▪︎المغرب - مراكش▪︎
كانت تتجري باقة بحوايج السبيطار و فيديها رضيعة صغيرة ملوية فإيزار حتى بدات تقرب من شي عمارات بعاد..جرات رجليها لتما مستنزفة آخر جهد بقا عندها حتى جلسات قدام واحد العمارة و الرضيعة بين يديها ناعسة..حطات راسها مسندة على الحيط تترد انفاسها حتى بداو عينيها يتسدو شوية بشوية و جسدها غادي و تيتفرتت حتى ولا كولو رمااد فالأرض مخلية الرضيعة تما فداك المكان لي ماعارفة عليه والو..دازو دقائق هبط واحد الرجل يمشي يتسخر فالحانوت حتى تيتصدم فاش بانت ليه بنيتة صغييرة عاد تزادت ملوية فإيزار فالأرض..تحنا دغيا هزها بصدمة و خرج تيقلب بعينيه مالقا حد و رجع دغيا طلع للشقة ديالو فين كان ساكن مع مرتو...
تفاجآت براجلها لي مدخل عليها ديك الرضيعة المسكينة و بقاو شحال تيفكرو شنو غيديرو بخصوصها حتى قررو يعتابروها هدية من عند الله و يربيوها كبنتهم لي سماوها "مريامة"...
بعد 21 سنة
فنفس العمارة لي دازو عليها السنين و العمر كانت واقفة فالكوزينة تتغسل الماعن..بيجامة نص كم بسروالها و شعرها الطويل الفايت ضهرها مطلوق..مكونسونطرية مع شغلها و تشلال الماعن حتى سمعات الدقان فالباب...
سعيدة من البيت: عفاك ا بنتي حلي الباب
مريامة: واخا ماما
مسحات يديها بالطابلية و مشات حلات الباب..استغربت فاش شافتها قدامها بنت عامرة و طويلة لابسة عليها عباية كحلة ثقيلة أصلية د الإمارات و مضورة على شعرها المطلوق زيفها..عدسات رمادية و مكياج صارخ موضح اكثر ملامحها المقادين بالبوطوكس و الفيلر...
مريامة: رجوى؟ ياك لباس؟
رجوى: بغيتك فواحد الغرض مهم
سعيدة من الداخل: دخليهاا ابنتي حشوومة تبقا ففم الباب
مريامة تنحات بملامحها المستغربين اش بغات عندها هادي و اشمن غرض مهم بالسلامة؟...دخلات حتى سلمات على سعيدة لي سولاتها على احوال الواليدة و استأذنات منها باغية تدوي مع مريامة على انفراد..ناضو حتى سدو عليهم فواحد البيت صغير فيه ناموسية د شخص واحد قديمة بفراش بنوتي فالغوز مشري من البال..ماريو الخشب ديالو حتى هو قديم كانت غرفة صغيرة يالاه هازة مولاتها..جلسات رجوى فوق الناموسية تضور راسها فالمكان: باقي هاد البيت كيفما خليتو فاش كنا صغار..ماتبدلات فيه حتى حاجة
مريامة جرات كرسي بيض د البلاستيك جلسات فوقو: هانتي تشوفي ماسهلش الله عليا بحالك نتي لي وليتي دابا عايشة حياة هاي كلاس...
أنت تقرأ
ولــــع العــــفــــريــــت❤️🔥👺|🇲🇦
Fantasy⛔ممنوووووع الإقتباااس جميع الأفكاار و الأحداااث من مخييلتي الخاصة⛔ ___________________________________________ 👺❤️🔥ولـــــــــــع العــــــفــــريـــــت❤️🔥👺 ✑𝓥𝓲𝓬𝓽𝓸𝓻𝓲𝓪 𝓚𝓪𝓮𝓵𝓲𝓷 ___________________________________________ هي فتاة بش...
