بدايه النهاية
السادس والعشرون والاخير
ميرنا روحت مبسوطة لكن لما شافت حاله سمية زعلت عشانها و حاولت تهون عليها لكن سمية قفلت ع نفسها و قفلت كمان تلفونها وفضلت تعيط وبس ميرنا و نرمين ميأسوش وفضلو وراها لحد ما فتحتلهم
ميرنا ... ممكن افهم في ايه وليه كل العياط دا ؟ مش دا اللي كنتي عايزاة انك تخلصي من عاصم ايه ال مخليكي منهارة اوي كدة
سمية 😭 ... سيف مش بيحبني زي ما اكون كنت حمل ع كتافة كان عايزني موافقش علي طلاقي من عاصم
نرمين كشرت ... دا اللي فهمتيه من اعتراضه ؟
سمية ... اومال هي ليها معني تاني يا نرمين
نرمين ... اه طبعا الاتفاق ع بعضه أن طلاق قصاد تنازلك عن ميراثك ملفتش نظرك أنه ممكن يكون قصدة علي الميراث حقك اللي بسهولة اتنازلتي عنة ؟؟
سمية ... يا سلام
ميرنا ... الاحتمالين موجودين و سهل اوي تعرفي انهي فيهم اللي حقيقي
سمية بلهفه ... ازاي هه قولي
ميرنا ... لو بيحبك مش هيسيبك تنامي وانتي فاهمة أنة كان عايزك ترجعي ل عاصم
سمية ... وان محصلش
ميرنا لسه هترد لاقت تلفون سمية رن برقم سيف
ميرنا 😉 ... الله يسهلو يا سيدي تعالي يا نيرو نستني احنا برة ع ما المكالمة الخصوصي دي تخلص
سمية 😏... رخمة
تلفون فصل ورجع رن تاني وسمية ردت
سمية ... الو
سيف ... صوتك ماله ؟
سمية ... مفيش حاجة
سيف ... سمية انتي فهمتي غلط والله انا كنت عايزك بس تفكري فى حوار ميراثك دا لانة حقك ولو ع الطلاق ف انتي كان ممكن تعملي خلع من غير ما تخسري حاجة من ميراثك بس انتي مدتنيش فرصه اتكلم حتي و تقريبا فهمتي كلامي كلة غلط
سمية وهي مكشرة ... و عصبيتك عليا قبلها في التلفون ؟
سيف ... غصب عني والله انا فجأة حسيت اني عاجز مش عارف اعملك اي حاجة احساس عجز ع خوف ع غضب كانو مسيطرين عليا حقك عليا اسف ياستي
سمية ... ماشي خلاص مش زعلانة بس عايزاك تعرف اني مكنتش هقدر استني قضية و اجراءات مكنتش هقدر ابقي علي زمتة كل دا وكدة أو كدة انا عايزة ابدء حياتي بعيد عنهم خالص عشان كدة مترددتش لحظة اني اوافق علي عرض عاصم
سيف ... ممكن اسالك سؤال؟ ولو محبتيش تجاوبي عادي مش هزعل
سمية ... سؤال ايه ؟
سيف ... انا ليه حسك معندكيش فضول تعرفي ماضيكي ايه ؟ حياتك كانت ازاي ؟ وليه عاصم اتكلم بالطريقة دي يوم الحفلة لما شافك ؟ كل دي أسئلة ازاي مش عايزة تعرفي اجابتهم؟
سمية اتنهدت ... مسالتش انت نفسك ازاي كنت بخرف طول الوقت باسم عاصم وافتكر مشاهد من ماضي بيجمعني بيه و مع ذلك مرجعتليش الذاكرة لحد دلوقتي
سيف ... ويا تري ليه ؟
سمية ... لاني من جوايا يا سيف مش عايزة افتكر متأكدة أن حياتي كانت مش سعيدة ابدا واني كنت حزينة فيها و مقهورة ومش عايزاها ولا عايزة افتكرها عايزة ابدء سمية جديدة حياة جديدة مش عايزة سمية اللي كانت ضعيفة عايزاها قوية دا السبب
سيف ... و يا تري انا وصفية هنكون في حياة سمية الجديدة ولا لا ؟
سمية ... والله دا بيتوقف عليكم انتم عايزين تكونو معايا ولا لا
سيف ... اكيد طبعا وبعدين بمزاجك أو غصب عنك احنا هنفضل في حياتك العمر كله
سمية ببتسامة ... ماشي يا سيدي قول ل صفيه تعمل حسابها أن الخميس خطوبه ميرنا وانا قولتلها اني هعزمها
سيف ... صفيه بس ؟
سمية ... تؤ وأخو صفيه و حظابط كمان
سمية فضلت ترغي كتير مع سيف والبنات لما سمعو صوت ضحكها اطمنو عليها
نرمين تاني يوم راحت ل عمرو عشان تشوف ادم و قبل ما تمشي من عندة عزمتة علي خطوبة ميرنا و طلبت منه يجيب ادم ويجي يشوف المكان اللي هي ساكنة فية و حياتها الجديدة عشان يطمن اكتر لما تاخد منه ادم و عمرو وافق
و جة يوم الخطوبة ميرنا من اول ما صحيت وهي متوترة جدا هند مردتش عليها في حوار خالد و دا شيء كانت مستغرباة جدا خايفة تحصل حاجة تنكد عليها في يوم هي مستنياة بقالها كتير البنات من اول ما صحيو كانو معاها
سمية ... افرحي يا عروسة انا العريس لولولولولوي
حنان ... ربنا يفرح قلوبكم يا حبايبي يارب وافرح بيكم انتم كمان
سمية ... امين يارب يا طنط
حنان ... اية طنط اللي انتي مسكهالي دي
سمية ... اومال اقول ل حضرتك ايه
حنان ... تقوليلي يا ماما عندك مانع
سمية 🥺 ... لا طبعا أنا اطول اصلا ... ممكن حضن بقا
حنان فردت دراعتها ل سمية و نرمين كمان قربت منهم و حنان حضنتها هي كمان
ميرنا كانت مبسوطة أن هي و امها اخيرا مبقوش لوحدهم تاني ...
