Just Another Love Story: A Jamaican Love Story

CHAPTER FIVE

💜💜💜
JODIANN POV
💜💜💜

To how mi did angry mi couldn't wait fi di match done fi see Odane fi sen him up weh sun nuh shine.

Likkle idiot bwoy.

Why dem likkle bwoy yah stay suh? Dem a cheat and a cheat wid somebody weh look way worst dan di person weh dem deh wid.

But ano dat eno. Mi a di biggest idiot, mek di bwoy have mi as yamhead. Mi and dis bwoy deh fi a year and him always a cheat pon mi and mi still find miself a deh wid him afta all di embarrassment weh him cause mi already.

Yaa di biggest fool mi eva buck up pon. Mi subconcious seh and mi agree wid har.

Mi did go change outa Odane shirt and put on back mi shirt weh mi did wear and go back go siddun a di bleachers a count down di time til di match fi done.

Mi hear di final whistle blow.

And Steths did end up win 3 - 1.

Mi wait and wait until mi see Odane come a di sideline a look fi somebody pon di bleachers until him see mi and a walk a come towards mi.

"Look yere. Mi waa talk to yuh now." Mi seh angry.

"A who trouble yuh?" Him ask mi and mi cut mi eye afta him.

"Nuh ask mi no question and come roun." Mi tell him and him nod.

Mi wait til him come roun before mi attack him.

"Wen yuh a cheat mek sure yuh a cheat wid somebody weh look better than mi. And keep di likkle mongrel dem pon a leash." Mi seh to him.

"Wah yaa talk bout Jodiann?" Him ask mi wid a confused look pon him face.

"Nuh yuh likkle hard face gyal weh yuh mek a come to mi bout if yuh a mi man and whatever. Mi nuh know har and she come fling on big box inna mi face. Mi did deal wid har case but you juss know seh mi and yuh done. Mi naa tek no more embarrassment from yuh." Mi tell him as mi fling di jersey inna him hand. "A thru yuh nuh know how mi woulda box dung yuh blutclaat?"

"Which girl yaa talk bout Jodiann? Mi no have no odda ooman dan yuh babes." Him seh.

"Ohhh. Cause it look like mi born backa a blutclaat cow?? Mi look like boo boo di fool to yuh?" Mi ask him.

"Jodiann. Man a public we inna eno." Him try plea wid mi.

"Mi no give a fuck Odane. Yuh feel like a everytime yaa guh embarrass mi. Juss watch how mi aguh blutclaat embarrass yuh infront a all a yuh fren dem." Mi seh.

"Jodiann, come on man. Yuh know mi naave nobody dan yuh." Him seh again.

Mi juss swing mi hand cross him face.

"Like yuh tek mi fi fool Odane? Cause mi look like idiot to yuh nuh thru? But mi undastand wah mek yuh tek mi fi fool cause mi a di idiot weh eva a believe yuh wen mi well and fucking know how yuh stay. Mi naa believe yuh again. Afta how much time yuh tell mi di same ting ova and ova and ova again, juss fi have mi embarrassed again and again. Mi done wid yuh and yuh foolishness Odane. Mi done." Mi tell him and walk weh from him.

"Jodiann." Him call mi name but mi naa do this to miself again.

"Leff mi alone Odane. Juss figet bout mi yere dat?" Mi tell him as mi walk go meet up wid Kelsi dem fi go home.

Wen mi reach weh Kelsi dem did deh mi stop.

"Yuh ready fi go home?" Neva ask.

"If unno ready? But memba we did plan seh we a guh a KFC." Mi tell dem.