سلطان الهوى يافتنة الألفية

٢٨

٢٨
لاحول ولاقوة الا بالله
-
((شقة ياقوت وجوهرة))
جوهرة تناظر جوالها بضيقة خاطر وهو مايرد عليها من امس خرجت من شقتها بيدها جوالها وهي تبي تقابله ميلت نفسها تناظر من اعلى الدرج لتحت وهي تسمع صوت باب ينفتح اتسعت عيونها وهي تلمحه/لحظة لحظة/جرت عالدرج نازلة/
سراج وقف شوي ينتظرها ثم كمّل طريقه وهو يسمع خطواتها السريعة
جوهرة لحقته على مدخل العمارة ومسكت يده وسط انفاسها السريعة/لحظة لحظة سراج
سراج فك يدها عن يده وهو يناظرها بعتب
جوهرة تنهدت/سراج
سراج/خير ياجوهرة خير
جوهرة/ترا فهمتني غلط ياسراج
سراج قطب جبينه/فهمتك غلط!!واضح قصدك ياجوهرة مايحتاج افهمه غلط ولو انه احد غيري سمعك تقولين هالكلام عن بنته كان الحين انتي في خبر كان
جوهرة/لا ياسراج لا!!الكل يفهمني غلط الا انت!!يشهد الله ماقصدت هالامور ابدا ابدا!!
سراج تكتفت وهو يناظرها/ايه؟
جوهرة/اللي قصدته ان علا لسانها طويل واكيد رمت كلمة كعادتها واستقصدوها ذَا كل اللي قصدته ياسراج يعلم الله
سراج ناظرها بهدوء
جوهرة/كلهم يفهموني غلط كلهم يزعلون مني ولايهمني احد منهم الا انت ياسراج الا انت يااخوي
سراج زفر وبزعل بقلبه للحين/حتى ولو كان ذَا مقصدك ياجوهرة ابدا ماكان الوقت وقته
جوهرة وهي ترفع نفسها وتسلم على راسه/اسفة يااخوي اسفة حقك علي وان بغيت الحين اروح لعلا واستسمح منها ولايبقى بخاطرك شي ياسراج ولا يبقى
سراج/حصل خير حصل خير
جوهرة مسكت يده وهي تناظره بطيف دموع التمعت بعيونها/سراج؟
سراج تنهد وضمها له لثواني/الله يهديك وانا اخوك الله يهديك/تركها/توصين شي محتاجين شي انت وعيالك؟
جوهرة بابتسامة/تسلم الله يخليك لي تسلم
حاتم مر من عندهم بخطوات سريعة بدون لايوقف لهم/سلام
جوهرة كشرت بوجهها/ماشاء الله ماشاء الله طيب اقل شي سلم عالكبير مو لازم علي!!
حاتم/مستعجل
جوهرة احتدت نظرتها/نعم!!
سراج/اتركيه على راحته اتركيه
حاتم خرج
جوهرة تنهدت وهي تبلع كلامها
سراج مشى/يالله فمان الله
جوهرة ابتسمت/فمان الكريم/رجعت للبيت وقفت وهي تناظرها وارتفع حاجبها/
عليا على باب بيتها بجمبسوت احمر رسمي مخصر ع جسمها ورافعة شعرها ذيل حصان وبروج وكحل ومسكرة فقط وبيدها مبخرتها اللي غطى ريحة بخورها المكان انحنت وهي تنزلها عالارض واعتدلت بوقفتها والتقت عينها بعين جوهرة وطنشتها وهي تلف لبيتها
جوهرة تكتفت وهي واقفة قبالها/ماعندك شي تبين تقولينه؟
عليا وقفت والتفتت لها وهي تناظرها/هالكلام لي؟!!متاكدة؟!!
جوهرة/مو من حقك تطرديني من بيت ابوي ياعليا!!
عليا ضحكت/نعم!!تراه بيتي ياحلوة انتي!!واطرد اللي ابي وبكيفي!!
جوهرة ابتسمت/غلطانة ياعليا غلطانة
عليا/اذا تظنين اني مثل سحايب اسكت على خوف من سراج ولا عجايب اللي يسكتها حاتم غصب عنها فاانتي غلطانة لاتحطيني فخانتهم الله يعافيك!!
جوهرة بابتسامة كلها تهديد/مو من مصلحتك تاخذيني عدوة ياعليا
عليا غمزت لها/حلو حلو فاهمين لبعض ياجوهرة
جوهرة ارتفعت حواجبها بوسط ابتسامتها
عليا/هيا عيدي هالكلام لنفسك تمام/دخلت البيت ماانتظرت ردها وقفلت الباب/
جوهرة اختفت ابتسامتها/طيب ياعليا
.
((بيت نايف))
نايف داخل دورة المياه
ياقوت واقفة عند التسريحة وبيدها جواله وهي تميل راسها بين فترة  وفترة تسرق نظرات لباب دورة المياه وسط يديها اللي ترجف بتوتر نزلت الجوال عالتسريحة بسرعة وهي تجلس عالكرسي وتسحب عطرها ترشه
نايف خرج من دورة المياه وهو مغمض عيونه ويحرك راسه يمين ويسار بمحاولة منه يطق رقبته من التعب اللي يحس فيه وقف عندها وهو يتنهد ويفتح عيونه وانحنى يسحب عطره ويتعطر
ياقوت ناظرته باستغراب/بتروح اليوم؟!!
نايف ناظرها بالمراية بدون لايرد
ياقوت/تو اللي جيت مالك كم ساعة ارتاح اليوم مو لازم تداوم!!
نايف تنهد/اليوم موظفين جدد وترتيب جديد الامور يعني لابد من الدوام مافيها اعذار
ياقوت بنرفزة/نايف مو بلازم هالدوام شف لك شغلة ثانية
نايف تنهد بطفش ومشى بدون لايرد
ياقوت قامت ومسكته بيده توقفه/نايف!!
نايف التفت لها/خير؟!!
ياقوت/الى متى الى متى ماتسمع لي
نايف/وانتي؟
ياقوت قطبت جبينها
نايف/الى متى اسمع لك ولاتسمعين لي!!
ياقوت تناظره بنفس تقطيبتها/انا!!
نايف/هالشغل كم رقمه اللي اتركه لخاطرك!!وياليت يعجبك شي ياياقوت!!
ياقوت/بس انا ابي مصلحتك!!
نايف سحب يده منها وزفر بضحكة/مصلحتي!!انتي مو عاجبك اي شي اسويه!!حارس بنك،كاشير،سواق،/بقهر/وحتى شغلي اللي حبيته من قلبي خليتيني اتركه غصب
ياقوت بصدمة/للحين خاطرك بذيك الوظيفة!!
نايف/انتي لو اطلب منك تتركين وظيفتك بترضين اكيد ومليون بالمية لا!!
ياقوت بغبنة/ترا كلها مدرب صم بكم مو مستاهلة زعلك ذَا!!
نايف بحدة/انتي لو اشتغل وزير مابيملى عينك ابد ياياقوت
ياقوت بحدة/وهالشغلة الحين هي اللي ماليه عينك ومرضيتك!!
نايف/مايهم اذا ماليه عيني مايهمني ابدا المهم اني الحين لقيت شي اسويه وانا مرتاح ومبسوط
ياقوت/ياحسرة وين الراحة اللي تقول عنها واحنا مانشوفك!!
نايف/على كثر التعب لكن مرتاح وجدا ياياقوت وياليت تكفين ياليت ماتدخلين بشغلي مرة ثانية ياليت ماودي اقول اخر مرة احذرك!!
ياقوت بتكشيرة وقهر/بكيفك يانايف بكيفك لكن بكرة اذا طردوك لاتلوم الا نفسك
نايف/ماطلبتك تشيلين همي ياياقوت اعتقيني من تدخلك بشغلي اعتقيني!!/مشى بخطوات سريعة/
ياقوت ناظرته بقهرها ومشت بخطوات سريعة باتجاه التسريحة وجلست على كرسيها وسحبت المشط ورفعته بتمشط وحذفته وضرب بالمراية وبعيون التمعت بدموعها/كله منه كله منه الله يشغله بنفسه الله يشغله بنفسه ويحل عنا
.
((شقة حاتم))
عجايب فتحت باب الغرفة بهدوء زفرت وهي تناظر علي اللي نايم عالارض وهو رافع يده وماسك يد علا
علا متمددة عالكنبة ومتغطية بالشرشف
عجايب ابتسمت/بنجيور
علا قطبت جبينها ولا ردت
عجايب دخلت/غريبة ماعلقتي!!/انحنت وهي ترفع الشرشف عنها شوي ومسكت يد علا اللي محتضنة يد علي وتفكهم عن بعض/ارحمي المسكين ماتت يده حرام عليك
علا شدت على يد علي بملامح وجهها اللي تغيرت
عجايب ناظرتها وهي منحنية وتنهدت وهي تفك يدها بالقوة
علي كشر بوجهه
علا بدموع اجتمعت بعيونها وهي شادة على يد علي وبرجفة صوتها/لا خالة لا
عجايب فكت يد علي من يد علا وهي تمسك يد علا/شوفي المسكين حتى ماصحى ارحميه حرام والله وقومي بس تقهوي معي قومي يالله
علا/لا ماراح اتحرك من عند علي
عجايب سحبتها من يدها تجلسها/بس!!
علا جلست غصب عنها
عجايب بابتسامة/بسيطة على ماتحبين تجي القهوة لعندك كم علا عندي انا
علا وهي تسحب يدها من عجايب/ماابي قهوة ماابي شي
عجايب زفرت وهي تترك يد علا تكتفت وبنرفزتها/علا وش فيك صايرة كذا!!
