Unicode
"အဲ့ဒါကြောင့်ကိုကို့ကို သေချာစစ်ဆေးဖို့ပြောခဲ့တာလေ။ အခုကျတော့ဖြစ်ပြီ။ ဆောင်းဟွန်းတော့စိတ်ဆိုးတော့မယ်။"
ဆောင်းဟွန်းနဲ့တွေ့တဲ့အခါကျ ပေးဖို့ဆိုကာယူလာသောလက်ဆောင်ထုပ်ကလေးကိုပိုက်လျက် ဂျယ်ယွန်းသည်ဆူပုပ်စွာပြောလေသည်။ ဂျယ်ယွန်းရဲ့ရှုံ့မဲ့နေတဲ့ပုံလေးကို အစ်ကိုလုပ်သူဂျယ်မင်းသည် စိတ်မဆိုးရက်ဘဲ အသည်းယားလျက်
"ဟုတ်ပါတယ်။ ကျွန်တော်မျိုးကြီးမှားသွားပါတယ်ဗျာ။ ကားကိုသေချာစစ်ခဲ့ရမှာကို မစစ်ခဲ့မိလိုက်ဘူး။ သေလောက်တဲ့အပြစ်ကို ကျူးလွန်မိပါတယ်ခင်ဗျ။"
"ဟော ဒါကရွဲ့တာလား။"
"မရွဲ့ရပါဘူးဗျာ။ ကိုကို့ခွေးပေါက်လေးက ချစ်ဖို့ကောင်းလို့လေ။"
အစ်ကိုလုပ်သူက စနောက်နေသည့်တိုင် ဂျယ်ယွန်းသည်မပြုံးနိုင်။ ညနေမစောင်းခင် အမီလာခဲ့မယ်လို့ ကတိပေးထားသည်ကို မတည်နိုင်ဖြစ်တော့မည်လို့တွေးရင်း စိတ်ညစ်နေသည်။ ဒါတောင်စောထွက်လာခဲ့လို့။
"ခဏလေးဘဲစောင့်ပါကွာ။ ကားပြင်ဖို့ခေါ်ထားတဲ့သူက ဒီနားလေးတင်နေတာ။ ဆောင်းဟွန်းဆီပြောထားတဲ့အချိန်အတိုင်းရောက်စေရမယ်။ ကတိပေးတယ်။"
အစ်ကိုလုပ်သူက ချော့မော့ပြောနေပြန်တော့လဲ ဂျယ်ယွန်းကထပ်စိတ်ကောက်နေလို့မဖြစ်တော့။ သူတို့နှစ်ယောက်လုံး အခက်တွေ့ကြနေတာအမှန်ဘဲလေ။
သူတို့ကားပျက်နေသောနေရာသည် မြို့ထဲသို့ဝင်ခါနီးငါးမိုင်လောက်အလိုမှာဖြစ်သည့်အတွက် ကိုးလို့ကန့်လန့်ကြီးလေ။ ကားနဲ့သွားရင်မြို့ထဲကို ဘယ်လောက်မှကြာကြာမသွားရဘူးဆိုပေမယ့် အခုကားကပျက်နေတော့ လူကစိတ်သွားတိုင်းကိုယ်ပါလို့မရတော့။
ကားပြင်ဖို့လာမည့်သူကို ကားရပ်ထားသည့်လမ်းဘေးမှာ အထုပ်ကလေးကိုပိုက်လျက် ဂျယ်ယွန်းထိုင်စောင့်နေမိတော့သည်။ တစ်အောင့်လောက်ကြာတော့ သူတို့ကားအနားကို ကားတစ်စီးရပ်လို့လာသည်။ ကားလာပြင်ပေးတဲ့သူတွေမှတ်ပြီး ဂျယ်ယွန်းဝမ်းသာသွားပေမယ့် လာသည့်သူကကိုကိုနဲ့သိလို့ ကိုကို့ကိုဝင်နှုတ်ဆက်ရုံသာဖြစ်သည်တဲ့လေ။
