لابسة حوايجي وموجدة نفسيا،زهور مايقدرش راجلها يسيفطها لدارهم حيت بولادها،اما انا ماعندي ولاد،يكفي يقولي :جمعي حوايجك !
انا وجدت لكلشي،،لفضيحة لي درت كبر من راسي...تفو اش داني انا لهادشي لهلا يجيب شي دراري..انا باركة عليا غير عبد الرحمان،ولكن دابا قفرتها !
دخلت بديت كنتفتف وفمي ولا بيض بالخلعة! شفت فيه ناري طالع ليه الدم،دخل لاح السوارت فوق لميدة ديال لمرح بالجهد وشاف فيا لقاني موجدة : فين غاديا بالسلامة!
هزيت راسي : ديني لدارنا،بغيت نمشي للدار دابا!
تعصب: دار فيا واحد الشوفة ماكنحملهاش كتخلعني: اش مشيتي كديري عند العشاب
ب قيت حادرة راسي ومقدرتش نجاوب
ضرب على الطبلة بايديه : غتهدري ولا لا؟
بديت كنتلعثم : راه مشيت انا وزهيرة وبغـــ...
قاطعني : ماتقولي لياش زهيرة،انا باغي نعرف اش داك عند لعشاب وبلا خباري،طوالو ليك الرجلين!
بديت كنبكي،غوت عليا : ماتبدايش تبكي راك دايراها كبر من راسك!واش حماقيتي ولا باغية تحمقيني،اش ديك النّتْفة لي ضربتيها لداك الشيباني وقد باك اعباد الله تلاحيتي عليه ريشتيه...ماحشمتيش؟
قلت ليه : مشيت عندو على ود بغيت نولد،،عطاني شي عشوب نشربهم وماقداوش فيا!
بقا كيشوف فيا وهو مصدوم: كنتي كتشربي شي حاجة وبلا خباري،علاش ماقلتيهاش ليا،وليتي تكدبي عليا!
بديت نبكي : ديني دابا لدارنا بغيت نمشي لدارنا!
جا خدا ليا الصاك من ايدي : هادي دارك ،دخلي !
بقيت واقفة وهو دخل،،مابقاش كيهدر معايا...يوماين وهو ماكيهدرنيش،وانا غير كنبكي..
فالصباح فاش بغا يخرج مشيت عندو : حدرت راسي : سمح ليا!
عنقني: الحمد لله عتادرتي،هه انا راه مسامح ليك،وعارفك كديري هاكدا على ودّْنا بجوج،ولكن راك درتي روينة جا عندي لمقدم وقاليا السيد بغا يدعيك!مافكينا الجرة غير بزز..
خرجت فيه عينيا : شناهيا يدعيني بديت كنضحك، واقيلا ديك النتفة ماڭرات فيه والو،بغاني نمشي نعاود ليه شي وحدة خرى..جيت نهز عينيا فعبد الرحمان،لقيتو كيخنزر: الله يحفظ ،يا ربي السلامة ،فعوض تقولي نمشي نتسامح معاه باغيا تعاودي تنوضي الصداع،بغيت نعرف اش عاجبني فيك ...!
عقت براسي زدت فيه عنقتو وقلبتها ضحك : راه غير كنضحك ،تيقتي ؟ ههه يالاه الله يعاونك !
مشا وانا ماكرهتش يكون داك الشارف حدايا نتلاح عليه بشي قجة،ولكن الحمد لله تصالحت انا وعبد الرحمان..
جا لعيد ومشيت نشوف واليديا فالرباط،الله شحال توحشتهوم،،قلت لعبد الرحمان يرجع هو ويخليني مع الدار شي سيمانة،،بزز باش بغا وحتى انا كان صعيب عليا نتفرق عليه،ولكن بغيت نبقا مع الدار شوية!
تلاقيت مع صحاباتي...الصراحة لقيتهم حتا هوما تبدلو،مابقاوش ديال الدخول ولخروج والحرية...
دازت السيمانة بشوية وانا قلبي مقسوم بين عائلتي ومابين عبد الرحمان...
