٦
مااعرف منين وشلون اجاني حادث السيارة غفل
بس الحمد لله اللي عدت على خير
والمخطط يكول انه ابو الكيا هو اللي غلطان مو اني لانه هو اللي عكس
المهم ليث خلصها اليه بسلامات ...واني ماطلبت اي تعويض ولافلوس تصليح مردت اي شي بس يكون ينتهي كلشي بسرعة...
من داارجع للبيت بيومها عمتي سعاد ظلت تلح تدك التلفون ...بس مشلته اني عرفت هاي سراب رايحة لبيتهم واتصورت هي دتوسل حتى مااكول لابويه بس اني جنت حالفة ميت يمين الا اكله بعد اللي صار بيه وهذا الموقف السخيف ...صدك نويتلها نية موزينة
اول ماوصلت طلعت قهري بسرمد ليش تلفونه مغلق جانت اعصابي محروكة وخطية طلعتها بيه
اتصلت عمتي مرة ثانية ومن حجيت وياها ظلت تعاتبني وتصيح متعصبة عليه انه ليش رحت لكلية سراب! وشلون اني احرجتها كدام زميلها لا ومصيحه عليها وجارتها من ايدها !
هذا كله اني مسويته وطلعت موخوش واني اغار من سراب وماعندي اصول وفضحتها بالكلية!
واريد اكسر سمعتها بالكلية لانه هي ماعدها اب وام ...يوكفون بعيني
والموقف جان طبيعي واني فضحتها ...معقولة ؟
طبعا ماكدرت احجي ولا ارد اصلا
لانه عمتي بوكتها ماخلتلي مجال ولا سكة افتح حلكي بالعكس هي هددتني تشتكيني يم بابا
صدك حيل تاذيت ....وغصيت بعبرتي ....ومكدرت اجاوبها
سديت التلفون وظليت الوم بنفسي اني شعليه يبيها!..تصادق تكبل اني شنو ؟!!! هم زايده مني هذا الموقف
وياريت خلص الموقف لهنا!
صعدت بدلت على السريع ودااغدي الجهال سرمد عايفهم لحد الان بس نساتل وجبس ممغديهم ،حميت الاكل امي محضرته من الصبح ودااوكلهم ...دخلت امي ...تصيحني
اني عبالي هم مخابريها
بس من شافتني امي خطية كالت الحمد لله انت بالبيت اشو سيارتج ماكو لعد ظل بالي عبالي بعدج مراجعة
اني طبعا جنت دااغلي كتلها حتروحين للعيادة اليوم كالت لا اليوم اخذتها اوف
ماعدها مواعيد لغتها من الصبح كعدت وحجيتلها كلشي
واحنى دنسولف ابويه خابر واستلمني رزايل
YOU ARE READING
#بروازمن_ورد
Romanceلاتحكم على حياة البشر من مظاهرهم فالكثير منا لايعرف ماتخفيه لنا هذه الايام قد نبدوا بغاية الروعة والجمال من الخارج لكننا محطمون تماما!
