فريسة الرعد

الحادي عشر

رقية مكنتش مستوعبة اي حاجة غير انه بيتردد في ودنها جملة مازن
(  زوجتي المصونة)

كانت رهف حاضنة ابوها وبتعيط جامد اوي وهيا نفسها مش عارفة اذا كانت بتعيط عشان ابوها واحشها ولا بتشكيله وجع قلبها بس تشتكي تقؤله ايه انها حبت رعد الانسان اللي اتجوزته غصب عنها وكانت بتتمني تهرب منه   ،  خرجت رهف من حضن ابوها ومسحت دموعها ووطت باست ايديه بحب وقعدو كلهم  فاتكلم ابوها بحزن وهو بيمسح دموعه:
طمنيني عليكي يا بنتي انتي كويسة واللي اسمه رعد ده بيعمل ايه معاكي

ابتسمت رهف بحب وقالتله وهيا بتطبطب علي ايده  :
متقلقش عليا يا بابا انا كويسة وبجد رعد طلع انسان كويس جدا غير ما كنت متخيلاه  وحاولت تطمنه وهزرت وقالتله وهيا بتغمزله طلع  واقع يا ابو رهف وانا مش واخدة بالي

ضحك جمال براحة وقالها:
الحمد لله يا بنتي كنت خايف عليكي وقاطعه مازن اللي اتكلم بأحراج وقال:

انا اسف اني بدخل بس رعد زميلي من ايام الكلية ومن قبل ما يسيب الداخلية كمان و بصراحة هو انسان اخلاقه عالية ومحترم جدا ومحدش يسمع عنه الا وشكر فيه

هز جمال راسه وقال بابتسامة:

هو بس طريقة طلبه لرهف وتفاصيل جوازه منها اللي قلقتني علي بنتي منه وابتسم اكتر وقال بفرح وهو بيبص لرقية: انت مبقتش غريب يا مازن خلاص انت بقيت من العيلة

اتصدمت رهف وبصت لرقية اللي كانت مش اقل صدمة منها  واتصدمو اكتر هما الاتنين لما ابوهم كمل كلامه وقال:

حضرة الظابط مازن طلب ايدك مني يا رقية وانا وافقت وبرضه الرأي رأيك يا بنتي:

رقية بصت لمازن اللي كان بيبصلها بتحذير انها ترفض وقالت بتردد وهيا باصة في الارض:

اللي حضرتك تشوفه يا بابا وسابتهم وجريت علي اوضتها وقامت رهف واستأذنت منهم ودخلت وراها

دخلت رهف القوضة واتفاجأت برقية بتعيط قربت منها بلهفة ورقية اول ما لقت رهف اترمت في حضنها وبقيت تعيط فسألتها رهف بقلق:

مالك يا حبيبتي في ايه ده انا قولت انتي فرحانة لما لقيتك وافقتي علي الظابط مازن

رفعت رقية وشها وقالتلها بدموع:

هو عارف اني مش عاوزاه ومش بحبه وبحب سيف بس هو بيستغلني عشان عارف اني هوافق غصب عني ليروح يقؤل لبابا علي كل حاجة

استغربت رهف وقالتلها  :
حاجة ايه انا مش فاهمة حاجة وبصت لرقية بشك وقالتلها وهيا بترفع وشها بصباعها رقية انتي مخبية عني ايه

بلعت رقية ريقها بتوتر وقالتلها:
هحكيلك كل حاجة بس ورحمة ماما يا رهف ما تلومي عليا

هزت رهف راسها بقلق وقالتلها: 
احكي