خَصْمُ ألكَلامِ أَنتِ {مستمرة}

البــارت_2_

~~لن تكبر دون أن تتألم، ولن تتعلم دون أن تخطئ، ولن تنجح دون أن تفشل، ولن تحب دون أن تفقد، هكذا هي الحياة~~

لــ روايتي:
#خصمُ_الكلامِ_انتِ
#بقلمي_بصره_الربيعية
#البارت_2_
#تابعوا_حسابي 👈🏻 20nana29

......

ريناد_ بوقتها ميلاد مجاوبتني بس ميادين
جاوبت وبلهجه حادة گالت:

ميادين_شعليچ شنوو تحاسبينه!!
ريناد_ گلبت عيوني عنها وباوعت لميلاد ،
يدورون عليچ ميلاد ، فِردت ايديها ميلاد ولوحتهن بالهوى وگلبت عيونها وسوت حلگها مثل التعلچ بدلع
وگالت:

ميلاد_ ها شنو ميگدرون يتنفسون إذا ما شافوا ميلاد
ريناد_ اجت تنزل لزمتها ميادين شاورتها هذيج هزتلها راسها وانطتها تلفونها

عبرت من يمي نزلنا الدرج وحده تردم ويه الثانية
كل ما اريد اجرها اكلها شنو تسوين فوك ويه ميادين ما تنطيني مجال؛

نزلت راحت للحمام شوي وطلعت معدلة نفسها
راحت للمطبخ واني وراها عبالك ذيلها شسوي
اختي الوحيدة والچبيرة وما يوم تفارگنه
خصه هسة من اشوفها تسلم على مرت عمي
فد احزن أكول بعد كم يوم بهيچ مناسبات يصير العكس
تسلم علينه احنه ،

زمن_ها عمة ريناد وين النجانة
ريناد_ گلتلها ها عمة مو صحت لميلاد اول
هسة اجيبها ،ركضت جبتها واجيت
هنا دخل ابن عمي علي الصغير چان بيت عمو علي قريب كلش حايطه على حايط بيت جدي وبظهر بيت جدي
يعني مسافة صغيرة ورا ، بيت عمو عبد الإله

بس بيت عمو زياد لا بغير منطقة وقريب على الحضرة
شوي عمو زياد امكانيته زينة ومتمكن گدر يشتريله بيت بهيچ مكان حلو ، اني ابويه چان شرط أهل امي ما تطلع من كربلا وعادي وافق ابويه بس طبعاً امي كالت بعد ما وافق جدي وبيبيتي الهنوف لأن كربلاء قريبة ، أما بيبتي "بسعاد" احسها فقيرة ما الها كلمة ودوم من نروح لو بغرفتها تقرأ قران وتصلي قضاء مافي الذمة لو يم الدجاج لو ياخذها اسعد ابن عمو زياد للحضرة تگعد هواي بالامام وهي أكثر وقتها هناك عند عمو ما ادري احس بيبيتي الهنوف ما تخليها تتواجد بالبيت تضوج منها شي يقهر الصراحة هو عمرچ شنو بقى بي حتى تخلقين هالعداوات لا وفوكاتها مخلية إلها كرسي تأمر وتنهي بنص المطبخ تدخل بكلشي.

لو من ما طلعت بيبيتي "بسعاد" من غرفتها
رحنه فتنالها كلنه نحبها ونحب عطر غرفتها
حلو عدها ركن يمه كرسي الصلاة فوكاته القرآن وتربتها وسبحة من طين وكتاب الزيارة وچربايتها الحديد
على كولتها القريولة وكنتورها الخشب من قديم الزمان
وجودلية بالنص حياكة ملونه وشباكها مفتوح على الزرع،
ه‍يچ أحسها تنعنش گلبي فد مريحة فـ نطول عدها
هنا احس بيبيتي الهنوف تضوج رأسن ادز وحده من بناتها (عماتي) تفزعنه حتى لو ماكو شي اطلع شغل من جوة الأرض في سبيل لا نجتمع عد بيبيتي بسعاد
هي بيبي بسعاد أخذها جدو هدية واجت ضرة على بيبيتي الهنوف يعني مرات انطيها الحق بأنُ تضوج منها
بس مو بعد هالكبر وهالعشرة وهم بخباثة لا طبعاً ممقبول
وعيب على شيباتها ،