علي صحى من نومه وجلس وهو يناظرهم
عجايب/اخر شي توقعته تكونين بهالخوف!!
علا ناظرتها بدموعها اللي نزلت وسط نظراتها المحتدة
عجايب بنرفزة/اخذتي وقتك امس كله بالخوف لاتصيرين ضعيفة عاد!!
علي وقف وهو يناظرها بملامح محتدة
عجايب/قومي اتحركي شوي اي شي لاتعيشين بذا الخوف وتقعدين بها طول عمرك!!
علا برجفة صوتها/وش تبيني اسوي يعني؟
عجايب/قومي لاتظلين بهالحالة واللي صار امس ماراح يتكرر ان شاء الله ابد واذا هالخوف لايتكرر نشوف لنا اي حل لكن هالقعدة ماهي بحل ابدا ابدا
علا صرخت/ردي علي وش تبيني اسوي وشو!!
عجايب/قومي انزلي نظفي البيت نطلع برا اذا تبين اهم شي هالجلسة لاتجلسينها ابدا
علا/ماابي شي ولا ابي تشيلين همي ابدا
عجايب/وبعدين تعالي وش فيك ماسالتي عن امك ابدا ولا حتى لمرة!!وش ذَا!!تراها امك ياعلا وش فيك وش صابك!!
علا بصراخ وسط دموعها/كيف اسال كيف!!باي وجه وانا السبب باللي فيها كيف!!
علي مسك عجايب من يدها بملامحه المحتدة وهو يسحبها معه بيخرج من الغرفة
عجايب تسحب يدها منه/علي اتركني علي!!
علي شاد على يدها بقوة
عجايب سحبت يدها بكل قوتها منه وبصرخة/علي!!
علي ناظرها/حتى عجايب لا لا علا لا عجايب لا
عجايب بعصبية/لا ياعلي لا!!علا لازم تشوف امك وهي اللي بتستقبلها ياعلي سمعت
علي صرخ وهو يضرب رجله بالارض/عجايب لا لا
عجايب ناظرت علا/حتى لو كرهتيني عاللي باقوله ياعلا محد يستقبل امك غيرك وذا واجب عليك واللي سوته امك تسويه اي وحدة عشان عيالها والحمدلله عدت السالفة على خير امك طيبة وانتي بعد الحمدلله طيبة باتركك الحين ترتاحين مثل ماتبين لكن شيلي هالافكار الشينة من بالك وامك انتي اول من يستقبلها سمعتي/خرجت/
علا غطت وجهها بيديها تبكي
علي يناظرها بكسرة قلبه واتجه لها وجلس جنبها وهو يناظرها/علا؟
علا مستمرة تبكي
علي تربع عالكنبة وهو يناظرها بهدوءه المعتاد
.
{الـمـسـتـشـفـى}
ام فواز مسكتها من يدها/يالله
سحايب يدها بيد امها اللي تساعدها ترفع نفسها حتى تقوم غمضت عيونها بوجع من الجرح جلست عالسرير وهي تلقط انفاسها
ام فواز/ماعليك يمّه شوي شوي وتخفين ان شاء الله
سحايب هزت راسها وبهمسها/باذن الله باذن الله
سراج دخل للغرفة وبيده باقة ورد وبابتسامته/ماشاء الله ماشاء الله الوجه منور اليوم
ام فواز ابتسمت/ايه بتروح لبيتها وعيالها
سراج اسرع بخطواته لهم ونزل الباقة على طرف السرير وهو يمسك سحايب من تحت كتفها بيمينه/اتركيها ياعمة عنك
سحايب للحين ماتعودت عليه وعلى اسلوبه الجديد رمشت باستغراب وهي تناظره
ام فواز/استريح انا بساعدها
ابو فواز دخل وبيده كيس الفطور/السلام عليكم
سراج وهو يضم سحايب عن جنبه لحضنه يوقفها وبابتسامة/وعليكم السلام والرحمة حياك ياعم حياك/ناظر ام فواز/وسحايب محد يقوم بها غيري ياخالة/مشى فيها لدورة المياه/
ام فواز سكتت وهي تناظرهم
سراج دخل فيها لدورة المياه
ابو فواز مسك ام فواز من يدها وهمس لها/مشينا يانورة خليهم براحتهم
ام فواز/وسحايب اذ
ابو فواز قاطعها/هو زوجها وادرى بها مشينا
سراج بدورة المياه قبال المغسلة فاتح الموية شوي وهو للحين محاوط سحايب بلل يده بالموية وهو يمسح وجهها بشويش
سحايب ملتزمة الهدوء وهي تناظره
سراج مد يده لوجهها بيمسحه
سحايب رفعت يدها توقفه وهي مقطبة جبينها
سراج ابتسم وهو يدف يدها بظهر كفه بشويش ويمسح وجهها/شفتك بكل حالاتك لايكون مستحية مني!!
سحايب باستغرابها همست/سراج انا
سراج قاطعها/مستكثرة علي اعوض اللي فات ياسحايب!! اتركيني ياسحايب اتركيني
سحايب ناظرته بهدوء ولاردت
.
((شقة بجاد))
بجاد بلبس دوامه متجه للباب بيخرج
منايا تمشي وراه تلحقه/لحظة شوي
بجاد التفت لها وهو مقطب جبينه/خير
منايا/متى اجازتك؟
بجاد/وليش ان شاء الله!!
منايا كشرت بوجهها/ماابي شي منك ارتاح الموضوع يخص ولدك
بجاد/وش فيه بعد؟
منايا/وده الدكتور يشتكي من صداع له كم يوم
بجاد/امنعيه من الاجهزة وبيرتاح هذا وانتي امه اعلمك!!
منايا بغيظ/وهذا اللي اقصده وده دكتور عيون يمكن صداعه من نظره
بجاد/خففي عنه الاجهزة وبيطيب ان شاء الله تبون شي بس تاخرت
منايا/انا ماابي منك شي وعيالك اسالهم/مشت/
بجاد عض شفته بغيظ ولف وهو يخرج ويقفل الباب وراه بقوة
.
((بيت ام راضي))
ام راضي تتقهوى بابتسامة
ابو راضي يتقهوى/شاورتي البنت؟
ام راضي بفرحة/وذي بها مشورة!!الرجال صيته ومركزه واصل وش تبي اكثر من كذا!!
ابو راضي بغيظ/عايشة اللي بيتزوج هي ماهو انتي!!
ام راضي كشرت/وش فيك شبيت!!انا اعرف بنتي
ابو راضي رفع صوته/عزيزة بنت ياعزيزة
ام راضي بنرفزة/وش فيك!!انا باقولها
ابو راضي/من امس والحين ماقلتي لها ووافقتي عنها وتبيني احتريك!!
ام راضي/باقولها انا وش فيك اليوم!!
ابو راضي صرخ/عزيزة!!
عزيزة وقفت عندهم ببجامتها وهي كلها نوم/صباح الخير
ام راضي بابتسامة/ياصباح النور والسرور تعالي جنبي تعالي
عزيزة دخلت وجلست جنب امها/هلا يبه بغيت شي؟
ابو راضي/بغيت شي عقب ماجلستي!!
ام راضي/لااله الا الله وش فيك علينا اليوم
ابو راضي/اسمعي يابنت خطبك واحد من الجماعة
ام راضي بحماس/ومو اي واحد عقيد وانا امك عقيد والله وفزتي وانا امك صبرتي ونلتي
عزيزة باستغراب/عقيد خطبني انا!!
ام راضي/ايه وش فيك بِسْم الله عليك كاملة والكامل الله!!
ابو راضي/عزيزة الرجال مطلق مرتين وواضح الرجال شديد وانا ابوك
عزيزة تسمعه بهدوء
ابو راضي/هو صحيح راعي فزعات وراعي واجب صيت مرجلته بكل المجالس لكن
ام راضي/ليش تحكم عليه على طول!!اذا الله ماوفقه مع بنت حلال للحين تلومه وتقول شديد!!
ابو راضي بحدة/عايشة!!
ام راضي/وذا الصدق!!
ابو راضي كتم غيظه وناظر عزيزة/والله يابنتي نويت ارده من اول ماخطب لكن مالي حق وانتي صاحبة الراي وتراه ٤٥سنة اكبر من راضي اخوك
ام راضي/ووش فيه عمره الا خلاص وصل قمة النضج و
ابو راضي/عايشة!!
ام راضي سكتت وهي تناظره بزعل
ابو راضي/مطلق قبلك ياابوك الاولة معه عشرين سنة والثانية خمس سنين وهي اللي طلبت الطلاق وكم مرة اسمعه يابنتي كلامه مابتتحملينه وانا ابوك مابتتحملينه
ام راضي ينحرق قلبها وهي تكتم كلامها
ابو راضي/معك هالاسبوع فكري واستخيري وقولي لي وش قررتي
عزيزة تنهدت/ان شاء الله ان شاء الله
ام راضي اتسعت عيونها وهي تناظرها توقعتها توافق بسرعة
ابو راضي/والله يكتب لك اللي فيه الخير وانا ابوك الله يكتبه
.
((بيت سلطان))
سجايا تمشي بخطواتها السريعة الاقرب للجري وهي خارجة من قسم الرجال متجهة لداخل البيت
ثابت يمشي وراها وجرى حتى يلحقها ومسكها على مدخل البيت ومن بين اسنانه بغبنة/صاحية انتي!!صاحية!!لاني والله اشك اشك وكثير!!
سجايا بوجهها المخطوف/تكفى قل انه نايف تكفى
ثابت/واذا نايف يعني اللي سويتيه بالمسكين حلال!!هاه!!
سجايا بتموت من كثر احراجها/خلاص ثابت يكفي اللي صار يكفي
ثابت/الله من سواد الوجه
سجايا/وانا ايش ذنبي احسبه انت!!وش دراني ان فيه غيرك!!
