Halo halo at Fruit Salad Poetry and Prose

I. Student Life Buhay Estudyante

Mga Tanong Habang Lumalaki

Kapag ano, may sagot o paliwanag

Kapag saan, may lugar o pinangyarihan

Kapag kalian, may oras o panahon

Kapag bakit, masasabing may dahilan

Kapag paano, hahanap ng paraan

Kapag sino, ang sagot ay kadalasang tao

Ano po ang ulam natin ngayong umaga?

Saan kaya kami maglalaro mamaya?

Kailan kaya uuwi si Nanay?

Bakit pag hapon dapat matulog at manatili sa bahay?

Paano kaya magbisikleta? Gusto kong matuto

Sino kaya ang mga magiging kaibigan ko?

Ano pa ang dahilan ng pag aaral

Kung di naman tiyak ang kinabukasan?

Saan kaya tutungo matapos ang ilang taon

Kung hindi naman tiyak ang kinabukasan at ang ngayon?

Kailan matatapos ang mga problemang ito

Kung maya't maya may suliraning binubuno?

Bakit may tanong na di mabigyan ng kasagutan

Kung lahat ng bagay ay may kadahilanan?

Paano makakatulong sa iba

Kung ang sariling problema ay di makaya?

Sino kaya mahihingan ng saklolo

Para masolusyunan ang lahat ng ito?

Ano pa ba ang sa iyo bumabagabag

Kung lahat ng sagot sa harapan mo nakalatag?

Saan makikita ang hinahanap na katiyakan?

Sa ngayon na iyong kinatatayuan

Kailan matatapos ang mga problemang ito?

Sa oras na ikaw ay kumilos at tumayo

Bakit kailangang sagutin ang mga katanungan

Kung wala pa naman talaga ang kasagutan?

Paano matatapos ang mga pasaning ito?

Sa iyo matatapos, sa sarili mo

Sino ang makakatulong sa akin tungkol dito?

Wala. Ikaw lang mismo

 Bakit Di Nakukuntento Ang Tao?

Kapag bakasyon, nababagot sa bahay

Kapag may pasok, gusto namang tumambay.

Kapag may pera, naghahangad pa ng marami

Kapag natupad ang pangarap, may bago pang minimithi

Pag bata pa, gusto nang tumanda

Pag matanda na, gusto bumalik sa pagkabata

Patapos na, gusto pang magsimula muli

Nasa paroroonan na, gusto pang bumalik

Ang tanong ay ang sagot

Ang sagot ay ang tanong

Bakit di nakukuntento ang tao?

Dahil di nakukuntento ang tao

Lumalakas at umaasenso

Nangangarap at nananalo