Bamboo Forest

အပိုင်း(၄၉) Unicode

"ရိက္ခာတပ်တွေ လမ်းမှာဖြတ်တိုက်ခံရပါတယ်..."

ထိုစကားတစ်ခွန်းသည် အန်ဂလိုစစ်တပ်ကိုဦးစီးသောလူ​၏မျက်နှာကို မှောင်ကျသွားစေသည်။အင်အားချင်းဆိုင်ပြီး စမ်းနေကြသည်မှာ သုံးလခန့်ရှိပြီဖြစ်ပြီးမည်သည့်ဘက်မှ လက်နက်မချသေးသည့်အနေအထားတွင်ဖြစ်​၏။ သူတို့ဘက်ကလက်နက်အင်အားအသာစီးရသော်လည်း ဆုတ်ယုတ်လို့လာသည့် လူအင်အားမှာသိသိသာသာပင်ဖြစ်​၏။

လူအင်အားလို၍ စစ်ကူတွေခေါ်တိုင်းလည်း သူတို့ဆီချောချောမွေ့မွေ့ရောက်ရှိလာခြင်းမရှိ။စစ်ကူများသွားရာလမ်းကြောင်းတိုင်းတွင် ကင်းပုန်းများရှိနေတာဖြစ်ပြီး အခေါက်တိုင်းလိုလို ကျရှုံးရ​၏။ ပင်လယ်ပြင်ဘက်မှ ပင်လယ်ကူးသင်္ဘောများဖြင့် တိုက်ရိုက်စစ်ကူများလာခဲ့သည့်တိုင် ဆိပ်ကမ်းဘက်၌လည်း အလစ်တိုက်ခံခဲ့ရမှုများရှိသည်။

မည်သည့်လမ်းကြောင်းများမှသွားသည်ဖြစ်စေ သူတို့​၏ လမ်းကြောင်းကို ခြေရာခံနိုင်သည့်ရန်သူတို့​၏ နယ်မြေကျွမ်းကျင်မှုနှင့် ပြောက်ကျားစနစ်များကို လုံးဝလျော့တွက်၍မရခဲ့။

နေ့စဉ်ရက်ဆက်ဆိုသလိုလည်း ရှေ့တန်းစခန်းမှာရှိသည့် စစ်သည်များ အဆိပ်သင့်၍သေဆုံးခြင်းများရှိသည်။ အကြောင်းအရင်းကို ရှာကြည့်လိုက်သည့်အခါ ထိုစစ်သည်များစားသုံးခဲ့သော အစားအသောက်များထဲ၌ အဆိပ်များပါဝင်နေတာဖြစ်သည်။ ဖြစ်နိုင်ခြေအရှိဆုံး ယူဆချက်မှာ စားရေးသောက်ရေးတာဝန်ခံများမသိရှိလိုက်သည့်အချိန်၌ အစားအသောက်အိုးများထဲသို့ အဆိပ်ခတ်ခံရတာဖြစ်​၏။သို့သော် မည်သို့မည်ပုံလာရောက်ကျူးလွန်သွားသည်ကို မည်သူမှမသိခဲ့လိုက်ရခြင်းဖြစ်သည်။

ထို့သို့ အဖက်ဖက်မှ ပုံစံအမျိုးမျိုးနဲ့ ထိုးစစ်၊ခံစစ်၊ ပြောက်ကျားစနစ်များဖြင့် တိုက်ခိုက်ခံနေရပါက ရေရှည်တွင် ရိက္ခာများပြတ်လပ်နိုင်ချေနှင့် လူအင်အားဆုတ်ယုတ်နိုင်ချေမှာ ရာခိုင်နှုန်းများလွန်းလှ​သည်။ သို့သော်စစ်ရှုံးသည့်ဘက်မှပေးဆပ်ရမည့် စစ်လျော် ကြေးပမာဏမှာ အဆမတန်များပြားလွန်းတာကြောင့် သူတို့အနေနဲ့ မထူးဇာတ်ခင်းရှေ့ဆက်တိုးရမည့် အနေအထားဖြစ်သည်။
___________ ______________