"جِنان رسمي"

الحلقة الخاصة الثانية [2]

"جنان رسمي"
«حلقة خاصة '2'»

- يا صباح الخير يا سي مُعتز.

رفع إحدى حاجباه بدهشة وقال:-
- صباح الخير!! .. خير يا مريم أيه مصحيكي دلوقتي يا حبيبتي.

تخصرت وقالت وهي تهزّ قدمها بعصبية:-
- قصدك أيه يا معتز.

- يعني .. عمرك ما عملتيها ولا قومتي وأنا رايح الشغل، الساعة دلوقتي تمانيه وإنتِ معاكِ لي اتناشر الضهر.

- آآآه ادلع براحتك واتريق يا سي معتز حقك يا راجل .. ماشي...
أنا قولت يا حبيبي أغير الروتين شوية، وعلى فكرا أنا قايمة من النوم سته..

- بجد يا مريم!

- أمال..

- غريبة جدًا والله أنا قلبي مش مطمن..

- لا طبعًا اطمن يا ميزو هو أنا عندي أغلى منك..

- استرها يارب،.مريم ادخلي يا حبيبتي كملي نوم.

- فكك كدا يا معتز وتعالى أوريك الفطار إللي جهزته.

- وكمان فطار دا كدا كتير، إنتِ سخنة يا مريم .. أنا عارف إن هرمونات الحمل مبهدلاكي معلش يا مريمة.

- وإنت الصادق يا ميزو .. شوف بقى عملت كيك بالفراولة وحضرت أومليت وجبنة وعملتلك البطاطس إللي بتحبها وكمان حضرت النسكافيه بتاعك..

- جيب العواقب سليمة يارب، بصراحة أنا مستغرب جدًا يا مريوم..

قربت منه وعدلت من ياقة قميصه وقالت بإبتسامة:-
- بصراحة يا معتز أنا قررت أغير الروتين لأنه ممل أوي، وقولت تغير كمان..

- يارب دايمًا كدا يا مريوم...شوفي النشاط حلو إزاي..

وقالت وهي تأكل بعض حبات الفراولة:-
- آآه الصراحة هو حلو.

جلس مُعتز يأكل طعام الإفطار بريبة، ليُخبرها بحذر:-
- أنا هروح مع حسنات المحكمة علشان هتقابل المحامي ولازم أكون معاها..

قبضت على كفيها بغلّ ثم ابتسم بوجهه قائلة من بين أسنانها:-
- وماله يا ميزو .. وماله يا حبيبي دا واجبك بردوه وهي بنت عمك لا أكتر ولا أقل.

رفع إحدى حاجبيه بتعجب، واستفهم بخوف داخلي:-
- كدا أنا اتأكدت إنّ في حاجة، دا إنتِ إمبارح اتحولتي خير يا قطتي.!

وضعت كفها على يده وضغطت على أسنانها تقول من بينهم:-
- أنا واثقة فيك يا معتز وعارفة إنك بتعمل حدود بين أيّ حد بيحاول يتجاوز حدوده، كمان إمبارح حبيت أنكُش معاك وأدلع عليك من زمان مش ناكفت فيك.

حاول تصديقها ثم قبل يدها بحب وقال:-
- حبيبتي يا أجمل مريومة، ادلعي على راحتك يا روحي، جهزي نفسك إن شاء الله لما أرجع نخرج طالعة حلوة كدا أنا عارف إن انشغلت عنك وكمان إنتِ زهقتي..