ثابت بابتسامة قهر/لا والله!!وش قايل لك انا البارح هاه وانا ادري بحركاتك ذي!!وش قايل؟!!
سجايا/قلت بتخمدون برا ماقلت ان فيه احد داخل غيرك!!
ثابت/الحين الغلط علي يعني!!
سجايا/افهمها زي ماتبي بس روح وجيب خبز روح
ثابت باحراج مثلها/كيف اروح الحين هاه كيف ارجع عنده قولي لي
سجايا/بتجيب خبز ولا لا بتجيب بتجيب؟
ثابت اتسعت عيونه/ذَا اللي هامك الحين!!
سجايا/تبيني اقول لسلطان يعني هاه؟اقوله اقوله؟!!
ثابت وهو يناظرها بغيظ مايقدر يسوي لها شي/اااه منك ااااه/رجع طريقه للمجلس بخطوات سريعة/
سجايا اتجهت للمطبخ بوجهها المتغير ودخلت وهي تسحب لها كوب وتشرب موية من البرادة
ذهب ناظرتها باستغراب وهي منتبهة لملامحها/وش فيك؟!!
سجايا نزلت الكوب عالطاولة بقوة/بتموتون يعني بدون خبز هاه بتموتون؟
ذهب/بِسْم الله!!خير وش صاير؟
سجايا/انا رايحة لجدتي تبين مني شي انا عندها/مشت/
ذهب/اعوذ بالله من الشيطان وش فيها ذي!!
.
فتنة فتحت باب غرفة النوم بشويش ودخلت قطبت جبينها وهي ماتشوفه عالسرير اتجهت لدورة المياه وهي تقرب اذنها من الباب وماسمعت صوت دقت الباب وفتحته بشويش باستغراب ولا شافته خرجت من غرفة النوم واتجهت بخطوات سريعة لغرفة الجدة سدول وذا المكان الوحيد اللي فكرت فيه ابتسمت وهي تسمع صوت الجدة سدول
الجدة سدول تغني بصوت واضح فيه النوم/وسليطين تسلطن على قليبي تسلطن
فتنة وقفت عالباب وهي تناظرهم
سلطان متمدد وراسه بحضن جدته
الجدة سدول تمسح على راسه/تحنيت لعينه ولعينه افداهم..
سلطان مسك يدها وهو يسحبها ويبوس كفها/عسى هاليديات ماتمسها النار لكن وين المرقوق ياجدة مااشم ريحته؟
فتنة دخلت/ابشر من عـيـونـي ماطلبت شي
سلطان رفع نظره لها بابتسامة
فتنة انحنت وهي تسلم على راس الجدة سدول
الجدة سدول بابتسامة/ياعسى تسلم هالعيون يـافـتـنـة لكن انا اللي بأسويه لسلطان يـافـتـنـة
فتنة جلست قبال الجدة سدول وهي تمسك يدها تمسجها/ارتاحي ياجدة ارتاحي وش لك بالمرقوق وتعبه انا باسويه وتذوقينه من يدي
سلطان كشر بوجهه/لا ياسدول لا وعد الحر دين ولا؟
فتنة قطبت جبينها باستغراب منه/اترك جدتي ترتاح
سلطان يناظرها/مرتاحة جدتي وانا اعرفها/رفع عينه للجدة سدول/ولا ياجدة؟
الجدة سدول/الحمدلله من فضل الله علي
سلطان ناظر فتنة بتاكيد/سمعتي!!
فتنة رمشت باستغراب من اسلوبه ولاردت
سجايا وقفت عندهم بتكشيرة/جدة تبين شي؟
الجدة سدول/بِسْم الله!!وش فيك تقول ذابحة لك احد!!
سجايا/ثابت بيروح يجيب خبز تبين شي من البقالة؟
الجدة سدول وهي تدخل يدها بجيبها/ايه ايه ابي
سلطان جلس وهو يناظر سجايا باستغراب/وش فيك؟
سجايا ارتفع حاجبها/مافيه شي ليش؟
سلطان/بس اسأل
سجايا/تبي شي انت بعد؟وانتي فتنة؟
فتنة/تسلمين ماتقصرين
الجدة سدول/تعالي تعالي
سجايا جلست عندها جنب فتنة
الجدة سدول/هاتي يدك
سجايا مدت يدها
الجدة سدول حطت الفلوس بيد سجايا وقفلت يد سجايا عالفلوس/اشتروا لكم بلاويكم اللي دايم تبلعونها
سجايا ابتسمت وهي تناظر المبلغ كشرت/جدة!!عشرين وش تسوي!!
سلطان كتم ضحكته
فتنة ابتسمت
الجدة سدول عضت شفتها للحظة/اوص اوص تكفي جيش ياللي عينك ضيقة!!
سجايا/والجيش ذَا عسى بس جندي واحد؟
الجدة سدول/اهبي يالظالمة كرتون سنتوب وكيس فشفاش يكفي قبيلة روحي بس
سجايا بتكشيرتها/جدة اشوف الجيش نقص وصار قبيلة!!
الجدة سدول ضربتها بخفة على راسها/تاخذينها وتقولين الحمدلله ولا اخذها انا وترجع لي قروشي؟/مدت يدها لها/
سجايا فزت وهي تبعد عن جدتها/خلاص خلاص الشكوى لله/رفعت جوالها وهي تفتحه وتفتح السناب/خليني اوثق اللحظة وتموت عجايب من الغبنة
الجدة سدول بتهديد/لاتخليني اذا جت اعطيها اربعين
سجايا التفتت لها/عطيني اربعينها وخذي عشرينك ياجدة
الجدة سدول مدت يدها/هاتي
سجايا مدت يدها بتردد/ماتاخذينها وتطرديني؟
الجدة سدول مسكت طرف العشرين/فطينة بِسْم الله عليك
سجايا سحبتها بسرعة وهي تبعد/لا والله ماتاخذينها!!
سلطان ضحك/عطي جدتي العشرين واعطيك مية تعالي
الجدة سدول بنرفزة/اعقب تعصيها علي!!
سلطان/ماتسوى ياجدة هوشة على عشرين!!ماتسوى والله!!
سجايا من عند الباب/العمل مو عالعشرين العمل عاللي دافع العشرين يفرق الموضوع كثير كثير جداا
الجدة سدول بعصبية/وجداجد تملى فراشك بالليل قولي امين اللي يسمعك يقول مكلفة اصرف عليك!!
فتنة تناظرهم بصدمة وهي ملتزمة الهدوء
سجايا/اي والله ملزومة مو انا بنت ولدك!!
الجدة سدول وهي تعتدل بتوقف/والله لاربيك اجل تعالي تعالي
سجايا جرت/ثاااابت
سلطان ضحك وهو يمسك جدته من يدها يجلسها/اتركيها ياجدة اتركيها وابشري بالعوض
الجدة سدول سحبت يدها/ماابي العوض ابي لسانها هي والمقرودة الثانية ذبحوني هالثنتين مااقول الا الله يرضى عليك ياذهب انتي وسدول دوا دوا يوم الاوادم دوا
سلطان باس راسها/ابشري ياجدة اخذ حقك ابشري لكن قليبك يطاوعك
الجدة سدول تنحنحت/ايه ايه يطاوعني وش عليك
سلطان ضحك/والله ياخوفي ارجع طريقي للمستشفى اول ماامسكها من اذنها
فتنة تناظرهم بابتسامة وقفت وهي تناظر جوالها يهتز بيدها/عن اذنكم اجهز الفطور
الجدة سدول/قولي لهم يساعدونك لاتسوينه لحالك سمعتي
فتنة/ان شاء الله ان شاء الله/خرجت/
الجدة سدول مسكت سلطان من اذنه وشدته
سلطان اتسعت عيونه وهو يمسك يد جدته/جدة جدة تكلمي اذني ابيها والله ابيها
الجدة سدول/ويوم تبيها وش ذَا العلوم الماصخة هاه؟!!
سلطان/وش فيه!!وش سويت!!
الجدة سدول/انت اللي وش فيك عالمسكينة هاه وش فيك!!ضاع عقلك مع طيحتك!!
سلطان وهو يفك يدها عن اذنه ويبوسها/مافينا شي ياجدة مافينا شي!!
الجدة سدول/وش فيك اكلتها فيني هاه هاه
سلطان/يتهيأ لك ياجدة يتهيأ لك
الجدة سدول/سليطين اكبر اكبر اترك حركات المبزرة عنك
سلطان ابتسم/ياليتني فتنة واشوفك تدافعين عني
الجدة سدول/البنية رهيفة على طرف ماتقول هه قل الحمدلله اللي رزقك وحدة مثلها
سلطان بعناد لجدته/وانا!!ورا ماتقولين الحمدلله اللي رزقها واحد مثلي!!
الجدة سدول/سلطاااان
سلطان بنفس نبرتها/عيون سلطاااان
الجدة سدول تنهدت/الله يعينها عليك قل امين
سلطان ضحك/والله يعيني عليها قولي امين
الجدة سدول/ويخلف عليها بخير والله ان عقل البنية بيروح منها منك
سلطان بابتسامة/والله انا اللي عقله بيروح منه منها
الجدة سدول ضربته على كتفه/اثقل ياولد اثقل!!
سلطان ضحك وهو يمسك كتفه/ثقيل انا ثقيل وش فيك علي!!
الجدة سدول/مفارقك الثقل وهاذي علومك مفارقك!!
.
