عِـشك الجَـنوب

بـارت 1

مِسك : كعدت ع المُـنبه الساعة 6:30 اني نصف ساعة اكمل كلشي فـ لتستغربون ، كمت غسلت وجهي وسويت سكراب وعناية سريعة للبشرة وخليت مرطب لوجهي ورحت عدلت فراشي وطلعت ملابس طبعاً اني ذوقي بسيط ملابسي اغلبية ملابسي ساده والوان هادئة المهم .. لبست قميص قصير لون بيج فاتح وبنطلون اسود وربطه ومكياج خفيف و حمره بُـني اخذت جنطة سوده و نزلت جوه صبّحت على امي و هُـمام و ضَي" زوجـة همام " وايمَن :
- صبـاح الـوَرد .
الكُل : صَباح العَـسل .
كعدت اتريك كملنه كل واحد راح على شُغلة اني وايمن رحنه سوه للجامعة وصلنه نزلت شفت الدكتور أيهم الغثيث لابس اسود بأسود بس الصراحه طالع حلو وعيونه صُـفر مدري خضر لونهن مينوصفن لـ سوء الحظ راح يدخل النه بـ ثلاث مُـحاضرات اليوم ...
_________
أيـهَم : كعدت الصبح رتبت فراشي وكمت سبحت عالسريع طلعت حضرت ملابس لبست قميص اسود وبنطلون اسود وحذاء اسود وساعـة فضّيـة نزلت صبحت على امي وابوي وبوستهم براسهم وطلعت وصلت الجامعة وگُـبل رحت للنادي اتريك وكعدت اشوف شنو عندي من مُـحاضرات مرّ الوقت صارت الساعة 9 رحت للقاعة واكف اشرح بالمحاضرة واباوع الطلاب مركـزين عدا طالب واحد ركزت على انضاره لاحضته صافن وباله مو يمي تقربت يمه
- انتَ مركز وياي ؟
- اي دكتور !
- اذا هيج كوم اشرح الي حجيته .
- اءء شسمه ءءء دكتور
- اي ! .. كوم اوكف
- من تجون للجامعة مو بس تشوفون اناقتكم للناس وتهملون دراستكم بأستثناء بعض الطلبة " ركزت انضاري على الولد " انتوا جايين تدرسون مو تكونون علاقات حُب ما اعرف شنو .. ( رفعت ايدي اشرت ع الباب تفضل اطلع بره ).
نزل راسه وطلع ورجعت اكمل شرح كملت المحاضرات وطلعت شفته واكف قريب ع القاعة باوعتله تعال وراي شوي اخذته لـ مكتبي
ايهم : بـ هدوء .. سد الباب واكعد هنا ( اشرت ع الكرسي الكدامي )
أيـهَم : أنـتَ هنا جاي تدرس لو تصادق و تحب؟
- نزل راسه بـفشله .
أيـهَم : ارفع راسك .. حبيبي اني جاي انصحك انو لتلتهي بهيج سوالف لان مراح تفيدك صدكني .
- آسـف دكتور والصراحة كلامك صحيح .
أيـهَم : تمام اتمنى متعيد الغلط !
- ابتسم .. ان شاءالله دكتور .
___________
مِسك : كملت المحاضرة ومريت من مكتب الدكتور أيهم سمعت كلامه ويه الولد كلش حَـبيت اسلوبه ويه الطلاب زين اني ليش اكرهه صح هوَ ممسويلي شي بس اني ما ادري ليش من الله ما احبه ، اجاني اتصال من هُـمام انو امي صاعد ضغطهه ومتخربطه رحت امشي سريع اريد بس اوصل فجأة انطخيت بولد ووكعن الملازم من ايدي رفعت راسي شفت دكتور ايهم عاد اني منا اعصابي تلفانه ومتوتره ..
مِسك : بـ عصبيـة .. انتَ متشوف بشر كدامك يمشي ليش تطخه ؟
أيـهَم : " شمالج بُـويه انهديتي عليه ما صار شي" .
مِسك : من كال هيج بهتت ملامحي ركزت على كلامه وابتسمت حَبيت تصرفه لو غيره جان صاح بيه لان حجيت علي .
أيـهَم : دنكت شلت الملازم شِفتهه مبتسمة ابتسمت وياهه انطيتهيا وآنـه مركّـز بـ عُيونههَ صح عيوني ملونة بس ما مركز بيهن بكد ما ركزت بـ عيونهه الملونة لونهن كُلش حلو ممزوج اخضر و عسلي و رُمُـوشهه كثيفات " اول مـره بـ حياتي اركز بـ صِفة بنية " صراحة خفت احسدهه ، مره قاري نص ( محَـروس مِنَ عيـن البشر وَ أولهم عُيوني ) بهاي اللحظة حسيت النص ينطبق عليهه .
مِسك : اني آسـفة دكتور طلعت عصبيتي عليك لان انتَ صرِت بـوجه المدفع .
