.... بسم الله الرحمن الرحيم ....
_ ماذا تريدين؟
_ممن؟
_من الحياة؟
_لا شيء.. لاشيء سوى الراحه... لكن ذلك كثيرٌ جداً
......................................................................
وها هو الصباح يشرق على الجميع ولكل منهم يذهب لوجهته الشيخ جلال وأخوه عباس توجهوا إلى أربيل لاعادة اولاد اخوهم..
أما سلطان وفهد اتجهوا يحضرون الذبايح...
أما ملاك فكالعاده بالبيت ترتب البيت وتحضر الغدا ومالك وزهره بدواماتهم.. بين ما ملاك جانت تحضر الغدا اندك الباب فجأة...
ملاك // يا ساتر يا رب منو هسه يجي 🙁
لبسة العبايه والشال وطلعت فتحت الباب وشافت رجال اثنين بوجها بلبس عربي وأشكالهم مو غريبه عنها فالاخوه بينهم شبه قوي... وقطع سلسله أفكارها شيخ جلال وهو يكول..
شيخ جلال // السلام عليكم بنتي انتي ملاك جبار.. ردت ملاك
ملاك // وعليكم السلام ورحمة الله وبركاته اي نعم تفضل منو حظرتك...
شيخ جلال // بفرحه وضحكه وسع صدره اني عمج الجبير واسمي جلال وهذا عمج الثاني واسمه عباس...
تفاجأت ملاك من جيتهم بعد هذا الوقت كله صار سنتين على وفاة ابوهم دارت بعقلها هووواي افكار لكن كلمتهم بهدوء وهي تكول....
ملاك // بهدوء وكالت عفوا منك ممكن اشوف هويتك
شيخ جلال // وهو معجب بتصرفها اي صار بويه تفضلي..
قرأت الاسم وعرفت انه هم عمامها فامها ماضمت عليها شي شرحت لها كلشي عن عمامها وعاداتهم وتقاليدهم ومنو هم لكن ما جان عندها صور حتى يتعرفون بالشكل على عمامهم... ردت ملاك وكالت اعذرني عمي تفضلوا... دخلوا للبيت...
بعد ما دخلوا البيت وارتاحوا راحت تقدم لهم الضيافه صبت الشاي وصارت تقدمه لهم وبهذه الاثناء دخل مالك اليوم اجه من وقت بسبب قله دراستهم هالايام لان متجهين على الامتحانات... صار يصيح على ملاك...
مالك // ياالله ملاك.. ملوكه... ملكه.. وينج
دخل وشاف اثنين زلم تضيفهم ملاك دخل وكال السلام عليكم
كاموا الشيخ جلال وعباس وسلم عليهم مالك وكعدوا تحت استغراب مالك منو هم وشعدهم هنا وليش ملاك دخلتهم البيت وفوك هذا كله مضيفتهم وكاعده وياهم براحه ...
الشيخ وعباس // ردوا وعليكم السلام ورحمة الله وبركاته..
مالك //منو حضرتكم ما تعرفنا..
فتكلم جلال بكل هدوء يخفي داخله خوفه من رفضهم له
الشيخ جلال //اني الشيخ جلال عمك الأكبر اخو ابوك.. وهذا اخوي عباس عمك هم..
مالك بصدمه وهو يقول...
.................
فهد // سلطان شوف هذا والله شكله زين وهذا الي يمك هم ناخذهم
سلطان //اي والله زينات خل ناخذ الثالث هم اخاف نحتاجه..
أخذوا الذبايح وتحاسبوا عليهم ورجعوا بيهم للبيت..
................
الجده // كاعده ودموعها تصب على فراك ولدها جبار وقالت اه عليك يا ولدي شجان صار لو ماعارضت ابوك وسرحت بافكارها على ذلك اليوم الي تكاتل بي الشيخ أبو جلال ويه جبار..
الشيخ أبو جلال /بعصبيه / جبار اختار يا تزوج بنت عمك يا اتبرى منك. وهذا آخر كلام عندي وما ارجع بكلمتي...
جبار بصدمه // دامك راح تجبرني يابوي على الاختيار اني ما متزوج بنت عمي ولو على كص راسي مو بس طردتني... تفز الجده على ايد خديجة وهي تقول..
خديجه // على كيفج يمه اسم الله عليج شفتج شارده ودموعج على خدج وحدي الله هسه ما تشوفيهم الا جايين صح الغالي راح وكسر ضهرنا بس صاروا يمنا الأغلى منا (تقصد أولاده)
الجده/اييي يا بنيتي اييي ما أغلى من الولد الا ولد الولد...
