අප්පගෙ කතා 🤡 || Short Stories

ඉල්ලන් කැවිල්ලා 🙄

ඒක දකුණු රටේ ගිරුවා පත්තුවේ එක්තරා සාමකාමී ගමක්.. කතාවෙ පහසුවට අපි ඒ ගම ඕනෑ එපාකම් ගම කියල හදුන්වමු..

(දැන් එකෙක්වත් මැප් එක දාගෙන ගුගල් එකී මෙකී නොකී තැන්වල ඕනෑ එපාකම් ගම ගැන හොයන්න එපා.. එහෙම ගමක් මේ සිරිලංකාවෙ නෑ...)

හැමදාමත් වගේ ගිරුවා පත්තුවේ අනෙක් ගම් වලට වගේම මේ ඕනෑ එපාකම් ගමටත් ඉර නම් පෑව්වෙ නැගෙනහිරින්ලු.. හැබැයි ඒ ඉරත් බටහිරින් පෑව්ව කියලා මුළු ඕනෑ එපාකම් ගමේම උන්දැලාගෙ මොලගෙඩි ටික අවුල් කරන ජාතියෙ පෝලිසාදයෙක් තමයි මන් මේ කියන්න යන කතාවෙ කතා නායකයා.. දැනට මගේ පහසුවටත් කියවන අයගෙ පහසුවටත් මන් ඒ කෙනාව අප්පා කියලම හදුන්වන්නම්කො.. මොකද මේ පොතේ නමත් අප්පගෙ කතා නිසා කතාව ඇතුලෙත් අප්පා ඉන්න ඕනනෙ නේද..?

හරි හරි.. ඒනම් කතාවට යමු...

ඒක එක්දහස් නවසිය බර ගනන්වල දවසක්.. අපේ කතා නායකයා උණු අප්පා ඒ කාලෙ වයස යන්තම් විතර දහට අටක් දහ නවයක් උණු හොද ඉලන්දාරියෙක්.. ඉලන්දාරියා කියන වචනය ඇතුලෙ දැරියන් ඉල්ලන කෙනා කියන තේරුම තිබ්බා උනාට මේ අප්පාට නම් ඉලන්දාරියා කියනවට වඩා ඉල්ලන් කැවිල්ලා වගේ නමක් ඕනවටත් වඩා ගැලපෙනව කියලයි මට නම් හිතෙන්නෙ..

ඉල්ලන් කැවිල්ලා.. !

ඔව් ඒකට හොඳ හේතුවක් තියෙනවා.. ඉන්න මන් කියන්න යන්නෙත් ඒකට හේතුව තමයි..

අපි මුලින්ම ඕනෑ එපාකම් ගමෙන්ම පටන් ගමු..

ඕනෑ එපාකම් ගම බොහොම සුන්දර ගමක්.. ටිකක් විතර දුෂ්කර ග්‍රාමීය පරිසයක තිබුණු මේ ගමත් මායිම් උනේ පොඩි වැවක් වගේම යන්තමින් හදල තිබුණු පන්සලකින්.. පන්සලක් කිව්වට යන්තම් ආවාස ගේකට විතරක් සිමා වෙලා තිබුණු මේ පන්සලේ වැඩ වාසය කලේ හාමුදුරුවෝ දෙනමක් විතරයි.. නායක හාමුදුරුවන් වහසේත් උන් වහන්සේගේ ගෝල හිමි නමත් හැරුණම පන්සලට ආ ගිය ඕනෑ එපාකම් ගම් වැස්සෝත් ඇරුණම මැස්සෙක්වත් මේ පන්සල ඇතුලෙ නම් නොහිටිය තරම්.. හරි හැටි වෙහෙර නමක් හෝ නොතිබුණු මේ පන්සලේ ලොකු හාමුදුරුවන් වහන්සෙ බොහෝම වයසක වගේම හරිම අල්පේච්ච පැවිදි ජීවිතයක්ගත කල හිමි නමක්..