لحلاحة وسحارة🌸مكتملة🌸

🌸الجزء 24🌸

*لَحْلاَحَة وْ سَحَّارَة*
بقلم.......  *ندى العمر*  و  *أميمة الغزواني*

          الجزء 24

تعاشات العشية وگاع لي كان فشي بلاصة هادا رجوعو لدارو  و فاتيحة بحال گاع العيالات المزوجات شافت ساعتها عرفت هذا رجوع راجلهااا ... ناضت الكوزينة هي الاولى باش خدمتها تخدمهااا في راحتهااا ... حطت المقراج يطيب و جبدت ليقاما تاع اتاي ... هزات حبوبو و حطتهم في الگدم تاع صبااااطهااا ... و خلات تا الما طاب و حطات النعناع عاد زادت عليهم الحبوب و حطاتو يتشحر
فاتيحة ... ايوا اوليدي  عبد القادر الزنقة مافيها ثيقة و معرفتك بيمن تلاقيتي ولا شكون شفتي ... " يا الله غتهز صينيتها حتى دخلت ياسمين "
ياسمين ..." شافتهااا اش كدير و خلاتها حتى سالات عاد دخلات "  فاتيحة وجدتي كاس كروط اخويا عبد القادر راهم دخلوو و مشا لبيتكم ... ولكن اش كديري ثاني اصحبتي نعلي شيطانك
فاتيحة ... شيطان اختي هو الراجل راه ما فيهم ثييقة و قبل ميشويني نشووويه ونخليه لايح حوايجو ... جربيي و تعالي جاوبيني
ياسمين ...  " دارت ليها نفسي بصبعها " ... لا لا اختي انا هادشي خاطيني ومالو راجلي منور عليا حياتي نووض نكويه وراه قلت ليك مكيدوم غا المعقول  ... سيري اختي عطي راجلك ياكل تانا نوجد لرشيد مياكل جا عيان حبيبي مسكين. ..." حركت ليها راسها و تمت خارجة من الكوزينة مخلياهااا دير اش بغاااات و دخلات هي لبيتهااا لقاتو كيحيد في حوايجو "
عبد القادر ... حشيشت قلبي توحشتك اليوم
فاتيحة ..." مشات تعلقات فيه وتتلعب ليه في صدرو وهادشي غير باش تشمشم واش فيه شي ريحة تاعت العيالات " ... اجي تاكل شبع كرشك بعدااا
عبد القادر ... شفت الوليد و الوليدة مكينينش فين هووما
فاتيحة ... باك اليوم ترفع بالحشيش وراه داتو الفرمسيان تاخد دييه شي دوااا
كبات ليه لكويس مداتو ليه وكتسنى ايمتا يشربو ، فتيحة لغجات عبد القادر وعرفات كيف دارت ليه ولا مقادش يهز فيها راس واخا تضربو ،ولا يبغيها بسيف عليه وكلامها دارتو سريفة على عنقو فحين ياسمين عكسهااا عارفة كيفاش تلعبهااا قبل ميدخل رشيد لبيتو كانت هي  سكسفات على الحالة وقاداتها داكشي خفيف ظريف مهم متبانش ليه ناشفة وبحال گاع ليام تغيير واجب ولي يشوفو برا يلقاه فدار ، غير حل لباب تلاحت عليه بتعنيقة معرف باش تبلى وكملتها ب توحشتك كانت كفيلة تنسيه فتمارة لي دوز نعار كامل راجل بطبعو مكيبغيش لمرا النگارة لي سارطة كاسيطة لا باغي لمرا تكون زوينة وحادگة وداخلة سوق راسها وعاهرة ورقاصة وطباخة وغير الواعرة اللحلاحة ولي تقول اناا لي تعرف ليهم كاملين  ...
رجعات لبيتها هازا سطل فيه ما دافي وملحة غادا وتمايل عليه لقاتو حيد سباطو وبارك ينصل تقاشرو
حطات سطل حداها وهزات ليه رجليه خشاتهم ليه فيه  وبدات تمسد ليه تا نوضات عليه الراگد
ياسمين....هانا ازين ديالي درت ليك ما سخوون يحيد ليك لغيا بنما وجدت ليك كاسكروط
رشيد.....لهلا يخطيك عليا اعمارة داري ، نهار على نهارر كنحمد الله ونشكرو حيت مزوج بيك
ياسمين...."باستو في لهوا "....ربي يخليك اراجلي لعزيز ، يالله رتاح ليا انا راجعة
وجدات لي مياكل وذاتو ليه كلات معاه ووكلاتو وحتى من عقلو ذاتو وولات كتبان ليه غير هي لي كاينة فحياتو
من كاسكروط ندوزو للعشا غير هاد المرة كلشي كان مجموع على الطبلة ووسطهم مبارك لي عاقد راسو وينين حدها حركاتو ميلودة باش تعطيه لحيمة وهو ينوض قافز فوق سداري وكيغوتتت 
مبارك......وا زنزال زنزااااااال