............. ........
مالك بصدمه//عمي... عمي شنو.. وليش جايين.... شتريدون...
لحد ما سمع من قاطعه
ملاك بهدوء غريب //مالك اهدئ هذول عمامنا وقاطعها وهو يصيح بعصبيه
مالك بصياح وعصيبه // عمامنا شنو ولج شيريدون بعد ما لحكنا ننسا الي صار وعذابج هذول إخوته شبيج...
مسك ايدها وكال.. ولج ملاااااك ملاااااك شجاج يمعوده لسه ما.. قاطعت كلامه وهي تقول
ملاك //تقربت منه وكمشت ايده هي هم وهي تكول اهدئ مو نفس الشي ماراح يصير شي بس اهدئ روح جيب زهره وتعال صار وقت رجعتها...
مالك// واعوفج وياهم
ملاك// مالك اهدئ روح جيب زهره وسوي مثل ما كتلك لا تخاف اختك مو صغيره وبعدين هذول عمامنا يلا بعد اختك...
انصاع مالك لكلام ملاك وهدئ وراح يجيب زهره ولكن كل أفكاره انه عمامه يشبهون ابو بالنهايه هم نفس التربيه وراح يأذون ملاك وزهره وهذا الشي مستحيل يسمح بي..
الشيخ جلال // والله يابنت اخوي مو عارف ايش اكلج بس مستحيل نعوفكم بالغربه بالنهايه انتو دمنا ولحمنا صح صارت مشاكل جثيره بالماضي لكن صارلي سنتين ادور على ابوج ومالكيت اثر له.. وكاد يكمل كلامه لولا مقاطعه ملاك له وهي تقول..
ملاك بهدوء وحنيه //حقك علي عمي لكن الي مرينا بي مو شويه بهذه السنتين لا تأخذون على خاطركم من مالك
عباس //يابنتي متفهمين وضعكم لكن احنا أهلكم بالنهايه ممكن نشرح لكم الي صار
ملاك //والنعم منكم والله لكن عمي بعد اذنك خل يجي مالك ويصير الحجي ويه الكل وهم تتعرفون على زهره
.............
جاسر // والله يا ابن العم متشوق حتى التقي ولد عمي اكثر منك.. لكن تفكيري ياترى يتقبلونه لو لا شنو فكرتهم عنا..
قال جاسر ذلك محاوله منه لتخفيف توتره فهو أيضا متوتر من جراء ما سيحصل ليقول له ياسر..
ياسر// والله عندك حق فاتني هذا الشي ان شاء الله يتقبلون وجودنا... وكمل كل منهم شغله بشركتهم بالنهايه هم شركاء.. غير انهم اولاد عم وأكثر من ذلك..
........
دخل مالك ويا زهره الي ركضت وحضنت ملاك وملاك شبكتها وباستها بين ما كعد مالك عابس الوجه...
ملاك //اميرتي شوفي منو هنا سلمي على عمو يلا قمري..
زهره //مامي من هذول
ملاك // وهي تريد تربط زهره بعمامها.. شنو رايج تروحين تسلمين عليهم وتساليهم منو هم يلا يا حبيبة مامي...
أما مالك مستغرب من تصرفات ملاك وتقبلها لهم بهذي السرعه لما تفعل ذلك
زهره // وهي تتقدم من الشيخ جلال هلو عمو منو انت
الشيخ جلال //حضنها وباستها من خدها وراسها.. وهو يكول يبعد عمج اني عمج جلال اخو ابوج
زهره بفرح // وهي تبوس وجهه اني زهره
انصدم كل من جلال وعباس بأن اخوهم سمه بنته على اسم امهم..
عباس // زهره واني ممكن اخذ بوسه
زهره //بفرحه اكييييييد بس شنو اسمك عمو
عباس //بعد عمج اني عباس وهم اخو بابا
زهره وهي تبوسه وتحضنه //عمو انتو حلوين
فضحك الجميع على سذاجة بنت اخوهم الصغيره بالنهايه زهره ما كانت واعيه على تصرفات ابوها ويا اخوانها....
عدا ذلك الذي وجل قلبه خوف من عمامه وضهورهم المفاجئ... ليقطع هذا كلام ملاك وهي تقول
ملاك // من رخصتكم الكلام طويل اروح احضر الغدا وبعدها نحجي...
هز الكل بروسهم موافقين كلامها
غيرت ملاك لزهره وخلتها يم عمامها وإخوها بين ما تحضر الغدا وهي تحضر تفكر...
