شفاه مخملية

34

[البارت الرابع والثلاثون]

"هجران"
واگفين كلنه منتظرين تحليل اهل الاستخبارات بخصوص العبوة، شويه وطلعت جواهر من داخل البيت تفاجأت هاي شعدهه هناك؟؟ اجت ناحيتنه وجهها اصفررر كركم وترجف، باوعتلي ورجعت تباوع للبيت، مچان بيه حيل اسألهه عن شي..

ماطولو الاستخبارات دقايق معدوده وطلعو يضحكون، من اجوي الولد گوة خفوا ضحكتهم.. تقدم عميد وفرك وجهه وحچة وياهم ماعرف شنو وعثمان صفن وعمو خليل گام يضرب ايد بأيد معاجبه ونسمعه يگول "يله استلمو" ودعو الشرطة واندارو علينه واحنه مصفصفات من الخوف والبرد..

اجه مرتضى گوة لازم روحه حتى ميضحك، تقدم علينه وهمس...

-مرتضى: خايبين والغسمة (والقسمه) انفضحنه

-انتصار: شلوون ولك؟؟

-حجية عطيه: شني انفضحنه ولك شهالخريط

مرتضى لزمته الضحكة لدرجة اختنگ وظلت امه تدگ ؏ ظهره، اجوي فيصل وعثمان هم خافين ضحكتهم وعثمان يمسد بلحيته وساعه يضمضم بحلگه، سألته عمه دلال شصاير، حچة بضحكة...

-عثمان: وبسطال الحمزة تخزينه

غزاله صاحت..

-شماالكم ماتحچووون!!!

-فيصل يضحك: اااخخخ يا بويه، ولكم خايبين طلعت لعبه مال جهال خرب النه

اخذتنه الجمدة والولد يضحكون ويصنفون، خو مرتضى وفيصل غصوا شگد ماضحكو، اجه عميد يهز براسه ويضرب گصته خفيف، ضحك بخجل وگال...

-عميد: لعنة الله ؏ بليسكم

الكل انفجرو بالضحك اله اني وجواهر يمكن بعدنه مصدومات من الصار، يعني كل هالمعمه والفضيحة والشرطه والعالم انخبصت بنصاص الليالي طلعت لعبه جهال مشموره ؏ بيتنه وخلصان الباتري مالتهه والضوه يروح ويجي، واليموت عثمان گال...

-عثمان: يولن والحمزة ماعرفتو شَنو اسوي من گال الضابط "ممنونين منك شيخ لان خفتو ؏ جيرانكم واهلكم ودزيتولنه خبر" خايبين غير ردت افطس وأَنا ادحگ لوجهو گوة گاظب ضحكتو

-مرتضى: اشتعل مرواان ههههههههههه

عميد ساكت ووجهه صاير احمر من المستحه، عزا حقه شنو هالموقف اليفشل اني بداله اطم روحي، دخلنه للبيت والساعه صارت بالوحده.. كلما اتذكر الموقف والخوف العشناه اموووت من الضحك اووف حتى بطني رجعت توجعني..

تفرقنه كلمن بمكانهه واني وجوري رحنه لغرفه جواهر وشهد لان بكر مموجود وفيصل وعلاوي نامو وعافو جورية.. دخلنه لغرفتهن وجوري تضحك تضحك تضحك ماتت حتى وجهها انگلب ازرگ وشهد تضحك وتصنف وياهه بَـس جواهر ساكته ووجهها مبلوع وعيونهه مدمعه..

گطعنه ضحكنه وسألت جواهر...

-شبيچ جواهر شو ساكته معقوله الموقف مضحكچ؟؟