة، هناك أيضًا فصولٌ مبعثرة. معلومات؟ أفكار؟ وجهات نظر؟ أذكار؟ لا، بل كل هذا خلط معًا، خلط ليعطينا هذا الكتاب، سحابة عالقة!
