قصص قصيرة

رسالة

_ انا مش فاهمة انت ليه بعدت انا لسه بحبك

بعتت الرسالة دي بيأس ، وبردو كالعادة مفيش اي رد ، رمت الموبايل من ايديها ، ورمت نفسها علي سريرها بضيق واضح ، هي غلطت من البداية لانها كلمته ، بس هو علقها بيه ومشي ليه عمل فيها كده

فجأة سمعت صوت إشعار جاي من موبايلها كانت هتطير من الفرحة ، هو اخيرًا حن عليها وقرر يرد ، فتحت الموبايل بسرعة بس مقدرتش تتكلم فضلت ياصة للرسالة باستغراب بعتلها يقولها

_ وانا حبي صعب وهيأذيكي افهمي بقي انا مش عايز ائذيكي

هي مش عارفة ليه حسيت فجأة بقلق ودي كانت اول مرة تحس كده ، بس هي لسه بتحبه ومش قادرة تتخطاه وده خلاها تعاند اكتر

_ انا عايزة اتأذي وعايزة اشوفك هتعمل ايه ، انت اللي المفروض تفهم انا بحبك بجد ومش قادرة اشوف غيرك في حياتي

المرة دي شاف الرسالة ومردش عدت دقيقة ، اتنين ، خمسة وبردو مفيش رد ، ملاك حست بيأس وقررت تقفل الشات هو مش هيرد عليها خلاص وقبل ما تقفل لقت رسالة جديدة منه فتحتها بسرعة لقيت صور كتيرة جدًا

كلها ليه مع ناس كبيرة بتحاول تبان اصغر من سنها فصلت تقلب في الصور وهي مستغربة جدًا لحد ما وصلت لصورة خلتها تحس وكأن أطرافها اتجمدت،  اول لما شافت الصورة الأخيرة،  كانت صورة ليه هو ومامتها ؟! اللي اتوفت من شهرين في حادث غامض ، واللي غريب اكتر من كده ، أنها كانت لابسة نفس اللبس اللي كانت خارجة بيها في اليوم ده ، لقيت منه رسالة جديدة وهو بيقولها

_ قولتلك يا ملاك ابعدي عني انا مش عايز ائذيكي انتِ كمان

في اللحظة دي هي نسيت حبها ليه ونسيت كل حاجة ، وافتكرت انه هو اللي قتل كل دول وفوق ده قتل مامتها!!!

_ انت اللي قتلتهم !! انا هحبسك وهوديك في داهية انا مش عارفة انا ازاي حبيت شخص زيك !

_ عزيزتي انتِ مش فاهمة حاجة انا مقتلتش حد،  بس هتكون فكرة جميلة انك تعتبريني كده

ملاك حسيت من كلامه انه صادق ، وفي الحقيقة هي مكانتش مرتبطة اوي بمامتها اللي كانت علي طول بره البيت ومبتاخدش بالها من حد فيهم بدأت تفكر شوية وبعدها بعتله رسالة جديدة

_ انا واثقة فيك يا غيث وواثقة انك عمرك ما تعمل كده انا بس كنت متفاجأة من الموضوع ، وبردو لسه بحبك يا غيث

حسيت ملاك انها زودتها وده المطلوب كان نفسها يقولها انه كمان بيحبها طيب يتقابلوا طيب اي حاجة ، لكن مفيش فائدة لقيت رسالة جديدة منه

_ ده اخر تحذير ليكي ابعدي عني يا ملاك

فجأة ملاك خافت ، حسيت انه ده بجد تحذير حقيقي وانه مبيهزرش بس بردو فضلت علي إصرارها لانها بتحبه

_ وانا قولتلك اني مش هبعد عنك يا غيث

استنيت ملاك رده ، وهي حاسة بتوتر ، لقيت اخيرًا رسالة جديدة منه واللي كان بينهي بيها الحوار

_ خلاص يا ملاك انتِ اللي اخترتي متقوليش اني محذرتكيش،  نتقابل بكره في *** ، الساعة عشرة بليل لو مش عايزه تيجي براحتك خلص الكلام بينا دلوقتي سلام يا ملاك مترديش علي الرسالة دي خلاص مش عايز اسمع حاجة تانية

وفعلًا قررت ملاك انها متردش رغم ان الميعاد مريب بس هي لسه واثقة فيه لسبب هي متعرفوش ، بس اللي هي واثقة منه ان رسالته كانت كأنها بتترجاها متروحش

بس هي بردو فضلت مصرة انها تشوفه ، وجه الميعاد اخيرًا واللي كانت مستنياه بفارغ الصبر ، قربت بهدوء من مطعم صغير ، بعد ما مشيت ورا جوجل ، المحل كان مقفول ، بس لقيته هو قاعد قدامه مديها ضهره وواضح عليه الشرود

قربت منه وهي بتحاول تخلي صوت خطواتها مسموعة ، وده اللي نجحت فيه ، غمض غيث عينه بندم للي هو هيعمله وهو بيهمس لنفسه أن هي اللي اختارت

ابتسم لها ابتسامة مزيفة وهي كانت واخدة بالها أن مزيفة بالفعل ، لكنها مهتمتش وابتسمت هي بفرحة وقبل ما تبدأ تتكلم ، قاطعها غيث وهو بيقولها بهدوء : معلش يا ملاك بس ممكن ناخد صورة الاول

رغم كون ملاك اتعجبت جدًا من الطلب ده ابتسمتله ووافقت راح عدل الكاميرا وجه وقف جمبها بعد ما شغلها علي وقت معين ، ملاك كانت حاسة ان في حاجة غريبة بس مهتمتش

اول لما الكاميرا صورتهم ملاك اختفت من جمبه ، وغيث غمض عينه وهو حاسس بندم : اسف يا ملاك حاولت أحذرك بس انتِ كنتي مصرة
_________________________________________________________
بعد عدة ايام وبينما يسير غيث في شقته ، رأي ذلك الخبر الذي كان يظهر علي قنوات الاخبار

* مقتل فتاة في بداية العشرينات من عمرها تحت ظروف غامضة *

هز غيث رأسه بضيق واضح ، وغير القناة وهو بيحاول يقنع نفسه انه حاول يحذرها وانه كده عمل اللي عليه

تمت
____________________________________________________________
بقلمي داليا احمد عزالدين

رأيكم فيها 🫂❤