اسكريبتات

إني أحب

إنِـي أحـب...

اسكريبت..✨❤️

الله أكبر الله أكبر الله أكبر لا إله إلا الله، الله أكبر الله أكبر ولله الحمد..
  - مش هنروح بقى يا مي، الصلاة وخلصت، والخطبة خلصت نستنى في الشارع لحد امتى؟
  _ يا بنتي تعالي نضحك شوية على لبس البنات في صلاة العيد
  - لا والله؟!
_ أوباااا شايفة دي.
  - فين دي؟
  _ أهي اللي ماشية هناك دي.
شاورتلها بإيدها فتقى بصيت واتصدمت، ردت مي وهي بتضحك
_ مش دي سعاد بنت تفيدة، إيه اللي عملاه في شعرها ده، بصي دي صبغاه أحمر يا حلاوة.
  - لو سمحتِ اسمها طنط تفيدة!
_ هتفرق يعني!
- آه تفرق لما نتنمر على حد نتنمر بشياكة .
  _ ااااه قولتيلي ااااه.
-بس تصدقي الأحمر ياكل منها حتة، ولا البنطلون المحزق، شايفة البلوزة اللي لبساها كتلة ذنوب متحركة وربنا.
  _سيبك من دي شايفة اللي هناك دي، وعاملة شعرها أكسجين وحاطة علب الميكاب على وشها قبل ما تنزل.
  -مي، إحنا مينفعش نبقى صحاب تاني
  _يا ساتر يارب، عملتلك إيه طيب.
  - إنتِ ضيعتي صيام شهر بحاله، تعالي نمشي قبل ما أرتكب فيكِ جنا'ية.
  اتحركت تقى بعصبية ومشيت خطوتين قدام، خبطت في واحد من غير ما تاخد بالها، لفلها وقبل ما يكلمها، ردت بسرعة بصوت عالي
  - مش تفتح يا أعمى؟ ولا فاكر بحركتك دي هتشق'طني، لا فوق يا بابا ده أنا أرتكب فيك جري'مة ق'تل
  ="هتصل بيك تاني يا علاء".
بعد ما اتأكد أنه قفل معاه بصلها من فوق لتحت ورد بهدوء
= أنا اللي برضو عايز أشق'طك؟ ولا إنتِ ما صدقتِ تشوفي واحد حليوة فقولتي أما أشق'طه.
بصتله بصدمة ودهشة، قدر يقلب الموقف لصالحه
  - أنا أبص لواحد زيك؟ أنت اللي وقفت قدامي عشان أخبط فيك.
  = بالله يا أم الذكاء يا ترعة المفهومية هفكر أشق'طك إزاي وأنا بكلم في التليفون.
سكتت شوية، فمي اتكلمت بصوت ميسمعهوش غير صاحبتها
_ بيتكلم صح يخربيت غباوتك.
برقتلها تقى فسكتت التانية
  - على فكرة أنت مش من حقك تشتمني، وآه أنت فاكر نفسك مين.
  علت صوتها فجأة وقالت
  - وأنت مثلت إنك بتتكلم في التليفون عشان تعاكسني.
  علا صوته وهو بيتكلم
=إنتِ غبية يا بنتي؟ ولا بتدعي الغباء!
  - لو سمحت احترم نفسك.
  = يا شيخة أنا اللي أحترم نفسي برضو؟ قولي لنفسك وإنتِ رايحة تشق'طي في خلق الله.
  _ تقى خلاص لمي الليلة، إحنا آسفين يا صلاح... أقصد يا بشمهندس، معلش صاحبتي أعصابها فاكة شوية، عيد سعيد.
=وأنا مالي أعصابها فاكة ولا مش فاكة، أعصابها فاكة تروح على المطبخ بدل ما تضايق في الناس.
  - لأ بقى أنت اللي ناوي أجيب أجلك النهاردة.
  = تجيبي أجل مين يا قد المسطرة.
  - بصي بيقول عليا إيه!
  _ تقى اخرسي بقى، لميتِ علينا الناس، آسفة ليك يا بشمهندس، حصل خير.
مسكت مي إيدها وجرتها وراها والاتنين بيبصوا لبعض بضيق، تقى بصتله من فوق لتحت، والتاني بصلها بتحدي وعلى وشه بسمة استفزاز.
  - مي بصي بيبصلي ازاي دا قاصدها، يخربيت استفزازك، لا لا مش هقدر أسكت سبيني أروح أضربه وهو شبه ياسين كده.
  _ ينفع تمشي وإنتِ ساكتة مكانش ينفع اللي عملتيه ده، فرجتِ علينا الناس.
  - الله أنا مالي يا لمبي ما هو اللي بدأ.
  _ هو برضو؟