السلام عليكم احبابي صلو على محمد وآل محمد ونصيحة قبل لا تبدون البارت دوم اقرو آية الكرسي بعد كل فرض صلاة بأذن الله فضلها تنقبل صلاتكم ❤️
اقرو آية الكرسي من ادخلون الحمام ومن قبل لا تنامون 3 مرات تكونون بأمان انتم والي وياكم اقروها للموتى اهدوها الكم ثواب عظيم
خل اضحكم 😁
مرة قريت تعليق وحدة كاتبة انتو هم مثلي من كثر الجفاف العاطفي احلم بشخص ماعرفه يحبني ويركض وراي واتعزز عليه واصير ثكيلة وهالسوالف وفجأة اكعد من النوم واظل ايام انتظر اشوفه بالحلم مرة ثانية
متت ضحك على تعليقها🤣 شكد ماكلها الجفاف العاطفي على كولت نواف
اكولكم صدك اذكرت ليش الكل عنده حساسية من رواية خيالية لييييش ولكم ليش 😭 راح تعوفوني وانه مانزل قصص حقيقية بعد لأن شاهين مايقبل يكول مانريد مشاكل اساور وانه اوافقه الرأي بسبب ذو الفقار مرمر كلبي والله وفكرة انو ارد على بطل قصة طيحت حظي ويه شاهين مايقبل واي ولد ارد عليه يصيح ويعصب
بس تدرون بيه انتم ردودي على كد المطلوب وبكل احترام والله ومارد على شباب خاص وحتى بالعام بس بحدود الادب
انه احب القصص الخيالية تدرون ليش لأن احسن بواقع الشخصية الاكتبها واشوف داخلها وخارجها مو تجيني قصة من شخص ماعرفه ولا عايشة وياه ولا اعرف شنو داخله والاكثرية يدعون المثالية تعرفون هالشي لذلك اغلب بطلات القصص مارتاحلهن مرات يجذبن بحقيقتهن بس مو الكل طبعاً
الخيال حلو تعرفين شنو جاي تكتبين ومتاكدة منه وبواقعيته بدون ماتشكين انو ممكن يكون كذب وتسفيط
ولا تنسون الخيال اغلب القصص الي تشوفوها مسلسلات وافلام وروايات وكتب عالميين كله خيال فليش هالنظرة عالخيال
احترم الي يحترم قصص الخيال وخيال الكاتب احترمه حيل تدرون ليش عدكم نظرة عالخيال من تقرون قصة وبالعنوان موجود كلمة حقيقية يرتاح كلبكم شما كتيت الكاتبة حتى لو مبالغة راح تكولون عادي هي حقيقية بس من تقرون العنوان خيالية تقرون القصة تحسوها غريبة ومبالغ بيها وتستهزئون بيها وتكولون اي ماكو هيج شي هاي خيال
احب اكول انتم غلطانين..الخيال صدك لمن الكاتب تبالغ بجمال الأبطال وشخصياتهم واموالهم الكثيرة والعنف المبالغ بي وغيرها من الاشياء الماتخلص
بس لمن تنقل واقع مجتمعك واقع حال وشي عادي من تصرفات ومن شكل ومايكون فد كائن فضائي بالقصة يعني هي خيال بس مو معناها نبالغ
ويبقه مجرد ذوق بس لا تتحسون من الخيال اكتشفو زوياه كلش حلوة
خل اسولفلكم سويت مقلب بزوجي وموقف يضحك ثاني
هو بالدوام ولده الكبار بالدوام والجهال همين دكيت عليه كتله شاهين انه تعبانة مدري شبيه كلبي ظل يدك سريع ومختنكه تعال بسرعة هو يعرف عندي حساسية من بعض انواع الادوية كال شماخذه ولج شمصخمة كتله ابرة مال فلاونزة جا غير اجه مثل الطيارة من بيتنه لدوامه ساعة ونص طريق سواه نص ساعة 😂 هنوب هو اجاني كلبه يدك كتله مابيه شي بس مشتاقتلك وكلت اشوفج
جا غير اشبعت مسبه وهو بحياته ما ساب ابوي كلي انعل ابوج لا ابو الجابوج خليتيني اجي مثل باتمان بسيارته
صراحة مقلب غبي وندمت عليه لو منجلط الرجال لو صاير بي شي بالطريق وهو يسوق سريع لذلك اول مرة وآخر مرة اسوي مقلب بي المقالب سخيفة وخطرة والله
ظل اسبوع شاهين مايحاجيني يكلي زغيرة انتي هاي سالفة اتسويها 🤭 صدك ندمت وصدك مقلب تافه وغبي
وموقف صارلي وياه بليلة الي نشرت الاسئلة الكم اول بارت بهالكتاب بالليل جان نايم بعد ماجنت ادردش وياكم رحت يمه شبكته دار وجهه عني صار الصبح كتله شاهين انته بيك شي شايل بكلبك شي عليه
كال ليش شصاير كتله هيج وهيج البارحة كال يابه والله نايم مادري بنفسي كتله والله تتعمد مو نايم ظل يضحك ويكول المعنى الحقيقي تجيك التهايم وانته نايم 😂
هسة فقرة اسئلة☕️🍩🍪
لو اسلمكم القلم واكلكم احجو عني شون توصفوني بلا مبالغة؟
شنو نوع فونكم بلا همبلة 😉؟
شنو تحبون من أكل وحلويات ومشروبات؟
هم مسوين مقلب بأحد ونكتلتو بسببه؟
آخر الليل شنو وجباتكم الخفيفة التاكلوها؟
شتسون وقت تجيكم كآبة؟
شطار بالدراسة لو كسالى؟
حركولي قصة قريتوها؟
اكثر قصة اثرت بيكم وحبيتوها؟
اكثر بطل حبيتو شخصيته؟او العكس كرهتو؟
اكثر بطلة حبيتوها او العكس كرهتوها؟
(انه اكثر بطلة قصة كرهتها من صدك قصة ملكية خيالية البطلة عساس قوية وشجاعة وماتجامل بس هي بالواقع متنمرة وقحة وقليلة ادب مو شجاعة ابد)
موقف بقصة استفزكم وخلاكم تشيطون نرفزة وغضب؟
اكثر قصة الي قريتوها ياهي سردها احلى؟
قصة عدتوها اكثر من مرة؟؟
شخصيتكم بأختصار؟
هم عدكم تصرفات مخابيل ؟
اخر واحد قطيتوه او قطاكم😂؟
شخص تكرهو بالحقيقة وزاعجكم؟
من الناس الي تنصح لو لا؟؟
هل غدركم صديق او شخص مقرب؟
تتخلون عن اهلكم لأجل شخص تحبوه؟
وبس خلصنه اسئلة 🙈 وقصتي انه وشاهين اكملها باجر الكم
