[ Unicode ]
-----------------အိမ်ပြင်ဘက်၌ မိုးဖွဲလေးများတဖွားဖွားကျနေသောအေးစိမ့်စိမ့်ရာသီဥတုနှင့်အပြိုင် ချောင်းသံတဟွတ်ဟွတ်ကစည်းချက်ကျကျထွက်နေသည့်အလား ။ အဆက်မပြတ်ကြားနေရလေ တည်တံ့ရဲ့မျက်နှာအရိပ်အကဲကလည်းပိုပိုစိုးရိမ်လာလေပင် ။ သို့သော် ကာယကံရှင်ကိုယ်တိုင်ကတော့ဘာမှမဖြစ်သလိုပဲအေးအေးလူလူရှိလှသည် ။
" ဆေးခန်းသွားရအောင် ဖေဖေ … ဒီလောက်အအေးမိပြီးနှာစေးချောင်းဆိုးနေတာ ဆေးလေးတစ်လုံးတည်းသောက်ထားရုံနဲ့တင်ပျောက်ပါ့မလား "
" အဟွတ် ! ရပါတယ်သားရယ် … ဖေဖေဘာမှဆိုးဆိုးရွားရွားမဖြစ်ဘူး … မိုးရာသီပဲကွာ ဒီရောဂါလောက်ကတော့ဖြစ်မှာပေါ့ … အဖျားလည်းကျသွားပြီဆိုတော့ အရမ်းစိတ်မပူပါနဲ့ … အဟွတ် ! ဒီဂိုဂျင်တစ်လုံးလောက်ထပ်သောက်လိုက်ရင် နောက်နေ့ဆိုကောင်းသွားမှာ … သားလုပ်စရာရှိတာဆက်လုပ်နေလေ … ဖေ့ဖေ့နားပဲတကူးတကကြီးအချိန်ပြည့်ကပ်မနေနဲ့ .. ဖေဖေအဆင်ပြေတယ် "
" အပြင်မှာမိုးတွေသည်းနေတာကိုပြတင်းပေါက်မပိတ်ပဲဆက်ထိုင်နေတာကိုး … ဖေဖေက ကလေးလည်းမဟုတ်ပဲနဲ့ အဲ့ကိစ္စနဲ့ပတ်သတ်ပြီးခနခနပြောရတာပဲ … ဖေဖေအအေးကြိုက်တာကိုသိတယ် … ဒါပေမဲ့ ကိုယ့်အသက်ကိုယ်လည်းပြန်သတိရအုံး … မတော်လို့လေဖြန်းသွားရင်ဘယ့်နှယ့်လုပ်မလဲဗျာ … ဖေဖေတို့အသက်အရွယ်ကကျန်းမာရေးကိုသေချာပိုဂရုစိုက်မှရမှာ … ဆင်ဆင်ခြင်ခြင်နေပါ ဖေဖေရယ် … မပေါ့ဆပါနဲ့လား "
ပက်လတ်ကုလားထိုင်မှာလှဲအိပ်နေသောဖေဖေ့ရဲ့ခန္ဓာကိုယ်ပေါ်သို့ဂွမ်းစောင်အညိုရောင်လေးခြုံပေးလိုက်ရင်း ဗြစ်တောက်ဗြစ်တောက်ပြောနေမိတဲ့ကျွန်တော့်အား ဖေဖေကငေးကြည့်နေသည် ။ စားပွဲပေါ်မှာလည်း စာအုပ်တွေ စာရွက်စာတမ်းတွေ ပေတံတွေ ဘောပင်တွေဖြင့်ပြည့်နှက်ကာရူပ်ပွနေတာတွေကို အလိုက်တသိပင်စီစီရီရီဖြစ်သွားအောင်သိမ်းဆည်းပေးလိုက်တော့ ဖေဖေကကုလားထိုင်ပေါ်၌ချောင်းဆိုးမပြတ်ပဲငြိမ်သက်နေဆဲ ။
" စာကြည့်ခုံမှာပဲထိုင်တာများရင်အညောင်းမိလိမ့်မယ်နော် ဖေဖေ … ဒီရက်ပိုင်း ဧည့်သည်ခန်းထဲမှာဖြစ်ဖြစ် ကျွန်တော့်အခန်းထဲမှာဖြစ်ဖြစ်လာနေမလား "
YOU ARE READING
ဝေး ( ongoing ) ေဝး
Romance[ Unicode ] ----------------- အလွမ်းရယ်မပြယ် အချစ်ကဘယ်ဆီဝယ် ဆုံမှတ်တွေလွဲဖယ် ကျီစယ်တဲ့ကြမ္မာငယ် ချစ်ပါလျှက်ဝေးစေတယ် [ Zawgyi ] ---------------- အလြမ္းရယ္မျပယ္ အခ်စ္ကဘယ္ဆီဝယ္ ဆံုမွတ္ေတြလြဲဖယ္ က်ီစယ္တဲ႕ႀကမၼာငယ္ ခ်စ္ပါလွ်က္ေဝးေစတယ္ Moon ( Owncreation...