بدر واقف ورا باب المجلس وبيده جواله يتصل لها وماسك جنبه من الالم
ثابت مر من الباب بخطوات سريعة وهو يخرج ولا انتبه له
بدر تنهد وعذره وهو فاهم وضعه خرج من المجلس واتجه لدورة المياه اللي مقابلته بالضبط وقف عند المغسلة اللي برا وهو يفتح الموية وينحني يغسل وجهه
فتنة وقفت وراه وهي تضربه على كتفه/سلام
بدر فز بفجعة وهو يبعد/بِسْم الله
فتنة ناظرته باستغراب/وش فيك!!
بدر تنهد/الحمدلله هذا انتي
فتنة بشك/بدر وش مسوي؟
بدر/ماحسيتي بهزة ارضية اليوم
فتنة وهي تمد يدها لوجه تلمسه/وش فيك لايكون مصخن!!
بدر دف يدها بشويش/والله يااخوك احسب اني بحلم يوم سمعت الصوت لكن جتني هزة بدل ماهي من تحتي جت من جنبي زلزلتني ماخلت سماي سما ولا ارضي ارض!!
فتنة/والله ماانت بصاحي اليوم!!
بدر تنهد/لاتضحكين علي
فتنة هزت راسها بايه/طيب؟
بدر/حصلت لي شوتة محترمة شالتني من سابع احلامي لارض الواقع المر
فتنة ضحكت/مين ذَا اللي يشوت بدر!!
بدر/مـاهـو من ذَا مين ذي؟
فتنة قطبت جبينها/نعم!!
بدر/اي والله!!
فتنة كشرت بوجهها/بدر عيب عليك!!
بدر/وش العيب!!اني اقولك شاتتني بنت!!
فتنة/الظاهر للحين تحلم ادخل ادخل وانا اختك اتروش وتصحصح زين
بدر رفع تيشيرته/هاه هاه شوفي حتى حرارة الشوتة للحين مابردت!!
فتنة ناظرت جنبه الاحمر/اكيد قرصة او انت متحسس خل عنك بس
بدر بقهر من تكذيبها له/فتنة!!
فتنة هزت راسها/خلاص خلاص صدقتك
بدر/فتنة!!!بزر انا تمشيني عنك!!
فتنة وهي ترجع بخطواتها لورا/والله بعد اللي سمعته مااستبعد
بدر بوسع عيونه/نعممم!!!
فتنة جرت
بدر جرى وراها
فتنة وقفت ورا الباب الفاصل بين داخل البيت وقسم الرجال وهي تحرك حواجبها وتضحك/وش فيك تعال تعال
بدر/والله ومستقوية يابنت!!تعالي هينا طيب وتحدي
فتنة وهي تلعب بطرف شعرها/ترا كلها خطوة تعال ولا تخاف يجيك زلزال من جديد
بدر كشر بوجهه/انا الغلطان اللي اقولك!!احسبك تغيرتي لكن هذا انتي مثل ماانتي!!
فتنة حركت حواجبها فوق وتحت له وبشماتة/ماتغيرني الظروف تغيرني الشوتات!!/ضحكت/
بدر بغيظ/انا الحمار اللي واقف اتكلم معك للحين وانتي تطقطقين
فتنة رفعت يدها/الحمدلله اعترفت انا ماقلت شي!!
بدر جرى لها
فتنة جرت لداخل البيت وهي تصرخ صرخة مكتومة/ايييييي!!
بدر وقف عالباب وهو يناظرها تدخل داخل تنهد بابتسامة ورجع طريقه دخل للمجلس ياخذ له غيار وقطب جبينه وهو يناظر شاشة جواله تنور اتجه له واستغرب من صاحب الاتصال بهالوقت!!
.
((بيت الـعـم يُسر))
سعد دخل للبيت حتى ياخذ غرض من غرفته وضربت ريحة القهوة براسه من شمها واتجه مباشرة للمطبخ
مريم بالمطبخ تجهز القهوة والفطور وهي تهمهم
سعد/الله يبيح هاليدين قولي امين
مريم معطيته ظهرها قبال الفرن ابتسمت وهي تسمع صوته/حياك ابوك معك؟
سعد/الحين سحبتي على دعوتي وسألني عن الشايب!!
مريم/الله لايخليني منه هالشايب وش يضرك انت!!
سعد بضيقة/مريوم وش صار عالسالفة؟
مريم قطبت جبينها وهي تلتفت له/وش سالفته؟
سعد/تدرين وش سالفته؟
مريم ابتسمت وهي تلف للفرن وتنحني تفتحه/ايه لقيتها لقيت بنت الحلال!!
سعد اتسعت عيونه/هاه!!مسرع!!
مريم/الله يهديك يعني ذَا سوال!!هذا انت جاوبت على روحك!!
سعد تنهد براحة/الحمدلله
مريم وهي تخرج الصينية وتقفل الفرن/الحمدلله الف لكن اصرف ابوك مرة مرتين وبعدين وش بتسوي؟
سعد/الى وقتها يصير خير ان شاء الله
مريم/الله يسترها عليك وانا عمتك الله يسترها
سعد/ربي بيسترها علي ان شاء الله دام اني ماتبليت بنات الناس
مريم تنهدت/اقول بس لاتمشي اصبر الى مااجهز الفتة وخذها لابوك خله يفطر
سعد/اهم شي القهوة الفتة لاحقين عليها
مريم/الليلة العشا؟
سعد/ايه اكيد
مريم/على خير ان شاء الله على خير
.
فتنة دخلت للمطبخ بخطواتها السريعة وسط انفاسها الاسرع وهي تبطي هالخطوات بابتسامة على وجهها
ذهب تناظرها باستغراب وهي تجهز الفطور وبنفسها/سجايا والحين فتنة!!
فتنة باحراج/بس حركات اخوي وتعرفين كيف الاخوان
ذهب ابتسمت/خذي راحتك اصلا قبل شوي سجايا مي بصاحية جت من المجلس وتهاوشني وانا ماسويت شي!!
فتنة وهي تربط الموضوع بصدمة/من جدك!!
ذهب/والله مدري وش فيها!!
فتنة ضحكت/سالفة الزلزال صدق!!/اخذت ملعقة ووقفت جنبها تساعدها بالتجهيز/
ذهب قطبت جبينها/بِسْم الله علينا وش زلزاله!!
سجايا وقفت على باب المطبخ بتكشيرة
ذهب/خير وش فيه الحين؟
سجايا ناظرت فتنة/سلطان يبيك
ذهب/روحي شوفيه انا وسجايا نكمل الباقي
سجايا سحبت الملعقة من يد فتنة/ترا راح لغرفتكم
فتنة باحراج منهم/سامحوني والله المفروض انتم اللي ترتاحون وانـ
ذهب قاطعتها/روحي بس له شوفيه واتركي هالكلام مابيننا
سجايا وهي تشتغل/ماعليك ياشيخة المرة الجاية ناخذ حقنا لاتخافين
ذهب/سجايا!!
سجايا/وش فيك!!
فتنة ابتسمت/على راحتك خذيه متى ماتحبين
ذهب/ماعليك منها ترا سجايا كذا طبعها
سجايا/روحي روحي لسلطان بس روحي
فتنة تنهدت بابتسامة/عن اذنكم/مشت من عندهم واتجهت لغرفتهم دخلت وشهقت بفجعة/
سلطان واقف ورا الباب واول مافتحته ودخلت مد يمينه وهو يمسك يدها ويسحبها له/
فتنة بفجعتها/بِسْم الله!!
سلطان سحبها لحضنه وضمها وبزعله/ترا للحين زعلان
فتنة وهي تاخذ نفس/فجعتني طيب
سلطان بعدم اهتمام/للحين زعلان
فتنة تنهدت بابتسامة وهي تحاوطه من وسطه بيديها/وليش سلطاني زعلان؟
سلطان استانس من ردة فعلها وكتم هالوناسة وهو يكمل زعله/راسي يوجعني من صحيت
فتنة/تفطر وتاخذ دواك وتخف
سلطان/راسي مايوجعني من الجرح
فتنة قطبت جبينها وهي تتركه/من ايش طيب؟
سلطان ضمها له/راسي يوجعني من ضيقة صدري
فتنة/كيف؟!!
سلطان/ابي علاج ضيقتي عشان يفك راسي
فتنة رفعت راسها له وهي تتكي بطرف فكها على نهاية صدره تناظره بنص عين وسط شكوكها/ووش علاجك
سلطان ابتسم/انتي كريمة وانا استاهل
فتنة نغزته من جنبه الايمن بطرف اصبعها
سلطان تركها وهو يمسك جنبه بصدمة من حركتها بوسع عيونه/اااه!!
فتنة/وحركاتك قدام جدتي عشان هالعلاج
سلطان يضيع الموضوع مسك راسه/اااه صداع بموت
فتنة تكتفت وبتكذيب/والله!!
سلطان غمض عيونه/اااه يالصداع اااه!!
فتنة ابتسمت وهي تناظر حركاته رفعت نفسها على اطراف اصابعها وهي تمسكه من تيشيرته وتسحبه لها وطبعت بوسة سريعة على خده
سلطان فتح عيونه وهو يحاوطها بيديه قبل تتركه/ذي نص حبة الدوا ابي باقي الحبة
فتنة وهي تتحرك بين يديه تفك نفسها/ذَا علاجك ماعندي غيره
سلطان شد عليها بحضنه/لا لا مايكفي
فتنة بضحكة/اتركني ماعندي غيرها مافيه
سلطان بضحكة/لا والله ماتروحين وين بتروحين مني
فتنة انخطف وجهها وهدت وهي تسمع نفس جملته وينعاد الموقف بعينها
سلطان/ماتروحين الا وانا اخذ اللي ابيه منك
فتنة غرقت عيونها دموع بدون اي حركة بين احضانه
سلطان استغرب هدوءها نزل نظره لها وانصدم وهو يناظر دموعها
فتنة هلت دموعها وارتخى جسمها ماعاد تشيلها رجولها
سلطان شد عليها بيديه يضمها بعدم استيعاب/بِسْم الله وش فيك فتنة وش فيك؟ردي علي!!
