قصص قصيرة

لعنة المراية

لعنة المراية

_ هو لسه المجنون ده موجود في المستشفي يا سلمي

اتكلمت رحمة بضيق واضح جدًا في نبرة صوتها ، اكتفت سلمي بأنها حركت راسها بالموافقة وعلقت بنفس ضيق رحمة : ايوة يا رحمة للاسف لسه موجود ومحدش لحد دلوقتي عرف سبب الجنان بتاعه ده اقترحت عليهم يودوه مستشفي المجانين مرضيوش واتخصم كمان من مرتبي يومها شوفتي الظلم

سكتت رحمة شوية وعلقت بفضول واضح بعد ما بصيت حواليها تتأكد أن محدش سامع كلامهم : سلمي بقولك متعرفيش هو ايه اللي حصل وصلته لحالته دي لدرجة انه بقي علي طول في المستشفي بسبب كمية الجروح اللي بتحصله دي

_ والله يا بنتي محدش يعرف حاجة عن الموضوع ده كل اللي نعرفه انه عنده عقدة من المرايات ودي أغرب حاجة انا شوفتها في حياتي كلها ، كل ما بيشوف مراية بيكسرها وقالوا كتير قصص غريبة عن الموضوع ده ، بس اهم قصة واللي سمعتها عن طريق الصدفة من كام يوم من والده وهو بيحكي لاخوه ان ابنه من ساعة ما ارتبط بالمشعوذة بتاعة الجن دي وحبها وهو حاله اتشقلب خالص وبقي بيتصرف بطريقة غريبة محدش عارف سببها وقال انه حاول يجيب شيخ اكتر من مرة يرقي البيت بس محصلتش اي استفادة من الموضوع ده رغم انه مايروحش اصلا البيت والحالة زادت سوءا

سكتت سلمي لما خلصت كلامها وسكتت معاها رحمة ومحدش منهم عارف يقول ايه وثواني وبدأوا يسمعوا صوت تكسير جامد جاي من الدور اللي هما فيه وصوت ازاز بيتكسر ، نفخت سلمي بملل وهي بتقول بضيق : اهو الجنان ابتدا مرة تانية هروح انادي الدكتور توب علينا بقي يارب وارحمنا من الجنان ده

اول لما خلصت كلامها مشيت بسرعة وسابت رحمة لوحدها علشان تنادي الدكتور يجي يشوف ايه اللي حصل المرة دي ، في حين أن رحمة فضلت واقفة شوية بدون ما تعمل اي حاجة ، بس فجأة قررت تغامر وتعمل حاجة جديدة ، ليه متروحش وتشوف ايه اللي بيحصل هناك دايمًا بيختاروا الناس اللي بتدخل للشاب ده بعناية ومش كله ينفع يشوفه ، هما بس سمعوا عنه بس هي عندها بجد فضول تشوفه راحت بخطوات بطيئة ناحية الاوضة بتاعته وهي بتفكر أن مفيش اسوء من اللي بتحصل ممكن تحصل ، فتحت الباب اللي كان شبه موارب ودخلت الاوضة ببطئ ، معديتش ثواني وصوت صريخها فجأة ملي الاوضة كلها لما شافت الشاب مقتول وشراينه مقطوعة وفي نفس الوقت واقف بيضحك قدام عينيها وهو باصص للازاز المكسور بشر واضح وفجأة اغمي عليها....
____________________________________________________________________
طبعًا محدش فاهم اي حاجة من اللي حصلت دي خليني انا افهمكوا بقي الموضوع من البداية خالص ، اسم صاحب الحكاية احمد ، احمد كان عنده خمسة وعشرين سنة ، كان شاب شكله حلو ودايما مرتب كده ولطيف في تعامله ومن الآخر كده عمر ما كان ليه عداوة مع حد

الموضوع كله بدأ أن هو في يوم وهو قاعد مع صحابه واحد من صحابه واللي اسمه محمد اتكلم فجأة وقالهم : مشوفتوش انتوا البرنامج الجديد اللي انا شوفته يا جماعة ، برنامج غريب اوي وبجد فكرته لوحدها مريبة ، البرنامج اسمه mirrors وبيتكلم عن مجموعة من المرايات اول لما هتفتح البرنامج هتلاقي نفسك موجود في مكان كله مرايات ، بس مقسوم نصين نص الشخصية اللي انت هتختارها هتكون موجودة فيها والنص التاني هيبقي لشخص عشوائي ، البرنامج بيديك نص ساعة تقريبا كلام مع الشخص العشوائي ده ولو ارتاحتله بتقدر أنك تضيفه كصديق ليك ولو لا بتتقفل الغرفة من غير ما حد فيكوا يعرف أي حاجة عن التاني لان اي أسئلة شخصية بتخلي البرنامج ده يعملك بلوك وميدخلكش عليه تاني ، انا سمعت ان ناس كتيرة جربته والفكرة لوحدها تحسوها حلوة كده وجديدة ايه رأيكوا لو نجرب البرنامج ده