"إنّ الخطأ ليس أن نعيش حياة لا نرضاها لكن الخطأ هو ألا نحاول تغييرها إلى الأفضل دائماً"
لــروايتي:
#خصمُ_الكلام_انتِ
#بقلمي_بصره_الربيعية
#مشهد
🦋............................................................🦋
_اندفعت بالكلام عليه هالگد ما فور اعصابي
خلاني شكو حچاية توگف بطرف لساني اكتها بوجهه
كتله :
_شتعرف من الدين انت لو بس بالاسم
عگد حواجبه يستغفلني على اساس ويسأل:
_شنو معناه هالكلام هسة؟!
_كتله ما ادري كُل لروحك يعني ماعندك زواجات بالسر والله يعلم إذا كان زواج!...
عصب وانتفض وكال:حدودچ عاد!!
_كتله مستهزئة :
_خليت بيها حدود انتَ!
ليش من تسوي هالاشياء انت تلتزم حدودك خلِ اسوي شي اني مثلا اصاحب من و......
ماكملت كلامي گاطعني بصيحة مزمجرة منه رفع ايده بنفس الوقت يريد يضربني :وللِلِلِلِچچچ!!
_عصبت هنا واحس فعلا تلفت اعصابي
ضليت اصرخ واضرب شنو شي يجي بايدي وماحسيت منو صار يمنه واجه
بعدني اصرخ واكول:اني تريد تضربني؟!!!
بهذا عمري ابويه ماضاربني! انت تضربني ليييش؟؟
لان حجيت الصدك هااااا!!
احرك الدنيا عليك والله شنووووو تضربني
ماحسيته الا لازمني بهمجية من طرف ياخة كلبيتي وكال :
هاي كدامهم أنتِ طالك زيين
_ضليت صافنة عليه وگلبي يدك حيل واحس انفاسي اضطربت وعرگت
التفتت الهم بصدمة من فلتني بدفعه بسيطة وراح
ضحكت مستهزئة صحت وراه
_افييييش خفه ورااااحة
جريت عباتي ركضت وراه
جاي يمشي سريع دفر الباب البرى برجله وطلع راد يركب سيارته
وكفت يم السيارة وهلهلت واني ماادري بدموعي تهمل على خدي!.
بعدني على هاي وكفتي اريد التفتت سمعت رگعة باب السيارة للمره الثانيه
التفتت شفته شلون صار احمر واحس الدخان صار يطلع من ذاناته يريد يهجم ،تراجعت خطواتي ليورى
بالبداية صوته يدردم لمن ماصاح
واااااكفة بالشارع وصوتج طااالع
اشدلللي كرررووون !!!!
ركضت منه رجعت دخلت للبيت
وهو يمشي وراي سريع يغلط ويتحلف
لا صااار صدك يخوف!! انگلبب عليه ثور
هسة وين الگالي وصلة حمرة
وصلت لغرفتنا وهو بعده يصيح وراي
الا اكضج واكسر راسج وأشوف يا***د يطلع وررااچ
ادب سززز الصللللفة،
من طبيت للغرفة وقفلت الباب هو دفرها حيل برجله سمعت عمتي تهدي عليه
_وليدي يمه صلِ على محمد عوفها طفلة ماتعرف ستسوي علمها لا تكتلها
ومنا ومنا كأنه ابتعد مدري هدأ
يــمه گلت هسة يفلش مو بس الباب لا حتى الغرفة عليه
ضليت افتر بالغرفة شلون السجينة وأحاچيها لروحي وأأشر هااا !! وين راح صوتچ وين راح حچيچ مو توچ تكليله احرك البيت عليك هااا شو لبدتي عنه!
سليمة مو اجه يضربچ كف تسوى حياتچ هاي رفعة ايده وصياحه عليچ،غير تندمينه!
هاي دائما هيچ تفوت العركة وتفوت المناقشة
والناس تنسى السالفة يالله حضرة جناب عقلي العزيز يگعد يخطط شنو راد يحچي ويطلع بطولاته على لساني وهو كُلشي ماكو عركة بالمخ ما عنده !
ضليت كاعدة و حيلي كله يرجف
كل شوي اكول هسة يجي
اخر شي غفيت بمكاني
الا ان سمعت الباب تندك
طفرت ادور مكان لبده والباب بعده يندك
لمن ماسمعت وحدة من البنات صاحت بـ صوتهاا :
_ريناد هاي اني ميادين
_وكفت ورحت فتحته إلها بس قليل وأنه اباوع وراها بخلسه
ضحكت هي وكالت:
_راح راااح
دخلت وكالت وشلون تضلين لابده؟!
كتلهاا:
_ طبعاً لااا هسة رايحة
بس الم غراضي
كالت:
_عمي استهدي بالرحمٰن
وين تلمين غراضج وتولين
كتلهاا اي أولي مادام احنا على البحر نتفسح قبل لا نوصل البر خلِ أولي أروح ارجع لبيتي واهلي واحتضن كتبي واكعد عليهن لمن يفقسن ولا حضن اخوج البارد
على اساس جايبني يراويني الغرفة
جاي يراويني صخام وجهه
خل يعشش بيها كلشي ماريد منه زين!
اني اكرهه من البداية وهسة خلصت منه
انتبهت عليها مبتسمة وأنه محروك دمي
كتلها شكو تضحكين كالت اضحك عليكم
هاي قبل لاتزوجون وهيج!
يالله نفس ما كلتي همزين خلصنا كلنه،
_باوعت عليها باستغراب وهي راحت تريد تطلع
انتبهت عليها مغطية شي يضوي جوه ايدها چانت طابگة دشداشتها عليه مثل الخافيته طخت عندي بسرعة
يعني بأيدها تلفون مفتوح!!
ايااا نذلة!!!......
ركضت وراها جريتها عاطت
_هاي لييييش ؟!!
_شنو تسوين بالتلفون ضامته بهدومچ ؟
دتسجلين صوتي؟!!!!
_تخبلتي أنتِ شسوي بصوتج
_اجت تلتفت وتروح سحبتها اريد أخذ موبايلها
صارت تدفع بيه
عطت بيها : لددددفعيين
ما حسينه بنفسه الا بحافة الدرج
لمن ما صاحت عمتي
_ريناد يمه تعوذي من الشيطان شحصلج!؟
_ اني من انتبهت أجيت ابتعد بس ميادين ما چانت منتبهه رادت تلتفتت وتنزل بسرعة وزحطت رجلها
واني طكيتها صرخة !!!!!!........
🦋..............................................................🦋
*مرحبا غوالي هذه قصتنا الجديدة حاولوا
تنطوها لاصدقائكم واهلكم من محبين القصص
القصة كلش حلوة والي ميقراها تفوته والله 🫢🩷
تفاعلوا وصوتوا فدووة ⭐❤️
ولا تنسون ضيفوها لمكتبكم وتابعوا حسابي
حتى يوصلكم كل اشعار جديد👈🏻 20nana29
موعد النشر بعد عشر ايام إن شاءالله
اللهم صل على محمد وآل محمد
اللهم عجل لوليك الفرج
أنت تقرأ
خَصْمُ ألكَلامِ أَنتِ {مستمرة}
Humor#شيوخ رضخت هي لعاداتهم واعرافهم غصبا لم تعرف ماذا تفعل احاطها الجميع بالتآمرِ عليها لتستر فعلة اختها، كانت تنظر له بغضب وكذلك حال القابع أمامها ! حتى زمجر هو وقال: إذاً #خصم_الكلام_انتِ #بقلمي_بصره_الربيعية