أيـهَم : ضحكت ، عادي بُـويه لا تشيلين هَم .
مِسك : يله دكتور اني اترخص مستعجله .
أيـهَم : مرخوصه ، ﷲ وِيـاج .
- اليوم عندي ثلاث محاضرات وكملتهن ما بقه شي خلي ارجع للبيت وصلت للكراج اخذت السيارة ورحت للبيت ، شفت رِيمـتي تدرس بالحَـديقة كامت حضنتني و بعِدَت ..
ريم : شلونك حَـبيبي .
أيـهَم : ابتسمت ، تمام وين ابوي و امي ومُهيمن؟
ريم : ابوي ومُهيمن نايمين و امي تقره قُـرآن .
أيـهَم : كرصت خدودهه ، اوكِ رايح اشوف أُمي رجعي درسي انتِ .
- رحت اشوف امي شافتني صَـدّقِت اجيت حضتنهه وشميتهه
أيـهَم : شلونج يالغالـية؟
ام أيـهَم : الحمدلله يُمه .
أيـهَم : باوعتلهه مبتسم ، حليانه زَهـرتِي .
ام أيـهَم : ضربته على جتفه ، امشي لك بكدك آنـه تناديـني زَهـرتِي .
أيـهَم : ضحكت بستهه براسهه يله يمه راح اصعد ارتاح .
ام أيـهَم : روح يمه عود اخلي ريمه تكعدك ع العشه .
أيـهَم : صعدت لغرفتي من كثر التعب بدلت ملابسي ونمت .
________
حَـوراء : راحت مسك وحُور لـ قسمهن واني و ايمن رحنه نتمشى لـ قسمنه
ايمن : اليوم عدنه عَمَلي حتى ينطون درجات مو تقلعين اسنان العالم وهنه ما بيهن شي من هسه اذا ما تعرفين كليلي .
حـوراء : لا يابة شسالفة مو لهدرجه وبعدين اذا ما عرفت شي شنو تسويلي؟
ايمن : ابتسمت، سهله اذا سويتي مُـصيبة باوعيلي وراح اعرف .
حـوراء : ضحكت ، تمام .
- دخلنه وكل واحد كعد يطبق شغله و هوَ كدامي بدينه نشتغل فحصت المراجع جان انسه كلشي نسيت شسوي احشي لو اقلع؟ بس اسنلنه ما بيهن شي حتى اقلعهن زين هسه شصخم اكول للمراجع؟ لا لا هسه يفضحني رأساً تذكرت كلام ايمن " اذا سويتي مُـصيبة باوعيلي وراح اعرف " رفعت راسي باوعتله واني وجهي اصفر بسرعة رفع راسه نزّل الكمامه فرك وجهه بـ توتر وعض شفته سوالي حركه بأديه بـ معنى " اني اعلمج " كام عالسريع اخذ الادوات فحص المراجع مالتي شاورني ..
ايمن : يرادله جلسة تبييض بس ، لا تسوين شي زايد وتصخمين بكيفج تمام ؟
حـوراء : هزيت راسي بـ اي ورجعت اكمل شغلي بعد مُده كملنه كُلنه اجه الدكتور انطانه درجات وطلعنه واستلمني رزايل ..
ايمن : وحك عَلي عرفتج راح تجفصين بيهه بنت الاوادم ما كلتي من البداية ما راجعتي تخيلي اني مو وياج يله شسوين .
حـوراء : والله ما ادري شبيه نسيت كُلشي .
ايمن : اي خوش د انسي مرة ثانية حتى اصفكج راشدي اصحيج .  
حـوراء : بيك خير سويهه لو بس حچي .
ايمن : بداعة الحشوه الـ ردتي تسويهه .
________
حُـور : طلعت مسك ودخلت للقاعه عدنه محاضرة وحده ونطلع كعدنه كل واحد بمكانه شويه ودخل
دكتور تَـيم لابس قميص ابيض وبنطلون اسود وحذاء اسود وساعـة فضّيـة طالع حلو ..
تَيم : السـلام عـليكم .
الكُل : وعليكم السلام ورحمة الله وبركاته .
- وكف يرشحلنه ركز على ولد بصفي يباوعلي انتبهت علي بس غلست ما حسّيت غَير دكتور تيم وهوَ يمي .
تَيم : بـ حذر ، انتبهي للمُحاضرة .
رجع يكمل خلصت المحاضرة لم غراضه والطلاب طلعوا اخذت الملازم ردت اطلع رفع راسه باوعلي وكال ..
تَـيم : تعالي وراي شوي .
حُـور : تمام ،
_________________
يَـتبع ....
بـقلَم الكـاتِبة بَتـول 
عدد الكلمات " 929 "
شفتوا !! لعد شكد مدللتكم اني انطيتكم موعد ع 1/6 بس ما حبيت التأخير ونزلت قبل الموعد ، بعون الله ع الجايات اكثر وبلكي توصل 1000 كلمة .
ان شاء الله اجيكم بـ بارت ثاني ومستمرة وياكم ولا تنسون التصويت والمتابعة ..

" فـي امـان ﷲ " 🤍