"صباح يوم آخر"
صحيت الصباح بصوت تلفوني..صمتهٌ أول مرة وتاني مرة..المرة التالتة رديت
_ألو
=أنتِ أكيد ما ناسية إنو في دوام الليلة صح !!
فتحت عيوني مخلوعة وعاينت لرقم المٌتصل
_ما ناسية..شوية وبجهز
=عشرة دقايق بس
_طيب يا يوسف
قفلت منهٌ وبقيت أتثاءب..حاولت أصحي فاتن بس ما صحت..لبست عبايتي وإتسحبت براحه عشان أطلع من بيتهم لقيت يوسف في وشي.
_صباح الخير
=كنتِ بايتة معانا يعني !؟
_أمممم..ح أمشي أجهز فوراً وأجيك
=حاولي ما تتأخري..لأنهُ ح نمشي بالمواصلات
_ليه !؟
=العربية مع شِهاب
رجعت البيت جهزتَ نفسي وطلعت على البيت الكبير..صبحتَ على حبوبة وعيوني طبعاً بتفتش على يوسف.
_يوسف مع جدك جوا
حبوبة شاطرة شديد وكشفتني
=بس أنا ما سألت منهُ
_أمشي أمرقي..جدك كلامهُ كتير وما بخلص..بِأخركم ساي
دخلت جوا..طبعاً بيت جدو مقسم على تلات صالات..في الصالة الأولى كانوا ماف..سامعة أصواتهم بس بعيدة..شكلهم بتناقشوا..قربت من مصدر الصوت لحدي ما لمحتهم.
********************
_أنت ليه راسك قوي وما بتسمع كلامي..أنا يوم قلت شغل وتعامل مع الجماعة ديل لا...مش عشان مصلحتكم كلكم..بتكسر كلمتي ليه يا ود أحمد.
=يا حاج أنا ما كسرت كلمتك وتعاملي معاهم حدود شغل وبس لا اكتر ولا اقل..حتى المواضيع القديمة ما قاعد أفتحهها ولا هم بستجروا يفتحوها معاي.