ملاك في نفسها // واخيرا بعد هذا التعب كله نرتاح وأهم شي مالك بين أهله وناسه يرتاح ادري بي خايف علينا بس هم غير مو مثله وهي تتنهد يارب قدم الي بي الخير يا رب...
وانصب الغدا وتغدا الكل وشربوا الشاي وسط مرح زهره وعمامها وشك مالك وملاك الي تعزل الغدا...
..........
زهره// عمو انت كلش حلو
الشيخ جلال //بضحكه كولي والله يعني اني هسه حلو وهو يدغدغ زهره
زهره // بضحك عالي كافي كاااافي والله ما اعيدها ههههه بطني عموووو هههههه
عباس // بسك البت راح تطك ضحك يمعود
زهره //اي والله... عمو زهره.... تطك ضحك وهي تضحك بين كلمه وكلمه....
.........
سلطان // بعد ما رجع من الدوام غير هدومه واتغدا بعد ما سلم على امه وجدته... وصعد يرتاح بغرفته وهو يفكر بابو... قرر يتصل بي اخذ التلفون وهو يدك ويكول
سلام عليكم شيخ ها طمني وصلتوا
الشيخ // الحمد لله ولدي وصلنا وباجر يلا نرجع اكو شويه سويلفات نكضيها ونرجع
سلطان بقلق //شصاير شيخ كول نجي..
الشيخ // لا بويه ما يحتاج بس حضروا أنفسكم باجر... حضرتو الذبايح...
سلطان // كلشي جاهز شيخ ولا يهمك
الشيخ // الحمد لله يلا بويه سلام
سلطان //وعليكم السلام شيخ الله وياك.. بعد ما خلص مكالمته وهو يفكر باولاد عمه ياترى يتقبلونهم او لا ونام
......................
الشيخ جلال // بعد ما حجه كل كلامه لمالك وملاك وشلون دور على ابوهم وعليهم بعد ما انقطع اتصاله بابوهم وشلون عين محامي من سنتين لهم.. وان جدهم ابو جلال جان نفسه يشوف جبار قبل لا يموت ولكن ما تحققت امنيته الاخيره ومات وهو بحسره ابنه وان جدتهم متلهفه لشوفتهم وأنهم قطعه من روحهم وامانتهم ومستحيل يتركوهم... وهذا كل الي صار يا ولدي ويشهد علي ربي ما تركت نهار ما دورت عليكم شكلت
ملاك //بهدوء ودموع على خدها وهي تحاجي مالك.. مالك يخوي خل نرجع لأهلنا وناسنا تعبنا واحنا مالنا احد وافق يخوي
مالك // بحزن وهو يمسح دموع اخته.. كافي يختي والله الدنيا كلها تحت امرج اموت وما أرفض لج طلب بس خايف عليكم
ملاك // يخوي لا تكول هيج انت السند والروح لك ترخص بس هم أهلنا ومو مثله هم والله وهسه تشوف
مالك // يوجه كلامه لعمامه خلاص هسه الوقت تأخر تفضلوا ارتاحوا وباجر الصبح ان شاء الله نتوكل..
الشيخ جلال // بفرحه ان شاء الله يا بن اخوي وما راح تندمون وهذا وعدي لك وعد الشيخ جلال....
وراح الكل لسريره يرتاح والكل تفكر شنو راح يصير الصبح وشراح يحمل لهم اليوم الجديد.. منهم القلق على من تجربه جديد وحياة مختلفه وهي ملاك.. ومنهم القلق ان تنعاد مأساة الماضي عليهم وهو مالك... ومنهم الي يفكر شلون راح يكسب ثقه اولاد اخو.. بالنهايه الشيخ جلال مو قليل هو شيخ العرب كلها وما فاته ان مالك ما وثق بي لكن الي محتار بي ليش ملاك هادئه ومالك معدومه ثقته بيهم. جلال وهو يحاجي نفسه..
الشيخ جلال // باجر نشوف شنو مشكلتكم يا ولد اخوي الله كريم اذا ما عوضتكم عن كلشي ما راح اكون الشيخ جلال.... وغط الجميع في سباتهم......
.... يتبع .......
تصويت وتعليق مايخسر ❤️
أنت تقرأ
ملاك الشيخ سلطان
Romantikالروايه باللهجه العراقيه.... 💚 روايه ليست ككل الروايات... فيها كل ماحرم الشخص منه.... دفئ العائله واجتماعها.. حب نقي طاهر... رغم البعد إجتماع... رغم الألم أفراح.... القصه.... فتاة جميلة تعتني باختها الصغيره واخاها رغم الألم الذي أصابها الا ان نقاء...
