لست رقيقة

١

من إحدي قصص كتاب صاحبة الأنف الإفريقي الأفطس ل : ساجده جعفر 

" أكبر مغامرة يمكن أن تمر بها هي أن تحيا الحياة التي تحلم بها " ( أوبرا وينفري) 

شخصيات الرواية حسب تسلسل الأحداث 

● مريم بت في أول عمرها وبداية المراهقة حلمها تتعلم وبالتحديد تقرا طب الخرطوم ، ده حلم طفولتها 

●علوية : أم مريم مكسورة الجناح وضعيفه شخصية غريبة ومعقدة ما عندها هم غير تطفش وتتزوج الأعرج وتقري بتها وتحقق ليها حلمها 

●الأعرج : ( حسن ) كل همو يتزوج علوية ويحقق ليها احلامها بانها يكون عندها زوج تستند عليهو

●سمية : صديقة مريم ورفيقة كفاحها في دراسة الطب رغم اختلاف ملامحهم بس اروحهم واحلامهم كانت واحده 

●طارق : طالب في كلية طب الخرطوم بحب سمية رغم الاختلاف البينهم في القبيلة والعادات والتقاليد وما عايز في الدنيا دي غيرها 

●هاشم : طالب في كلية طب الخرطوم وصاحب طارق بقع في حب مريم من اول نظره 

●باقي الشخصيات بتظهر تباعاً مع تسلسل الاحداث 

●أهم شي التفاعل تاق لصحبتك تقرا معاك وتعليقك ياريت ما يكون بي " تم " يكون نقد بتقبل النقد سواء كان ايجابي أو سلبي المهم تعبري عن محتوي الحلقة في البوست الأساسي للألبوم وياريت ما يكون في تعليق في الحلقة او صورة الحلقة 

ومتابعة ممتعة 

● كل يوم حلقة 

_مريم يابت اصحي ، مريم 

_مالك يا امي 

_اصحي البسي الهدوم ديل 

_ماشين وين في الليل ده 

_ماشين الخرطوم 

_الخرطوم دي وين 

_بعيده ما قريبه ، قومي بس انتي يابتي 

_وستي نفيسة ما ح نكلمها

_لا ما ح نكلمها 

_امي لكن 

_ولا لكن ولا غيرو يلا قومي ، مش ده الانتي عايزاهو

_اي لكن ما كده ، انا عايزة نمشي عديل اي زول يكون عارفنا مشينا 

_لا عديل ما بنقدر ، قومي يابتي ، لازم نتحرك بتاع الكركابة منتظرنا قبل الكبري 

_وح نمش بي شنو 

_بي الحمار 

_قومي حلفتك بي ستي مريم بدون كلام الليل بشيل الكلام انا بعمل ده عشان منو مش عشانك يلا قومي

_كويس قمت 

طلعت مع امي بعد نص الليل او ممكن يكون أقرب للفجر ما متأكده ، بس المسافه القطعناها ونحن علي ضهر حمارنا كانت طويلة شديد ولو كان طلعنا قريب الفجر مفروض الشمس تكون طلعت ، إتأكدت كده انو نحن طلعنا بعد نص الليل ، أي حِلة نخليها ورانا ما بلاقينا فيها غير الكلاب والحمير المربوطه في قدام البيوت ومرات رجال بترتحو ويترنحو في الشوارع ، ماكنت عايزه نطلع في الليل كده زي السارقين وهاربين وما عارفه أمي عملت كده ليه ، طول الطريق وانا بفكر يعني شنو لو وقفت قدام الناس وقالت ليهم سايقه بتي وماشه اصلا هم ما أهلنا عشان يتحكموا فينا مع اني طول عمري كنت بحاول أوصل لسر العلاقه دي بس ما قدرت