فتنة انهارت تشاهق بين يديه بدون اي رد منها
سلطان جلس بمكانه وهي بحضنه يمسح على راسها
فتنة تنتفض بين يديه
سلطان بهدوء/بِسْم الله عليك بِسْم الله يـافـتـنـة بِسْم الله
.
فواز يسوق سيارته بوسط صمته وصوت الراديو اللي غطى هدوء سيارته رد بابتسامة بعد مارن جواله/ياهلا والله ياهلا ارحب
راضي/الله يسلمك وين الناس ياابن الحلال لك فقدة
فواز/ماتفقد غالي يارجال بس تعرف تجهيزات المعرض وترميمه يبي له وقت
راضي/وانا أعين وأعاون يااخوك ولا به كلام ثاني؟
فواز/استغفر الله العظيم لاثاني ولا ثالث رايتك بيضا ماتقصر لكن هالمرة غير عشنا وعرفنا كيف يمشي السوق
راضي كشر بوجهه من ضيقه/ولو نظل حنا راعين الاولة يافواز
فواز/بلاشك ولا ريب راعي الاولة والتالية وين نطلع من جمايلك
راضي/تراني موجود لايغض طرفك عني
فواز/تسلم تسلم عسى الله يديمك ذخر تسلم
راضي/اقول تعال تقهوى معي من تركت المعرض ومسكت هالعقار وانا بلحالي ماش الجلسة بدونك ماتسوى
فواز ابتسم/والله ودي ولا لي الخاطر بردك ابد لكن طالع برا المنطقة
راضي قطب جبينه/عسى ماشر!!
فواز/لا بس ام علي تعبانة شوي و ودي اسلم عليها اتحمد لها بالسلامة
راضي/الله يكتب اجرك ماتقصر
فواز/حق وواجب
راضي/اصبر وانا اخوك على ماتشوف اصبر
فواز تنهد بضيق وهو فاهمه/الله يشفيها بس وكل شي يهون كل شي يهون
راضي/اجل استودعك الله وانتبه بالطريق
فواز/ابشر ابشر فمان الله/قفل وتنهد وسط تفكيره القلق من استقبال اهله له/
.
((شقة سراج))
سراج فتح باب بيته/حياك ياعم تفضل تفضل الله يحييك بيتك تفضل
ابو فواز دخل/بِسْم الله
سراج اسرع بخطواته راجع لام فواز اللي وراهم وسانده سحايب ومسك سحايب عنها/اتركيها عنك ياخالة حياك حياك تفضلي
ام فواز اتجهت للبيت بدون جدال وهي ماتبي تتعب سحايب بالوقفة/الله يحييك ياولدي الله يحييك/دخلت/
سراج دخل وهو يساعد سحايب جلسها عالسرير الي مجهزة بزاوية الصالةوانحنى ورفع رجولها عالسرير بشويش ثم اعتدل بوقفته/بروح اجيب العيال
ابو فواز/استريح اتصلت بام حازم الحين يجون ارتاح
سراج/اجل استاذنكم شوي/اتجه لداخل البيت/
سحايب/قلت لهم يجون يبه؟
ابو فواز/قلت قلت الحين بتجي ومعها العيال تطمني
سحايب التفتت للباب بشوق لعيالها وهي تسمع اصواتهم الواضحة برا
ام فواز/شوي شوي لاتتحركين غلط وتنسين جرحك يابنت
سحايب/مااقدر يمّه قلبي متشقق عليهم والله
ام فواز وقفت وهي تتجه لها وتجلس جنبها عالسرير/الحين يدخلون اصبري بس
عفاف دخلت بانفاسها السريعة
عزام وقف وراها
عفاف صرخت/ماما!!/جرت لامها/
عزام وراها بصراخ/ماما
ام فواز مسكتهم الاثنين/هاه هذا اول الغيث اللي بيرجعك طريقك للمستشفى
سحايب بابتسامة شقت وجهها نست معها المها/ياروح ماما انتي وهو 
ام فواز وهي تنزل عزام/روح لجدك
ابو فواز/تعال تعال ياعزام
عزام وقف بمكانه بعناد وسط كسرة خاطره
ام فواز ماسكة عفاف/بشويش سلمي على امك سمعتي بشويش
سحايب ضمت عفاف بجهة يسارها وهي تسلم عليها/ياروح ماما انتي ياروحي
ام فواز نزلت عفاف وهي ترفع عزام لسحايب
عليا بعبايتها من ورا الباب وبين يديها ضيافة/الحمدلله على سلامتك ياام علي خطاك السو اجر وعافية
ام فواز اشرت لابو فواز يتحرك من مكانه لعند سحايب وهي تتجه لها
ابو فواز جلس عند سحايب وهو يسحب عنها عزام
ام فواز اتجهت لها/الله يسلم قلبك ويعافيك ياعليا
عليا مدت لها الضيافة بابتسامة/الحمدلله على سلامتها ياام سلطان قرت عيونكم بسلامتها
ام فواز اخذتها/الله يسلمك كثر الله خيرك كلفتي على عمرك
عليا/مامن كلافة حنا اهل
ام فواز/تفضلي حياك حياك
عليا/خليها ترتاح الحين مرة ثانية ان شاء الله والجايات اكثر
حازم مر من جنبهم وبيديه ضيافة ورزان وفيصل وراه/السلام عليكم
ام فواز/روح لجدك روح داخل
حازم كمّل طريقه واتبعوه اخوانه
عجايب وقفت عندهم/السلام عليكم/سلمت على راس امها واخذت اللي بيديها ودخلت/
ام فواز انصدمت من ردة فعلها
عليا بربكة/فمان الله ياام سلطان فمان الله/لفت بتمش وقفت وهي تبتسم تناظرهم/كيفكم ياعيال عساكم بخير
//علا وعلي وعاصم قبالها//
علا ماردت ومشت وهي تسحب علي
عاصم/الحمدلله طيبين/اسرع بخطواته ورا اخوانه/
عليا كملت طريقها لبيتها
ام فواز صدع راسها من تصرفاتهم
علا وقفت قبال جدتها وسلمت عليها
ام فواز سكتت وهي ودها تعاتبهم ابتسمت بحب من احتضنها
علي حاوطها بيديه وضمها له بقوة
علا وقفت على باب الصالة وهي مادخلت تسمع صوت ابوها وجدها وامها واخوانها تحس برجفة بعظامها
علي وقف عندها يناظرها
عاصم قفل الباب واتجه مع جدته للصالة ودخلوا
ام فواز/تعالوا وش فيكم!!
عاصم سلم على امه وتحمد لها بالسلامة
ام فواز/علا علي!!
عجايب جالسة جنب ابوها بزاوية بعيدة عن عين سراج تنهدت وهي توقف واتجهت لهم
علي احتدت نظرته وهو يطالعها
عجايب بهمس/علي سلم على امك؟
علي ناظر علا
عجايب/روح ياعلي روح!!
علا ناظرته/روح علي انا وراك الحين
علي ناظر عجايب لثواني ثم دخل
عجايب ناظرت علا/علا
علا تفرك يديها ببعض بتوتر/ادري ادري خلاص ياخالة خلاص!!
عجايب/المفروض انك استقبلتيها
علا ناظرتها بحدة/خالة!!
عجايب/بكيفك ياعلا بكيفك/دخلت للصالة/
علا اخذت نفس ودخلت ورا خالتها على طول حتى ماتهون وطاحت عينها على امها امها الحبيبة الطيبة اللي تفديها بروحها تتحمل الظلم والعذاب عشانهم ولاااحد تحمل كثرها لخاطرهم غرقت عيونها دموع واخذت نفس وهي تتامل تفاصيل وجهها اللي للحين واضح عليه اثار التعب رغم الابتسامة المرتسمة على هالوجه
سحايب وهي ماسكة يد علي بين يديها/ياروح امك اكلت اليوم؟
علي بغيظ وهو يناظر عجايب/يمّه عجايب هواش علا
//الكل انصدم والتفت لعجايب//
ابو فواز ناظر عجايب وهمس/وش مسوية انتي!!
عجايب/ماسويت شي وبعدين انا وعلا دايم نتهاوش عادي!!
ابو فواز زفر وهو يناظرها بشك
سحايب ناظرت علا وابتسمت/علا!!وش فيك يمّه تعالي تعالي
علا مشت لها وهي تحبس دموعها وسلمت على راسها ويدها وبرجفة صوتها بدون لاتناظرها/الحمدلله على سلامتك يمّه
سحايب سحبت علا لحضنها/بِسْم الله عليك ياروح امك بِسْم الله عليك اكيد انفجعتي ياعيني اكيد بِسْم الله عليك
علا بكت وهي تضم امها بقوة/يمّه
سحايب كتمت ألمها تحت ابتسامة/ياعين امك انتي ياعيني
ام فواز بوسع عيونها/علا ابعدي عن امك توجعينها
سحايب تنهدت/اتركيها يمّه اتركيها
علا ببكاها/سامحيني يمّه سامحيني
سحايب/والله لو ينعاد اللي صار من جديد لافديك بعمري ياعلا والله لاتبكين يابنتي لاتبكين
علا تبكي بحضن امها
سحايب تمسح على بنتها بقلبها المتقطع عليها
.
((شقة ساجي))
سدول جالسة عالسرير بوجهها الاحمر متكتفة وهي تحاول تكفف دموعها
ساجي جالس قبالها وبطفش/يابنت الحلال وش اللي تبينه طيب؟
سدول/ماابي شي
ساجي تنهد/وانا كيف اروح وانتي كذا!!
