Just Another Love Story: A Jamaican Love Story

CHAPTER ONE

Sunday
September 12...

💜💜💜
JODIANN POV
💜💜💜

Mi laydown pon mi belly inna mi bed a listen to Alkaline Talk Truth as mi text pon Whatsapp. A did afta 12 and we no too long come from church wid Mommy and she did inna di kitchen a cook.

Di song bad eno mi naa lie. Him song dem always hawt still dats y a mi artist and mi juss rate di dawg style and how him move.

Mi nuh care weh nobody waa seh bout him, a mi artiste same way.

Mi feel a hand connect pon mi leg and mi fly up.

"Bombo!" Mi scream out and turn roun and see seh a mommy slap mi pon mi leg.

She gimmi a eye deh.

Blutclaat Jodi if yiy coulda kill yuh, mi know yuh deh six feet already. Mi subconcious seh and mi shake mi head.

"Sorry Mommy. Mi neva know seh a u but yuh lick mi hot." Mi apologize to har as mi rub mi leg.

"Look how long mi a call yuh fi come wash up di plate dem lazy gyal." She cuss.

"Mi neva hear yuh mommy. Thru mi did a listen music." Mi seh.

"Everyday yuh lock up in yah wid earphone stuck inna yuh ears. Yuh soon deaf." She cuss. "Tek up yuh lazy self and guh wash di plate dem before yuh no get no dinna."

She walk outa mi room while a mumble unda har breathe. Mi neva a hear wah she a seh fully, so mi juss ago lef har mek she gwaan.

Mi not even ago badda ansa har.

Mi raise up from di bed and put on mi Nike slippers as Malie Donn Crook start play.

Mi start sing di song avoiding di badwud dem as mi walk outa mi room.

Bang eh line, I'm a crook (big thief)
Anedda pretty bitch a drop a foot
Suh when mi push it inna she belly a never macka jook (wah)
Line hot like Shabba madda pot a cook
Dem illiterate suh mi send dem guh buy a pack a book
Jump out fully Polo mi see alotta look
Mi see lotta wasteman a wife up a batta' foot
Shut mi yiy cah fimi Glock a look
Yow Spain Town

Mi a sing and a bounce as mi walk guh a di kitchen fi guh wash di plate dem.

Wen mi reach di kitchen di scent a di pot roast chucken lick mi.

Di chicken smell nice yuh hell.

Mi see mi madda a stir di kitchen inna di pot. Today a Sunday and she a do di pot roast chicken weh mi teach her fi cook.

Nuh badda ask. A youtube mi look pon fi mek it and mi mek it waa Sunday fi we dinna and from den dem juss love it so mi haffi teach har how fi mek it.

"Food smell nice thou mommy." Mi seh as mi pause di song and tek out one side a di earphone outa mi ears.

"Mhmm. Wash up di plate before yuh no get none." She seh and mi laugh and go a di sink.

Mi put in back mi earphone and play back di song as mi start wash di likkle bit a plate weh weh use this morning and wah she did a use while she a cook.

Lawd mi not even introduce miself.

My name is Jodiann Baker but people mostly call mi Jodi or Jo. Mi did have fair complexion, and short bout 5ft 3" and slim. Mi did have a lil shape wid a nice size bumpa but it neva big. I'm 18 about to turn 19 in a couple months. Mi birthday a February 15 and dat five months from now.