#خادمة_الصقر
#يوستينا_سامي
26
صقر ضرب عساف جامد و وقع على الارض
صقر بعصـبية. / يا تتعامل زي البني ادمين وتقولي ايه اللي حصل ، يا متتكلمش وتطلع بره انت فاهم ولا لا
عساف قام و هو متعصب جدا وزق صقر / جالك قلب يا صقر تعملها ، جالك قلب تسلط واحد عشان يموت اخوك ..انت ايه يا اخي حيوان معندكش احساس ابدا
جاسر وكريم بصوا لبعض بصدمة وجاسر جري علي عساف و مسك ايده و بعده عن صقر
جاسر / ايه الكلام ده ... عساف اكيد في حاجه غلط المهم قولي دلوقت خالد عامل ايه .
عساف بص لصقر / ما ترد يا صقر فعلا في حاجه غلط ولا انت اللي حبيت تقــتل اخوك بس المره دي انا مش هاغطي عليك يا صقر وهاحبـسك ورحمه امي لحبسك
كريم بحده / استنى بس الاول نفهم منه وبعدين انت عرفت ازاي . ما ممكن اللي قال كدة يبقي كداب و عايز يوقع بينا
عساف بحده / الولد نفسه اتمسك وقال اللي مسلطه هو صقر الحديدي .
بص عساف لصقر / لو فاكر ان خالد ما عندوش حد يقف جنبه علشان زمان وقفنا معاك انت تبقى غلطان ، من النهارده انسي انك تعرف حد اسمه عساف وحق خالد هيجيء وهتشوف .
و خرج عساف من المكتب و كريم خرج وراه .
_____________________________________
في الفيلا عند همس ..
همس كانت قاعده في الجنينه بتشرب عصير وبتفتكر اليوم اللي قضيته مع عساف و ابوه وقد ايه هي مفتقده روح الاهل والصحاب
الداده بتاعتها/ ايه بقى يا همس من ساعه اخر الخناقه اللي حصلت بينك انت و سيادة اللواء رافضة خالص تخرجي من الفيلا او حتى تكلمي حد كده ما ينفعش يا حبيبتي
همس بدموع/ يرضيكي اللي ابويا عملوا فيا ، هو ليه طول الوقت بيعاملي زي الاطفال
الداده / يعني هو اللي ينفع انك تروحي شقه واحد انت ما تعرفيهوش ، افرضي كان عمل فيكي حاجه ده ضابط يا بنتي يعني حد مش سهل
همس / بس انا ما شفتش من عساف اي حاجه وحشه .. ده الوحيد اللي حسيت معاه اني عارفه اتعامل واتكلم .. عارفه يا داده برغم اني واخذه قرار اني لا احب ولا اتجوز اي ضابط علشان ما اكررش نفس ماساه امي ، الا اني حبيت عساف قوي من اول ما شفته .
الدادة / طيب ناويه على ايه ..ده عدلي باشا هدد وقال ان انتي لو اتعاملتي معاه تاني مش بعيد ياذيه وينقله اصلا من هنا بلاش تعملي ليه مشاكل
همس / هجرب بقي و اللي يحصل يحصل .
انا اصلا محتاجة اشوفه اوي . انا هروح له القسم
______________________________________
في المستشفي عند خالد .
نغم كانت قاعدة بتعـيط و ماسكة ايد خالد / والنبي اوعي تسيبني ده انا مصدقت لاقيتك ، يا خالد فوق بقي حرام عليك بلاش توجع قلبي ..