فاش رجعت لداري مع عبد الرحمان بحالا كنت مسافرة برات لبلاد،توحشت كلشي ...جات عندي زهور فلعشية وهي فشكل،،بحالا مخبية عليا شي حاجة..حسيت حتا انا بلي كاينة شي حاجة ،شي حاجة ماكتفرحش!
لا اريد زوجا من لعروبية ( الجزء الثاني)
البارت الخامس
على قد الفرحة لي رجعت بيها لداري والشوق قد المصيبة والالم لي كيتسناني،بقات زهور ساكتة،وكتحاول تخبي عليا بلي ماوقع والو فاش كنت مسافرة،ولكن هي لي كتحس بيا،مقدراتش تخبي عليا قالت لي: عائلة عبد الرحمان كيهدرو بغاو يزوجوه!
بقيت كنشوف وعينيا كيطيحو منهم الدموع بلامانشعر حسيت بالدينا دارت بيا،،حدرت راسي وومسحت دموعي،قصحت قلبي: من حقو يتزوج،ايلا بغاو الدراري يزوجوه!
يالاه بغات تقول ليا بيمن غيتزوج قاطعتها : مابغيتش نعرف..سولتها واش هو فخبارو شي حاجة،قالت لي ماعرفتش!
جا فالليل،حاولت نخبي لغضب ديالي،ونضحك نبين اني مسمعت والو،ولكن الجرح لي فقلبي كيكبر كلما شفت ف عينين عبد الرحمان،وكلما تخيلت انه غيكون مع وحدة اخرى من غيري..لي كنقدر نديرو هو ندخل لحمام نسد عليا..نبقا نبكي غير بوحدي وحتا واحد مايشوفني،صحتي قلالت وحالي مابقا كيعجب..!
عبد الرحمان كان فراسو كلشي وماقال ليا والو..حتا جات ختو عندي لدار..كتقولي غنخطبو لعبد الرحمان،،ولمراة الشاطرة هي لي تخطب لراجلها..وايلا كنتي تبغي راجلك وتبغي ليه لخير زوجيه وخليه حتى هو يشوف وليداتو..بقات كتهدر وانا ماعندي جواب ليها،هدرتها قصحتني وقتلاتني حتى جاتني الدوخة..
مشات وانا بقيت بحال شي وحدة بلا روح ڭالسة وكنشوف ماقدراش نهدر...كيف دخل لقاني مكونة: السلام عليكم!
ماجاوبتش وبقيت ساهية: دخل ڭلس قالي ناديا مالك !
قلت ليه : طلقني !
فهم وقالي : يهديك الله،مالك عوتاني،هاد ليامات كنتي مبدلة،ومابغيتش نسولك،قلت نخليك بخاطرك!
عاودت قلت ليه : طلقني !
تعصب : هانا خارج !
مشا وخلاني،بقيت بوحدي غير كنبكي،مشيت عند زهيرة بَتْ عندها فالدار، قلت ليها : طلبت الطلاق ومابغاش يديني لدارنا!
عنقاتني : يكون خير يكون خير!
بقيت عندها ،،درت حتى عييت ،وسولتها شكون هادي لي بغاو يخطبو ليه
حدرات راسها : بنت خالو!
بتاسمت : زكية..
جاوباتني وهي نادمة علاش قالت ليا : اه زكية!
رجعت للدار ديك الساعة،ماجاش النهار كامل،تاصلت بيه!لقيت تيليفونو مخليه فالدار..بقيت ڭاعدة نتسناه حتى جا
دخل غير شافني،فرح وضحك وجا عنقني: توحشتك ا ناديا
ماجوبتوش وماعنقتوش كيفما موالفة!
قالي : ماتقوليش ليا الطلاق !
دورت وجهي لهيه : بيمن غتزوج!
بقا ساكت : ماغاديش نتزوج!
دفعتو : كلشي فخبارو غادي تزوج ،والناس كتوجد للخطبة ولعرس ونتا كتكدب، خليتيني حتا مشيت وتافقتو من ورايا،ونتا معاهم يا لكداب يا لغدار!