نرمين ... ميمو انا هروح مشوار وارجع ع طول مش هتاخر عليكي
ميرنا ... رايحة فين ؟ مش عمرو هيبجب ادم ويجي بالليل ؟
نرمين ... اه انا رايحة ل بابا هحاول تاني معاه لوحدي من غير عمي
سمية ... تحبي أجي معاكي
نرمين ... لا طبعا خليكي مع ميرنا وانا هرجع علي طول يلا سلام
وصلت نرمين قدام البيت و هي متوتره كالعادة بس المختلف المرة دي أن عندها تصميم و ارادة أن ابوها يسامحها أو ع الأقل يسمعها رنت الجرس و ثواني الباب اتفتح
عبد الله ... انتي مبتزهقيش ؟
نرمين ... لا مش هزهق ابدا .. ممكن تسمعني مرة واحدة بس ؟
عبد الله ... لا
وقبل ما ترد قفل باب الشقة بس نرمين ابتسمت و كملت كلام لأنها واثقة أن ابوها سامعها
نرمين ... انا عارفه انك سمعني يا بابا ... و عارفه انك موجوع عليا اكتر من انك زعلان مني ... بس ربنا مش بيعمل حاجة وحشه ابدا انا كان لازم اخد قلم جامد كدة عشان افوق ل نفسي و ل ابني ... كان لازم اتوجع اوي كدة عشان اتعلم الدرس كويس ... انا عارفه أن اي كلمة اسف مش هتعمل حاجة للقهرة اللي انا كنت سبب فيها بس والله يا بابا انا اتغيرت اوي انا دلوقتي ببدء شغل مع بنات اكيد عمرو حكالك عنهم بعتمد علي نفسي و هربي ابني كويس حواليا ناس بتساعدني بس انا محتجالكم اوي ... بابا سامحني و خلينا نبدء صفحة جديدة .. طب حاول حتي عشان خاطري عاقبني وانا جمبك و تحت عينيك بابا انت حضنك وحشني اوي وماما واختي كمان سامحني ارجوك 😭
نرمين خلصت كلامها وفضلت واقفة شوية و لما طال انتظارها لفت عشان تمشي لاقت الباب اتفتح و ابوها عينيه مليانة دموع
عبدالله ... انا هحاول مش عارف هقدر انسي اللي عملتيه فيا و في نفسك ولا لا بس هحاول عشان انتي بنتي مهما حصل
نرمين جريت علي ابوها حضنتة و انهارت في العياط و امها جريت عليها وحضنتها و بعد وقت من العتاب و الصلح نرمين عزمتهم علي خطوبة ميرنا عشان يتعرفو علي المكان اللي هي فيه وهما وافقو و وعدوها أنهم هيجو. .. وروحت نرمين وهي سعادة الدنيا كلها جواها وحست أن ادم خلاص قرب يبقي في حضنها ديما
__________#بقلم_مني_________
الليل بدء يهل و معاه مظاهر الفرحة اللي كانت غيبة عنهم بقالها سنين كل واحدة فيهم حست أن اليوم دا بدايه لحياة جديدة ❤️
حمزة وصل و عينيه بتدور علي ميرنا
حنان ... اهلا اهلا يا عريس
حمزة ... ازيك يا ماما عامله ايه
حنان ... الحمد لله يا حبيبي تعالي اتفضل ميرنا و البنات خلاص قربو يخلصو
حمزة كشر ... كل دا ومخلصوش ؟
حنان ... مستعجل اوي
حمزة ... وحشتني طيب اعمل ايه
سليم جري علي حمزة
سليم ... سليم حب حمزة حبك
حمزة حضنة جامد ... وانا بحبك و بموت فيك كمان
حنان .. دا اول مرة يقول كدة ميرنا لما تسمعه هتفرح اوي
جرس الباب رن فتح حمزة
حمزة ... أيوة
سيف بحرج ... احم مش دا بيت مدام حنان ؟
حمزة ... أيوة هو .. انتم ضيوف سمية ولا نرمين ؟
سيف ... سمية
حمزة ... اهلا وسهلا نورتنا اتفضلو
حنان ... اهلا يا حبايبي اتفضلو ثواني و البنات هتخرج أهو
دخلت مني
مني ... حنونة الف مبروك اومال فين العروسة ؟
حنان ... الله يبارك فيكي حبيبتي اتفضلي خارجة اهي خلاص
خرجت ميرنا وهي مكسوفة جدا كانت لابسه فستان اوف وايت وفي خطوط دهبي وعمله ميكب رقيق جدا و وراها نرمين و سمية
حمزة ... ماشاء الله حبيبتي زي القمر ديما
ميرنا ... انا مكسوفة اوي ما كنا معملناش حاجة وخلاص
حمزة ... ليه بس دا انا طاير من الفرحة
أنت تقرأ
للخذلان وجه أخر
Ficción Generalتلات حكايات كل حكايه فيها شعور واحد مسيطر وهو الخذلان من اكتر ناس المفروض الواحد يكون متعشم فيهم فيه اللي اتخذلت من حبيبها و اهلها واللي اتخذلت من صحاب و اقاريب واللي الكل خذلاها بلا استثناء لكنهم كلهم قررو يكملوا لوحدهم و يكونو اقوي مهما كانت الظروف
