لا تعبث معى

البِدايه♡.

●لا تعبث معي ●
كانت قاعده و في ايديها الفون و بتكتب بوست في جروب من جروبات البنات بتسأل على افضل انواع غسول للبشره الدُهنيه ، خرجت من صفحه الجروب و كانت هتقوم تاخد شاور بس لفت نظرها بوست لبنت بتقول " تعرفوا إن أسم قَرينك بيبقى إسمك بس بالعكس ، و عكس جنسيتك "
ابتسمت بسخريه على البوستات الي من النوع ده و قالت لنفسها " و الله بنات فاضيه و بتلم ريتش و خلاص ، انا قايمه اخد شاور "
دخلت و قعدت فترة في الحمام كعادتها و خرجت بس بوست القرين مكنش بيخرج من دماغها ، قررت انها تتفرج على فيلم في هدوء لوحدها عشان أعصابها تهدأ لأنها بدأت تخاف حيث إنها عايشه لوحدها في الغُربه
فتحت اللاب توب بتاعها و اتفرجت على فيلمها المُفضل بإندماج و فعلًا قدر يخليها تتلاشى الموضوع
سمعت صوت إشعار الفيس بوك و ظهر ان تم قبول البوست بتاعها
دخلت لقت كالعاده كُل بنت بتقول حاجه شكل
لفت نظرها نفس البنت الي نزلت بوست القرين ، الموضوع دخل دماغها تاني
لقت نفسها بتدخلها ماسنجر و هي بتكتب " انا معاكي في جروب ''' ، البوست بتاع القرين دة حقيقي ؟ "
و قفلت الفون و هي مش مركزه غير مع الفون منتظرة رد البنت
بعد نص ساعه تقريبًا وصلها إشعار من الماسنجر فيه رد البنت و هي بتقول " ايوة يبنتي شوفت كذا بوست عن القرين و بعدين بنهزر يعني ، انت اخدتيها جد لي ! " و كان جنب الكلام ايموجي ضحك ، مع إن الموضوع بدأ ميبقاش مضحك معاها و لكن ابتسمت بهدوء و هي بترد و تقول " انا عادتي فضوليه مش اكتر و شكرًا إنك رديتي عليا "
البنت اكتفت انها تعمل ريأكت قلب مش اكتر ، مهتمتش بس دخلت على جوجل و هي بتبحث عن معلومات القرين و فين بيعيش
طبعًا لقت كذا صفحه بتقول كلام مختلف و مش عارفه تجمع معلومه موحده ، المعلومه الوحيدة الي طلعت بيها هي * إن القرين بيعيش معاكي في كُل حته بيإذي الي يإذيكي و بيإذيكي لما تفكري إنك تإذيه *
ضمت حواجبها تدل على إستغربها و هي بتقول لنفسها " و هو انا هأذيك ازاي يعني ، هو انا بشوفك ؟ بسم الله الرحمن الرحيم "
خرجت من حديثها مع نفسها على رن فونها برقم والدتها الي في مصر
قالت والدتها بحُب و إشتياق واضح " حبيبتي ، عامله اي ؟ "
ردت هي و إبتسامتها شقت وجهها " الحمد لله ، وحشتيني جدًا .. وحشتوني كلكوا بجد "
قالت والدتها و هي بتشاور لأخوها عشان يجي يسلم على اخته " و انتِ يا سما و الله ، بتاكلي و تتغطي كويس ! اوعى تكوني بتنامي من غير عشا ، هزعل منك و الله "
قالت سما و هي بتطلب فتح الكاميرا " بصي اهو ، باكل و انا بتفرج على فيلم "
قال اخوها برخامه و هو بيبصلها بإبتسامه " و بتتفرجي على فيلم لي ؟ مش انتِ برا مصر عشان تدرسي ... روحي ذاكري يا فاشله "
ضربته والدته بخفه و هي بتقول " بس يا ولا يعني اختك مش مشتقلها ؟ "
قال بإشتياق خجول كعادته " امم ، وحشتني بس بردو مستريح منها بس للأسف مفيش حد يعمل معايا إندومي من ورا ماما "
بصت له والدته و هي بتقول بضحكه خفيفه " انا مش هزعقلك عشان انتَ غبي "
قضت معاهم وقت حلو على المُكالمه ، و قفلت بعد ما اتكلموا ساعه و الخط اضطر يقفل
دخلت تنام بس جالها جاثوم مقدرتش تتحرك ، الجاثوم طول المرة دي ، فغمضت عينيها جامد اوي
صحيت الصبح و هي بتتثاوب و جسمها تقيل و مهمد بسبب الجاثوم الي بسببه اتقلبت كتير
دخلت الحمام و النور قطع بس فتحت الشباك ينور بحيث انهم الصُبح ، دخل رمش في عينيها فقربت من مرآه الحمام و هي بتبرق جامد عشان تشوفها و تطلعها بس حست إن بؤبؤ عينيها بيوسع تدريجيًا و عينيها البُني الفاتح بدأ لونها يبقى أسود ، بعدت عن المرآه بسُرعه و هي بتنهج و حاطه ايديها على قلبها ، خرجت من الحمام لقت و هي بتتشاهد بس وقفت فجأه لما شافت النور مش مقطوع ، بصت على الحمام تاني لقت الباب مقفول و باين من الشراع النور مفتوح
شهقت بصوت و هي بتلطم و بتجري على الفون بتاعها عشان تشغل قرآن ، برقت لما لقيته فاصل ، هي فاكره انه كان مشحون امبارح !!
راحت على التلفزيون و شغلت قناه للقرآن و هي بتتشاهد ، كانت عايزه تتوضى و تصلي بس خافت تدخل الحمام فإضطرت تتوضأ في المطبخ و فرشت المصليه جنب التليفزيون و هي بتبص على الحمام ، فضلت موطيه و هي ماسكه المصليه و عينيها جت على الشراع و النور كان مقفول ...... هي مقفلتش النور !!!

(#لا_تعبث_معى  ،  #سلمى_اسامه  )
كُل سنه و انتم طيبين ، الروايه قصيره و إن شاء الله مش هتزيد عن 5 بارتات و اتمنى تتفاعلوا و تقولوا رأيكم ♥︎ .