تعصب وغوت عليا: ماغدرتكش وماكدبتش عليك،دارنا لي بغاو يخطبو لي زكية وانا مابغيتش لان نتي لي فقلبي ومايمكنش نخليك !
بديت كنغوت ونسب ونعاير حتى سخفت هو تعصب وخرج قالي: هانا خارج نمشي عند لخيل ،خرج وخلاني كنتحرق بوحدي ماقدرتش نصبر وانا نتبعو نبرد فيه غدايدي!
دخلت عندو شاف فيا: رجعي للدار بغيت نبقا مع لخيل بوحدي!
هدرت وعينيا كلهم دموع : غادي طلقني وايلا بغيتي تزوج تزوج،،مابغيتش نزيد معاك نهار واحد،،
مابغاش يجاوبني وبقا كيلعب مع لخيل ديالو!
زدت تعصبت : عبد الرحمان طلق من العود وجاوبني ،راه كنهدر معاك
بقا منخلني وآنا كنغوت تعصبت رجعت للدار جبت لمكحْلة ديالو لي كيتبورد بيها بغيت نخلعو بيها،،
والله وماطلقني حتا نقتل راسي!
شاف فيا وتخلع : نديا حطي داكشي من ايديك راه مامعاهش اللعب!
جا بغا يحيدها ليا بلامنحس وركت عليها وخرجتها فلْعَوْد ديالو، تسمع صوت لبارود مجهد،وتسمع صوت لعَوْد وهو كيتألم طلقتها من ايديا وحتى هو...بقا كيشوف فيا وكيسمع صوت لخيل ديالو وهو كيطيح على الارض وعينيه مغرغرين بالدموع !مقدرتش نهدر ولا نقول كلمة وحدة،، و آشمن هدرة نهدر واشمن كلام نقولو ليه ،،لخيل ديالو اعز ماعندو لي رباه على ايديه،الخيل لي انا وياه كنا اعز مافقلبو طاح قدام عينيه كيتوجع من الضربة لي انا سبابها!دار عند لخيل تحدر على ركابيه،،عنقو...كيهمس ليه فودنيه : ربي يصبرني ربي يصبرني !
بقيت واقفة مصدومة،وكنشوف،قالي بصوت ضعيف : خرجي من هنا!
لا اريد زوجا من لعروبية (الجزء الثاني)
البارت السادس
بقيت واقفة مصدومة،وكنشوف،قالي بصوت ضعيف : دخلي للدار وداوي ايديك !
حدرت عيني على ايدي،لقيتها عامرة بالدم ..محسيتش براسي تجْرحْت بالمْكحلة فاش ضْربت البَارود،ومَترْعَبتْش من شوفَة الدم..وماتْقَصحتش فايدي قد ماتْقصّحت فقلبي..من شوفة لمنظر لي قدام عيني..وقف وجرني حْتالْ الدار،دفع لباب وقالي : دخلي داوي ايديك..
بديت كنتفتف فالهدرة..دخلني وْداوا لي ايدي..داواها لي بالزربة" وهو كيتجنًب يشوف فعيني،ونا كنتنخْصَصْ..
حدر راسو وخرج،وانا بقيت كنتحرق فداك الليل بوحدي،حتى لبكا متليتش قدرت عليه
،تجمعو الناس فديك الليلة فلكوري مجموعين على الخيل وانا كندعي وكنطلب ليه بالنجاة!
طلعات الشمش وانا مازال فايقة، عينيا تنفخو ليا بالبكا..كنتسنا عبد الرحمان!
سمعت تقرقيب ديال السوارت،سمعت حسو ...بدا قلبي كيضرب ونا كنشوف فالباب ..
دخل وراسو فالارض،ماسلمش عليا،دخل وسد عليه لباب ديال لبيت، ماخرجش وانا كندق عليه ماكيجاوبش حتى خلعني،بقيت كنضرب وكنغوت وكنبكي: عبد الرحمان حل عافاك،حل لباب والله ماقصدت سمح ليا!