سدول/روح الله يستر عليك روح
ساجي/سدول البكى مايفيد وبعدين طيبين الحمدلله كلهم طيبين وانتي معذورة بوضعك بيعذرونك صدقيني
سدول ناظرته بغيظ/الحين سلطان اقرب من سحايب ليش مااروح اتطمن عليه خلني اروح
ساجي/وانا ماقلت لا!!قلت نروح العصر للدكتورة واذا قالت اوكي قلت اوكي!!
سدول مسكت يده/وانا اقولك كل شي تمام مشينا يالله الحين تكفى ساجي تكفي
ساجي شد على يدها/سدول كلمتيه؟
سدول كشرت بوجهها وهي تسحب يدها منه
ساجي مسك يدها/وسحايب كلمتيها؟
سدول بغيظ/ايه
ساجي تنهد/ياعيني انتي والله والله اني اخاف عليك مثل ماتخافين عليهم اخاف بكرة لاصار شي لاقدر الله تلومين نفسك ياسدول
سدول/بس
ساجي قاطعها/وعدتك العصر اذا قالت كل شي تمام نطلع من المستشفى عاللي تبين وش قلتي؟
سدول ماردت وسط نظراتها المليانة زعل وقلق على اخوانها
ساجي ضمها/ياروحي انتي والله روحي تخاف عليك مثل ماترفرف لك لاتفجعينها ياسدول اصبري لاتفجعينها
.
{الـمـزرعـة}
سعد وقف ورا ابوه همس/ابو حمد
الـعـم يُسر وعينه عالشباب الجدد/وش تبي؟
سعد/وش رايك تفطر مع مريومتك؟
الـعـم يُسر التفت له بتقطيبة جبينه همس/اعقب فضحتني!!
سعد/ترا ارسلت معي فطور لك ماسألت عني
الـعـم يُسر/وهي وش تبي فيك!!
سعد زفر/ايه لك الله ياسعد لك الله ياسعيدان الشكوى له
الـعـم يُسر رفع كوعه ودف سعد من بطنه/ذبحناك حنا!!وش ضريناك به!!
سعد/ابدا يشهد الله اني ماغير امشي واجمع الروس بالحلال وهذاني اقولك رح افطر معها!!
الـعـم يُسر ناظره بشك/وش وراك؟
سعد/وش وش وراي!!
الـعـم يُسر/والله مدري عنك!!
سعد/لاتظلم لاتظلمني!!تراني مثلك قلبي اسود مااسامح!!
الـعـم يُسر اتسعت عيونه وهو يرفع عكازه شوي
سعد مسك يد ابوه اللي رفعها وهو ينزلها وبابتسامة ومن بين اسنانه/ياابو حمد الهيبة قبال الجدد والله مايسمعون لي كلمة لانسفت الهيبة
الـعـم يُسر/امسك لسانك وامسك عكازي عنك
سعد ضحك/يازينك ياابو حمد تبي تفطر معها ولا افطر انا؟
الـعـم يُسر دفه/تعقب!!
سعد ابتسم/نتسابق لها؟
العم يُسر اتسعت عيونه/ولد!!
سعد ضحك وهو يتجه للشباب اللي يشرحون لبعض الامور اكثر بينهم ونزل الفطور عندهم وبابتسامة/حيكم تفضلوا بالعافية/رجع لابوه بعد مااصر عليهم/امزح امزح معك يبه
الـعـم يُسر عطاهم ظهره يمشي لبيته
سعد جرى وراه ووقف جنبه يمشي معه
الـعـم يسر ناظره باستغراب وهو يمشي/وش فيك لاحقني!!
سعد/تطردني بعد!!
الـعـم يُسر/اشوا انك فطين
سعد/ايه قايله انا الشكوى لله بس واصلا اليوم انا فطوري مع ناس غيركم الله يعزهم ولايعز عليهم
الـعـم يُسر/ذالك انا ذالك!!
سعد/تقدر تقوله
الـعـم يُسر رفع عكازه وهو بيضربه
سعد جرى وهو يضحك/محشوم يبه محشوم
الـعـم يُسر/تعال بس تعال افطر معنا تعال
سعد بابتسامة/والله اني صادق اليوم فطوري مع ناس عزيزين يبه الله يعزهم/غير طريقه مبتعد عن بيتهم/
الـعـم يُسر رفع صوته/لاتبطي بس لاطلع الفطور من خشمك سمعت
سعد/ابشر ابشر يبه
.
((بيت سلطان))
،،غرفة النوم،،
سلطان يمسح عليها وهي بحضنه وهدت شوي بعد نحيبها اللي استمر دقايق
فتنة المايلة بجسمها لوسط حضنه رفعت نفسها من حضنه وهي تبعد عنه وتناظره بملامح وجهه الباكية
سلطان بملامح هادية رفع يديه واحتضن وجهها وهو يمسح دموعها بدون اي كلمة
فتنة ناظرته وهي تنتظر منه اي سؤال او حتى تعليق بسيط
سلطان ناظر عيونها لثواني تنهد وهو يتركها ويوقف ويوفقها معه ابتسم وهو يناظرها/ارتاحي يافتنة
فتنة بهمس/بس
سلطان قاطعها وهو يطبع بوسة على جبينها/ارتاحي انتي وماعليك بأحد دام سلطانك راضي
فتنة ناظرته بتردد
سلطان مسك يدها وهو يتجه بها السرير وجلسها/ارتاحي سمعتي
فتنة وهي تمسح وجهها وتوقف/سلطان انا
سلطان قاطعها وهو يحط يديه على كتفها يجلسها ومال بجسمه لها
فتنة رجعت نفسها لورا وهي تناظره
سلطان بابتسامة/ولا تبين تبكين بحضني عالسرير؟عاد السرير احسن من الارض بمليون مرة
فتنة صدت بوجهها/خلاص فهمت فهمت
سلطان اعتدل بوقفته بسرعة مبتعد عنها/ارتاحي يـافـتـنـة ارتاحي ماارتحتي من رجعنا من المستشفى/فتح الباب وقفل النور/كملي نومك ياعيني تمسين على خير/خرج وسط شك بدا يتسلل لعقله اخذ نفس وهو يطرد شكوكه/استغفر الله العظيم من كل ذنبٍ عظيم استغفر الله
.
،،بوسط الـمـزرعـة،،
//نايف و بدر و ثابت و سعد يفطرون//
ثابت يتحاشى يناظر بدر بعد اللي صار
نايف يناظر تصرفاته بشك
سعد وهو يفطر ناظر نايف/نايف
ثابت لمس نايف
نايف ناظره
ثابت اشر لسعد بعيونه
نايف ناظر سعد
سعد بابتسامة وهو يحرك يده بحركة اشارة/عرفت ذي(لا)
نايف ابتسم وهو يقرأ حركة شفايفه
سعد حرك يده بحركة ثانية/وذي(ايه)
نايف يناظره بنفس ابتسامته
سعد حرك يده/وذي(ليش)
نايف حرك يده بلغة الاشارة
ثابت/يقولك اهم شي/حرك يده بحركات اشارة/
سعد قطب جبينه/وش معناها؟
ثابت/مااقدر انزل السعر
سعد ضحك/كفو كفو خويي هذا العشم لاتنزله ابد
نايف ابتسم وهو يحرك يده
ثابت/والباقي مقدور عليه
سعد تنهد/صدق صدق والله اني احيانا اغبطك يانايف
نايف قطب جبينه/ليش؟
سعد ابتسم/عرفت يقول ليش
ثابت هز راسه/صح عليك
سعد/يااخي الرزق يساق له سوق ماشاء الله الحمدلله اللي اشتغل معنا
نايف ابتسم بخاطر مسرور من اللي يقرأه
بدر ناظر ثابت/طيب ابي اقول كلام وابيك تعلمني كيف اقوله بلغة الاشارة
ثابت واخيرا ناظر بدر بعد فترة من التصدد/ابشر
بدر/الزلزال
ثابت قطب جبينه/زلزال
سعد يناظره باستغراب/الله يكفينا الشر وش ذَا مالقيت غير زلزال!!
بدر تنحنح/الزلزال اللي صار اليوم
ثابت انقلب وجهه وهو فهم عليه
بدر/تنساه مثل مانسيته
ثابت همس بدون لايناظره/ان شاء الله
بدر/وترجع الامور مثل ماكانت حصل خير ماله داعي ذَا التصدد كله!!
ثابت تنحنح/ان شاء الله ان شاء الله
سعد/وش ان شاء الله!!قول لنايف وعلم ذَا اللي يبي يتعلمه!!
ثابت بنبرة عالية/وشلون اعلمه بالزلزال صاحي انت!!
سعد فز بفجعة/بِسْم الله!!روعتني علامك!!
بدر كتم ضحكته وهو يناظرهم
ثابت/مابه زلزال انسى خلاص محد يبي يعرف هالكلمة ارتاح
سعد/لااله الا الله!!علامك قمت علي خلاص مانبي منك شي اعوذ بالله منك ياابليس شب علي شبة لاحول ولاقوة الا بالله تقل سالت عن عيب ولا منكر!!
بدر يناظر الفطور بابتسامة
ثابت/خلاص ياسعد خلاص
سعد/افطر افطر بس اقلقتني انت وزلزال خويك اعوذ بالله منكم افطر بس
.
((بيت سلطان))
//البنات مجهزين الفطور ورا البيت وقبال البركة الصغيرة وهم ينتظرونهم//
سجايا وهي تناظر الـمـزرعـة/الله ياليت نسكن هينا ياليت والله
ذهب/احلام احلام عادي احلمي وانا اختك
الجدة سدول تنهدت بضيقة/ايه لولا الحاجة كان الـمـزرعـة للحين موجودة الله يذكرها ويذكر ايامها بالخير
سجايا التفتت لها/الصدق ليش بعتيها ياجدة حتى ابوي يتحسر عليها للحين
ذهب/تقولك الحاجة ماسمعتي!!
