ذاكرة الماء

الجزء الرابع

ذاكرة الماء

الفصل الثاني
مذكرات بلا عنوان

الجزء الرابع ...

اليوم يختلف عني دون الايام كلها اليوم احس عندي

طاقه اريد اكتب وافرغها بشي لان احس جد تعبت من كل شي يحاوطني

ويا اليوم صار اسبوعين من ولدت بنتي سنا

لكن احساس غريب ينتابني..

ماعرف.. افسرة مرت عليه الفصول الاربعه

بهل الايام ابجي واضحك واختنك وافرح

ماعرف شنو الي بيه

احس كل شي غريب عني وبس اريد ركن ابجي بي

ماعدا احساس مزعج هو احتاج الكل ومن يجي احد يمي ابتعد

وبعد اهلي عني تعبني..

احس نفسي مو الي واتمنى اتعدى هاي الفترة باسرع وقت..
لكن اني وحدي...

هم اطفال وعيال و رجال احس طاقتي بدات تنفذ
لتمنى اصرخ بوجهه مروان اكوله اني وحدي
حس بية ولو يوم واحد بحياتك ..

..
دائما ماخذة الشغل والاصدقاء والاهل واني اكون اخر محطاته

اخر محطه بعد ما الكل ياخذ منه شويه
هوايه اسأل نفسي مروان يحبني؟

لو مجرد زوجه وام لاطفاله وخدامه لأهله

اليوم احتاجيت اكتب لان احس نفسي مخنوكه حيل
كئيبة وحزينة حتى الاكل مالي نفس بي ولا شي يعدل مزاجي..

غير ابجي واذكر أشياء مرت توجع.. اريد هذا الدفتر يطلعني من الحاله بيها اني صديقه الي نصحتني كالت خلي الج دفتر مذكرات وفضفضه انفه عن نفسي بيها بس لحد هسة مترددة وخايفه احجي كل الي بداخلي..
احس احد يراقبني..
رغم اكتب ودموعي تنزل وبنتي تصرخ بجي وابني يلعب بمكايجي والغرفه هوسة بس مالي واهس شي

......
الاهتمام مطلب لا يطلب..
ولو طلب تسقط المشاعر..

الاهتمام مينطلب صعب تطلب الحب والاهتمام يجوز
غيري يشوفها طبيعي وتمشي الحياه وتمر لكن اني اشوفها صعبه.. .

صعب تكون بس مضحي وكلمة اريد واريد هي الي تحتويك من زوج وأطفال واهل اني فاقدة وجودي
اذا اوكف كدام المرايا ما اشوف نفسي اشوف مجموعه طلبات ومسؤولية متخلص ...

احس بتعب نفسي اكثر مما هو جسدي..
اني اداة عمل  و جنس فقط..

هاي حياتي غير شي ماكو..
اتوجع اتالم ماكو احد يسألني شبيج
الله شكد حلوة كلمه شبيج..
تطيب الروح والخاطر
اخذت حسرة وجعتني..

...........
سديت الدفتر.. وحسيت حسرتها بروحي نزلت
اني وين جنت عنها وهي كل هذا تعيشة وحدها
ليش ما شاركتها كل شي
ماذكر كل كلام تكوله.
ولا كتبته..
اخذت الدفتر ونزلت جوة..
بعدة يوسف نايم..
دخلت للاستقبال.. ومددت ع الكنبه..
ورجعت  اقرأ شمكتوب بمذكرات زوجتي رهف..
...
كلبت الورقه..
بالبدايه شخابيط
وخط ممفهوم..
مبين احد ديكتب سريع..
اريد افهم كم جمله ما فهمت غير اني تعبانه من الكل
ميلاد ومروان وعمتي وجهالي ونفسي كون احرك روحي واخلص..
بقيت صافن سديت الدفتر.
و فركت راسي حيل ..