حل ليا لباب وشاف فيا،لقيت عينيه مازال فيهم الدموع : ايلا ابنت الناس بغيتي الطلاق مانقدرش نرغمك تبقاي معايا! من دابا شوية غيدوز عندك ولد عمي يديك لمحطة باش تمشي لداركم وبراتك غتوصل حتال عندك! ولعَوْد بقا كيتوجع من الضربة وقتلناه !
بديت كنجمع فالهدرة وكنمسح فالدموع وكنبكي : لا..ماغنمشيش،ماخنخليكش،عرفتي بغيتي تزوج غير تزوج،بزكية...اه تزوج بيها،انا ماعنديش مشكيل..دابا انا ..ميسحابليش فيها لبارود ....كنت بغيت نخلعك...والله وغلبني لبكا،جاتني الدوخة وغيبت!
حسيت بايدين عبد الرحمان شادين لي فايديا،قبل مانحل عيني كنعيط بسميتو ،حليت عيني لقيتو حدايا كيشوف فيا !
بديت كنبكي: سمح ليا ...!
عنقني ومسح لي دموعي : شووو ماتهدريش،ديري لي درتي ومنسمحش فيك
حسيت بقلبي كيضرب من جديد لشخص واحد،جا تكا حدايا بقينا ساكتين وحنا كنشوفو فعينين بعضياتنا،،حسيت بيه كيبغيني كثر ماكنتصور،انا صافي انتهيت.
جا طبيب،شافنا وبدا كيضحك قاليه : كون هاني راه لاباس عليها،غير الارهاق ولعيا هو لي دار ليها هادشي!
جاوبو عبد الرحمان: شوف عينيها 3 ايام مانعساتش!
ضحك الطبيب قاليا : ولا ابنتي خاصك تراعي لداكشي لي فكرشك،تاكلي مزيان وتشربي مزيان وترتاحي مزيان!
شفت فيه انا وعبد الرحمان: اشنو فكرشي!
الطبيب بقا غير كيشوف : راك حاملة فالشهر التالث،،!لقانا مافراسنا مايتعاود : قالينا مبروك ومشا!
دار عندي عبد الرحمان: كيقولو لمرة فاش كتكون حاملة كطلع ڭرونها لسما وكاتبدا براجلها هو لول !
خنزرت فيه وانا فالداخل ديالي طايرة بالفرحة: حشومة عليك،،،يا ربي تحفظو لينا يا ربي !
جات عندي زهرة،وعائلة عبد الرحمان وكلشي فرحان ليا،وكيعاملوني بحالة شي اميرة،،جات عندي زهيرة قالت لي : واقيلا هادو مايكونو غير لعشوب ڭرّو فيك!
بديت كنضحك : ستري ماستر الله،وماتفضحيناش،خاصني نمشي نطلب السماحة من داك الشيباني!
رجعت لدار وجات عندي ماما ڭلسات معايا،،وجابت معاها صاحبتي سلوى....وانا ماكاين غير التبوحيط وحتى من النڭير كثر فيا،حتى ولا عبد الرحمان كيطلب معايا الشرع
فاق مع 5 صباح،فطر ولبس حوايجو،ضرباتني لفيقة : عبد الرحمان؟
دار عندي: فقتي ؟ورجعي نعسي !
كنحل عينيا غير بزز ،واش اذن لفجر؟اجي شفتك لابس حويجك،فين غادي !
دار عندي غطاني ،غنمشي انا ومعاذ وايوب نجيبو لخيل لي غنشري،وواقيلا غيمشي معانا حتى أمين!
سولتو:شكون أمين؟؟
قالي : واحد ولد عمتي عمرك ماشفتيه يالاه جا من لخاريج،وجبدي عليه ياهاد لمراه وهنينا
بتاسمت :بصح،ايوا خصنا نديرو شي عراضة ،لمهم الله يجيبو ويجيبكم على خير بسلامة
سلم عليا وودعني وهو كيوصيني مانتعصبش ونبقا فالدار مع ماما وصاحبتي وماندير حتى زبلة كيلعادة...مشا وانا رجعت جبدتها عليا بنعسة حتى صبح لحال!
يتبع