سجايا/الله يقطع الحاجة اللي تخليك تبيعين شي تحبينه من قلبك ايه ياجدة وشو له بعتيها؟
ذهب بوسع عيونها/سجايا!!
الجدة سدول/طاقك عرق اللقافة على ذَا الصبح!!ماني بقايلة لك ارتاحي بس ارتاحي
سجايا كشرت/يمّه منك ياصندوق الامانة ماتقولين شي ابد/غمزت لها وهي تحتضن يدها/تراني حفيدتك ياسدول قلبي والله مااقول لاحد قولي لي
الجدة سدول دفت سجايا من راسها بطرف اصبعها/قلت لك الحاجة الله من الغبى اللي لعب فيك!!
سجايا كشرت/توك تقولين عني فطينة!!
الجدة سدول/خيبة ظن ظن مـاهـو بصحيح
ذهب ضحكت/تستاهلين
سلطان وقف عندهم بوجه يحاول يرسم عليه ملامح طبيعية رغم الشك اللي احتواهم من ناظروه مد الصينية اللي بيده لذهب/حطي فطور لفتنة؟
الجدة سدول قطبت جبينها/بِسْم الله وش فيها؟
سلطان/تعبت شوي ياجدة
الجدة سدول بشك/تعبت شي ولا زعلت من طوالة لسانك معها قدامي؟
سلطان/استغفر الله ياجدة متى طولت لساني عليها!!
الجدة سدول/ايه اللي يرمي الكلام مو مثل اللي يسمعه ياسليطين!!
سلطان بغيظ/جدة!!والله انها تعبانة!!
الجدة سدول/بنت ياسجايا قومي قومي ساعديني خل نشوف المسكينة وش فيها قومي
فتنة وقفت عندهم بوجهها الواضح عليه اثار البكا رغم انها حاولت تعدله بالمكياج لكن مفضوحة
//احتدت نظرات الكل والتفتوا يناظرونه//
سلطان قشعر جسمه من نظراتهم
فتنة بابتسامة/ارتاحي ياجدة ارتاحي
الجدة سدول بقلق/عسى ماشر يـافـتـنـة؟
فتنة جلست جنبها/سلامتك ياجدة مافيني شي سلامتك
الجدة سدول سكتت وسط شكها
ذهب وزعت الخبز/سموا وافطروا قبل يبرد الاكل اكثر
سجايا تنهدت وهي تصب الشاهي بالكاسات ناظرت سلطان/كم ملعقة سكر؟
سلطان/بدون
سجايا حطت ملعقة سكر
سلطان رمش/قلت بدون!!
سجايا/ومين قال لك!!
فتنة التفتت تناظر سلطان اللي عن يسارها باستغراب
سلطان رفع اكتافه بمعنى ماادري
سجايا مدت الكاسة لفتنة بابتسامة/تفضلي اكيد تحبينه حالي
سلطان ناظر ذهب/لاهنتي اعطيني خبز بر
ذهب مدت له الخبز
سلطان مد يده
الجدة سدول مدت يدها وخطفت الخبز قبله
سلطان التفت لجدته بصدمة
الجدة سدول/هاتيه انا ابي مااكل الا البر
ذهب تحاشت نظرات سلطان
سلطان تنهد وهو يشوف التهمة ثبتت عليه من الكل اخذ الخبز اللي قدامه كله ورفعه وهو يوزعه بينهم/بالعافية عليكم
//ناظروه باستغراب//
سلطان وقف/انا رايح افطر مع الشباب
الجدة سدول/من الاول وش لك بجلسة الحريم!!
فتنة كشرت بوجهها والتفتت للجدة سدول بزعل
سجايا ابتسمت برضا
سلطان صدع راسه من قصفها له/ابشري ماعاد اجلس مع الحريم ياجدة ابشري/مشى/
سجايا ابتسمت وهي تناظر جدتها
الجدة سدول/افطروا افطروا
فتنة ناظرت الجدة سدول/تراك ظلمتيه ياجدة سلطان ماسوا لي شي!!
الجدة سدول بتكذيب/خلي عنك افطري بس
فتنة تنهدت/جدة زلقت بالحمام وبكيت من الطيحة تراك ظلمتيه والله ظلمتيه!!
.
ــــــــــــــــــــــــــــــــــــــــــــــــــــــــــــــــــــــــــ
{الـلـيـل}
.
((شقة حاتم))
،،غرفة النوم،،
عجايب قبال التسريحة وهي تعدل فستانها البسيط باللون السكري
حاتم وقف جنبها وهو يعدل شماغه
عجايب وعينها بمراية التسريحة وهي تقفل اكسسوارها/اذا اهلي بيسافرون بأروح معهم
حاتم بدون لايناظرها/توك راجعة!!
عجايب وهي تنزل نظرها للارض وتلبس كعبها اللي جنبها/انت وعدتني!!
حاتم يرش عطره/بكيفك مثل ماتبين
عجايب تضايقت وهي تلتفت له/يعني اروح!!
حاتم سحب كبكاته وهو يلبسه/يعني لو قلت لا بتسمعيني بدون زعل!!
عجايب زفرت/وعيالك؟
حاتم/معك اكيد!!
عجايب/تمام لاترجع بكلامك بعدين
حاتم/ماني براجع بكلامي ارتاحي
عجايب اخذت نفس بهدوء وهي تحس بقهر منه/تمام تمام/مشت/
حاتم تنهد ومشى وراها/انتظري انا اخرج قبلك
عجايب/روح قبلي مامنعتك انا رايحة اشيك على عيالي!!
.
جوهرة نازلة بعبايتها متجهة لبيت سراج وقبالها عيالها ينزلون الدرج جري/وسام
وسام وقف وهو يلتفت يناظرها/نعم ماما
جوهرة/مو تلعب وتنسى اخوانك سمعت!!
وسام/طيب ماما
جوهرة/وانتبه لجوالك اتصل عليك ترد فاهم؟
وسام وهو ينزل الدرج جري بحماس/طيب طيب
جوهرة رفعت صوتها/انتبه لهم سمعت
وسام رفع صوته/طيب ماما طيب
جوهرة تنهدت وهي توقف عند نهاية الدرج بكم درجة جنب باب بيت ابوها وقبال باب شقة سراج/استودعتكم الله بس استودعتكم الله
فواز فتح الباب وصد بوجهه من لمح سواد وهو يسرع بخطواته
جوهرة رفعت صوتها/كيفك ياابو جابر
فواز قطب جبينه من سمع صوتها ووقف بدون لايرد
جوهرة واقفة بمكانها باستغراب من وقوفه ولا رد
فواز اخذ نفس/اطردي الشيطان عنك يابنت الخالة
جوهرة كشرت بوجهها/نعم!!
فواز بحدة/اذا انتي للحين براسك ذيك الايام انسيها قلت لك واعيدها من جديد مـاهـو بأنا اللي اشتري ناس ارخصوني
جوهرة اتسعت عيونها بصدمة
فواز/واذا تظنين باقي لك شي بقلبي تراه سوء ظن اطرديه ازين لك سمعتي!!
جوهرة عضت شفتها بقهر ونطقت بسرعة/ايه واضح سوء الظن وانت مسمي بنتك باسمي!!
فواز/لايكون الاسم بصك وخاص فيك!!
جوهرة تغلي من قهرها
فواز/اللي سمتها امها ومايحتاج ابرر لاشكالك!!
جوهرة بنبرة عالية/اشكالي!!
فواز بحدة/ويكون بعلمك ترا حلت مكانك اللي تسواك ولاتسوين مواطيها عفيفة صاينة بيتي وعرضي ولاتطق حنك مع رجال غرب عنها!!
جوهرة/صاحي انت!!تتهمني بشـ
فواز قاطعها وهو يرفع صوته بحدة/استحي على وجهك ولمي نفسك عن وجهي ترا ماردني عنك بالاولة الا انك بنت خالتي وهالمرة الحشيمة لاختي اللي مـاهـو بوقت مشاكل لها واياك يخالط ممشاك ممشاي ولا يدل بيتي سمعتي وقد اعذر من انذر/مشى بخطوات سريعة/
جوهرة بقهر/مالت الا مالت وش بتطلع يعني اخرك اخو الارهابي وع شايف نفسك على ايش يعني!!
عجايب واقفة وراها ودفتها بقوة
جوهرة انصدمت من الدفة وتعثرت وطاحت قبال باب ابوها
عجايب شهقت/اسفة ماشفتك!!
جوهرة تناظرها بحدة وصرخت/عجاااايب!!
عجايب/حقك علي والله بس لاتاخذين علي تراني مااميز الصح من الغلط بالاخير انا اخت الارهابي مثله/مشت ودخلت بيت سراج/
عليا فتحت باب بيتها لافة طرحتها بدون لاتتغطى وبابتسامة على وجهها وهي ترفع رجلها من فوق جوهرة وتتخطاها وبنفس الوقت تقفل باب بيتها/اسفة بس عايلة الارهابي لعبوا فيك لعب/ضحكت بصوت عالي وهي تتجه لبيت سراج ودخلته/
جوهرة رمت شنطتها بقهر وضربت بزاوية باب بيت سراج وبكت من قوة الاهانة اللي تحس بها
.
{الـمـزرعـة}
فتنة جالسة عالكفر اللي مربوطة بالشجرة مثل المرجيحة وهي تضحك/يامجنونة بشويش بشويش تكفين!!والله ينكسر فينا الغصن منك والله هدي شوي!!
