#بروازمن_ورد

36

الاخير

بعد مرور 5 سنوات!

اليوم بعد مرور كل هاي السنين, الكثير طالبوني انه اكمل قصتي في يومها من كنت اقرا القصص الي ينشروها الكاتبات باللغة العامية على الفيس بوك جانت حالة جديدة عليه

جنت ايامها اعيش بوحدة كبيرة وشبه منعزلة عن العالم الواقعي فانغمست بالعالم الافتراضي وشفت بيه متنفس الي بالغربة رغم احاول انخرط بالمجتمع الامريكي اكثر فبديت بالعراقيات القريبات عليه والعربيات ودخلت كروبات الفيس بوك الي تهتم بشءون المغتربين 

ودخلت عالم القصص كنت اقرا لما اطفالي ينامون وابقى وحدي انتظر حيدر يصير عنده وكت الصبح حتى يخابرني احجيله عن يومي الي راح ويحجيلي عن الي يصير 

وبوكتها قريت قصة اسمها ازهار الخريف 

كانت قصة بنية شابة عانت لما وصلت لامريكا فعلقت على قصتها بصفحة الكاتبة واستفزني ردها 

دخلتلها خاص لكن هي مجاوبتني الا بعد ايام

 ولغريب الصدف طلعت تعرف ليث وضحى

لذلك قررنا نذكرهم بقصتنا 

نرجع لايام وصولي لامريكا  

 كنت بعد محولت الولاية ورحنا يم اصدقاء النا سافروا قبلنا ساعدوني انه ااجر شقة نظيفة بمجمع حلو وهادئ وبديت ا اشتغل دوام جزئي في مركز للشباب موجود في كل مدينة هذا المركز عادة مايكون للعوائل بيه مسابح وقاعات العاب وحضانة 

وبمساعدة زوجة ابو حمزة اصدقائنا كدرت احصل على الشغل هناك واشتغل مثل ناني مربية اطفال الراتب جدا قليل بس ميخالف على الاقل الاولاد يمي وابلاش والدوام قصير مو طويل اربع ساعات بس 

طبعا ممكن اطلب ساعات اكثر لكن في حينها يطلبون مبالغ على الاولاد

لذلك حسيت بذيج الايام الدنيا فتحتلي ذراعاتها

 جنت ولفترة طويلة استلم مساعدات من الحكومة تقريبا كلها عينية بطاقات الاكل

 الاكل كان كله عليهم مجنت اشتري اي شي من عندي ابد

 اضافة للعلاج . علاج الاطفال كان مجاني تماما

وصح 

حيدر جان يدزلي فلوس الايجار كل شهر 

تقريبا كان الف دولار وشوية غرفة وحدة ومطبخ وصالة 

الشقق هنا تصميمها كلش حلو مفروشة كاربت كلها ومجهزة تكييف وتدفئة مركزية