لا اريد زوجا من لعروبية ( الجــــــــــــــــــــــــــزء الثاني) بقلم Salma Ziouan
بعد مرور عام و3 شهور
عبد الرحمان غير كيشوف فيا وساكت...كنخبط وكنضرب وكنتنفخ...ودايرة قربالة فالدار غير بوحدي!
ناض عندي جرني من ايدي وأنا كندفع فيه : بعد مني طلق مني..،ڭلسني حداه على لميدة: ناديا هادي 3 شهور جاية لربعة شهور ونتي محيحة كل مرة تجي معند دار لواليدة خصني نبدا نوجد لتقربيلتك،ونا غير ساكت وكنشوف وكنتسناك تهدري..اش كاين!
خرجت عينيا : شناهيا ؟تقربيلتي؟هيا انا دابا كنقربل وكنصدعك..
وهو مصدوم : انا قلت ليك مصدعاني؟ تي مالك تخافي ماتحشمي..انا لاحظتك كل مرة كنمشيو عند دار لواليدة كتجي مقلقة..ايلا كانت شي حاجة قوليها ليا..
يالاه بغيت نهضر وتغرغرو ليا عينيا،بغيت نوض فحالي ،عاود جرني : فين غادية تاني!
دورت وجهي : للكوزينة !
شد لي فايديا بجوج : والله لا نضتي من هنا حتى نعرف مالك؟
بقيت حادرة راسي وهو كيضغط عليا نهضر حتى نفاجرت فوجهو : هادي عام وزيادة وحنا مزوجين وباقي محملت ماولدت وكل ساعة نمشيو لداركم عند واليديك مك وخواتاتك يبداو يحشيو لي فلهدرة،ولبارح فلعشى فاش دخلت عندهم لكوزينة بداو كيلوحو لهدرة بلي انا مكنولدتش!
عبد الرحمان غمض عينيه وحدر راسو : لا حول ولا قوة الا بالله...صافي حتا نتيا ماتديش عليهم!
طلع شعري لسما : كيفاش حتا نتي ماتديش عليهم؟ بديت كنبكي ليه وهو يسكت فيا..ايلا بصح صدقت ماكنولدتش شنو غادي دير؟ غادي طلقني ياك!
ضربني على راسي : واش تسطيتي ..غادي نتزوج عليك هه وبدا كيضحك شد فكرشو وكيشوف فيا كنتغدد..
انا مابانت ليا غير قرعة لما محطوطة قدامي هزيتها حتال لفوق ونزلتها ليه على الراس حتى داخ وشد فراسو
بدا كيغوت : وا لحمقة وشدي ايديك عندك !ومتعرفيش ضحكي انا وليت نخاف شي نهار تنزلي عليا بشي مقدا تصفيها ليا! فينما نضحك معاك تفلقيني بشي حاجة!
جمعت لوقفة : ايوا باش تعلم تضحك هاد الضحك ديال الزّمَر والله وتزوج عليا اولدي عبد الرحمن يا حتا نصفيها ليك ديال بصح !
وقف بالزربة وجرني عندو..شاف ليا فعينيا ديريكت وقاليا : عاودي شنو قلتي ؟
ديك الجرة لي جرني والشوفة لي شاف فيا ونبرة صوتو خلاتني نتلف : عافاك ماتبقاش دير ليا هاكا..راه عرفتك كديرها بلعاني!
ضحك ضحكة جنب فيها استهزاء واستعلاء وثقة بالنفس : اش درت انا!
بديت كنرون فالهدرة : هاد..هادشي ،،فاش كتبدا تهدر هاكا،وكتشوف فيا هاكدا..شوف الله يرحم باك طلق مني خليني نمشي نشوف شغالي!
ايلا طلقت منك تواعديني ماتبقايش تجبدي هاد لهدرة ،وماتبقايش تشيري عليا بلي جات فايديك وليتي كتخلعيني !راه ديما كنبقا نقول مع راسي عندي اخطر لمجرمين فالدار!
حشمت وبديت كندير واحد الضحكة حشمانة وقلت ليه : واخة
حدر راسو لعندي : شنو ماسمعتش!
قلت ليه : واخة اسيدي عبد الرحمان!
مع كان شادني بالجهد بين ايديه وانا كنت مرخية غير طلقني وانا نطيح فآلارض تخطاني وبدا كيضحك، هانا خارج شوفي شغالاتك..هزيت صنضالة ونيًشت عليه جبتها ليه فالظهر طاح فلبلاصة ،ناض كيغوت : وا لمجرمة ،والمصيبة دعيتك لله!
دزت من حداه كنتمختر : خليني نقضي شغالي !وماتبقاش تلاهيني ..
يالاه خرج وتبعتي كنطل عليه بان ليا شاد فظهرو بقيت كنضحك،وسيفط لي مساج: كنبغيك المجرمة ،،!