سجايا واقفة عندها وهي ماسكة حبال المرجيحة بيديها وتحركها/لاتصيرين خوافة عاد!!استمتعي بس وخلي عنك!!
ذهب تناظرهم بابتسامة وهي تقهوي جدتها ومريم بنفس الوقت/شوي شوي لاتطيحون!!
الجدة سدول/روحي ياعيني جيبي لنا تمر
ذهب وهي توقف/ابشري ياجدة/مشت/
مريم/ماشاء الله ماشاء الله صلاتي ع النبي الله يسعدها ويهنيها مو واضح بالمرة انها متزوجة
الجدة سدول قطبت جبينها/من؟ذهب!!
مريم باستغراب/ايه!!
الجدة سدول/مابعد تزوجت!!الله يرزقها ويسخر لها ولد الحلال
مريم اتسعت عيونها/صدق!!
الجدة سدول/وذي بها مزوح!!
مريم سكتت وسط تقطيبة جبينها
ذهب متجهة لجدتها ومريم اتسعت عيونها بصدمة وهي تناظرهم/يمّممممهههه
سجايا وفتنة اللي انكسر فيهم الغصن وهم مرتفعين اعتلى صراخهم
الجدة سدول بفجعة وهي تناظرهم/يمّه الليلة!!
فتنة وسجايا ضربوا بالارض بكل قوة
مريم فزت واقفة وجرت لهم/بِسْم الله بِسْم الله
.
((حوش بيت ابو ماهر))
فواز جالس بطرف المجلس لحاله وهو سارح بذكرياته
،
،
::قـبـل ١١ سنة::
((بيت ابو فواز))
فواز يناظرها بصدمة
جوهرة(١٩سنة)بعبايتها وعلى بعد مسافة منه/تجي منك ياولد الخالة ارفع لقدرك واصون لكرامتك
فواز(٢٦سنة)بلعثمة وهو يجمع افكاره المبعثرة/الحين تعنيتي ومقابلتني بالسر حتى تقولين لي ماابيك!!
جوهرة سكتت
فواز برجى/لا ياجوهرة لا القلب باغيك انتي شرايينه لاتذبحينه طلبتك تكفين ياجوهرة تكفين
جوهرة تنهدت/يشهد الله يافواز كنت ابيك نصي الثاني لكن مااقدر سامحني مااقدر اكمل معك والحمدلله انها خطبة مابعد صار شي بيننا ولا كان تفرقت العايلة بسببنا
فواز/انتي لي وانا لك وش اللي تبدل ياجوهرة وشو قولي لي وشو اللي تبدل بيوم وليلة وشو!!
جوهرة/مـاهـو بيوم وليلة يافواز مـاهـو بيوم وليلة!!
فواز/وش هالجفى والصد من وين جاك من وين!!
جوهرة تنهدت/انا صبرت صبرت وكثير يافواز وتحملت فوق مااقدر لكن اكثر من كذا مااقدر من البداية واجتماعنا غلط مانصلح لبعض ابدا مانصلح!!
فواز بوسع عيونه/يعني من الاول ماتبيني!!
جوهرة سكتت ماردت
فواز/وين راح كلامك كله!!انتظرني ابي اخلص دراستي وقلت تم!!ابي تبني لي بيت لحالنا ماابي اهلك وقلت تم!!قلتي ابي نسكن بعيد عنهم وقلت تم!!/بقهر/كسرت خاطر امي وابوي عشانك ولا بيّن غلاك عندي!!
جوهرة تنهدت/فواز لاتربط الماديات بغلاتي عندك
فواز/وشو!!
جوهرة/وادري انك سويت شي كثير عشاني لكن انا صبرت مثلك بعد وانتظرت كثير والظاهر مافيه امل يتعدل الوضع
فواز قطب جبينه بحدة/وش وضعه!!وش اللي تتكلمين عنه انتي!!
جوهرة تنهدت/فواز انا تعبت تعبت من كلام الناس ونظراتهم والسبب اخوك الارهابي
فواز احتدت نظرته/نعم!!ووش عليك منهم وش!!
جوهرة/كل يوم اقول بكرة تطلع براءته وتزين الامور واجتمع انا وفواز مثل مايبي لكن الظاهر ان هالبكرة مطول وكثير بعد!!
فواز بوسع عيونه/مثل مايبي!!يعني انتي ماتبين!!
جوهرة/فواز انا ماعندي استعداد يرتبط اسمي او اسم عيالي باسم ارهابي!!مااقدر ولا اتحمل احد يأشر علي ولا عليهم ويقول عنهم هذولا عمهم المجرم اموت ولا اسمع كلمة على شي يخصني!!
فواز/يعني بايعة وخالصة!!
جوهرة سكتت
فواز/بعتيني لكلام الناس!!
جوهرة/افتح عيونك يافواز عاللي حولك وشف حالتكم وشف وشلون صار وضعكم وتلومني!!
فواز ابتسم بقهر/يعني ارخصتيني وانا اللي شريتك غصب عن الكل!!
جوهرة/لاتكبر الموضوع كل السالفة مافيه نصيب بيننا والله يستر عليك
فواز يناظرها وكل مشاعر الحب والانتظار تبددت بلحظة
جوهرة/انا قلت حق اخر المعروف والعشرة يجي الصد منك انت الاولى تجي منك
فواز ضحك بقهر/قصدك حتى عمي مايوقف بوجهك
جوهرة احتدت نظرتها/ليش الغلط يافواز ليش!!
فواز ناظرها بحدة/يكون بعلمك يابنت الخالة اللي يرخصني ارخصه ولا اناظره لو هو احب الخلق لقلبي ولايعيش بدونه
جوهرة تنهدت/فواز
فواز رفع يده بوجهها/لاتكلميني وانا مااحل لك يابنت الناس/مشى وعطاها ظهره/
جوهرة زفرت براحة وهي تناظره يبتعد بهدوء
فواز غرقت عيونه دموع بلع غصته وهو يشد على قبضته/اللي باعك بيعه يافواز بيعه
،
،
فواز صحى من ذكرياته على رنة جواله ابتسم وهو يناظر اسمها على كثر مايزعلها منه على كثر مايحبها رد/هلا
جواهر/كيف حالك يافواز
فواز/انا بخير دامك بخير
جواهر قطبت جبينها باستغراب/تعبان؟فيك شي؟
فواز تنهد/فيني انتي وعيالي ياجواهر
جواهر بتوتر/فواز وش فيك؟
فواز/مافيني الا العافية انتي وشلونك ووشلون العيال؟/وتكلم معها وهو يجدد طاقته بصوتها/
.
{الـمـزرعـة}
//الشباب مجتمعين تحت الشجرة يتقهوون مع الـعـم يُسر وبدر وسلطان عند النار على مسافة منهم يشوون//
الـعـم يُسر تنهد بابتسامة وبيده فنجاله/يازين الجو يرد الروح!!
سعد/اطربك يبه؟
الـعـم يُسر/لا انت لا!!
ثابت ابتسم
سعد شهق/ليش!!
الـعـم يُسر/ماتعرف تجيب الزين
سعد كشر/يبه والله اني ازين واحد بالطرب بس انت مايعجبك اللي اقوله
الـعـم يُسر هز راسه بتسليم/ايه ايه
سعد/اسمع اجل اسمع
الـعـم يُسر وهو يرتشف من فنجاله بصوت/ماوراك الا الخراط
سعد اتسعت عيونه/يبه!!
ثابت وقف وهو يتفادى يحرج سعد معه اكثر
واتجه لسلطان وبدر
سلطان يقطع الخضار وهو يناظر بدر بين فترة وفترة وهو وده يسال لكن يكبح فضوله
بدر وهو يحرك الدجاج اللي عالفحم/رح ارتاح مابعد خفيت ياابن الحلال رح
سلطان ابتسم/اسمع كلامي انت ورح تراك ضيف
بدر/مابيننا ضيوف اهل اهل
ثابت وقف عندهم/وش عندكم اساعدكم فيه؟
سلطان/ارتاح مافيه شي
بدر/الا امسك عنه التقطيع وخله يروح هناك يتقهوى ذبحني مايسمع لي كلمة
ثابت مسك سلطان من يده وهو يقومه/قم قم بس
سلطان سحب يده من ثابت/اتركني ياابن الحلال اتركني
ثابت/والله مااتركك قم بس
سعد وقف عندهم بتكشيرة/وش عندكم؟
سلطان ناظره بابتسامة/الشايب؟
سعد تنهد/الله يعيني عليه
الـعـم يُسر/وش تقولون؟
سعد رفع صوته/الله يطول بعمره
سلطان ضحك بخفة
ثابت جلس وهو يسحب منه السكينة واللوح ويقطع
سلطان وقف وهو ينفض يديه
سعد/ترا الحق لاحقك ولا ذَا مـاهـو بعشا!!
سلطان/قل الحمدلله يارجال كلها نعمة وخل عنك بس
//التفتوا لمصدر الصوت من سمعوا الصراخ//
سلطان جرى لبيته وهو يسمع صرخة البنات
سعد جرى وراه
بدر وقف بحيرة بين انه يلحقهم او مايصلح
ثابت فز وجرى وراهم
الـعـم يُسر وقف/خير خير الله يجعله خير
سلطان لف لورا بيته وهدت خطواته وهو يناظرها
سعد وراه اتسعت عيونه من ناظرها وارتجفت عظامه قبل قلبه من صدمته عطاهم ظهره وسط انفاسه السريعة وبرجفة صوته/يامثبت ثبت يامثبت ثبت!!
.
اللهم صل وسلم عليك يارسول الله
.
#سلطان_الهوى_يافتنة_الألفية