قرية النساء🕌مكتملة🕌

🕌الجزء 22🕌

#سلوى_العلوي ✍️
🕌#قرية_النساء 🕌
البارت 22 👑
كانت شادة فيديها غطارات كاتحطهوم فالطبالي على ود الليلة قدرات أخيرا تدخل للقصر بمساعدة القاضي همها الوحيد أنها تدوي مع السلطان وتطلب مساعدتو ماعارفاش بللي البنت لي كاتقلب عليها كاينة قدامها وهي ماحاسساش تفكرات هدرتها مع القاضي وتنهدات بعمق عمرها تنسى خيرو دار معاها خير قبل عشرين سنة وهاهو دابا تاني كايعاونها
فلاش 🔙
يزة : شنو دابا مغاتعاونيش أسليمان
القاضي : ولات سليمان حرفية دابا 😏
يزة : هاني مشيت
يالله ناضت تمشي بحالها قالها
سليمان: حبسي أمرات خويا
يزة : (شافت فيه بحزن باقا حتال دابا كاتفكر راجلها كاتحزن عليه ما قدراتش تنساه وبسباب حبها ليه ماقبلاتش تزوج بخوه ) هانا شنو
سليمان: نتي عارفة معزتك عندي
يزة : عارفة عارفة أسليمان لو ماكنتش عزيزة عندك ماكنتيش تهربني نهار زواجنا وتمهدلي الطريق وتغامر بسمعتك على ودي أنا طول ما حييت غانبقى عاقلة على خيرك ونفديك بعمري الى طلبتيه
سليمان: ماتقوليش هاككا أنا مادرتش داكشي باش تبقاي عاقلة على الخير درتو على ود خويا وعلى ودك نتي حيت مراتو النهار اللول قلتلك عمرني نبزز عليك شي حاجة ودرت بهدرتي الراجل هو الكلمة ... شوفي دابا نسااي الماضي حنا ولاد اليوم أنا نقدر نعاونك دخلي للقصر لكن مانضمنليكش تدوي مع السلطان نتي وشطارتك
يزة: (بفرحة) آ آهه غيير ندخل للقصر وخلي الباقي عليا أنا
القاضي : فهاد الستيام مانقدرش حيت تا واحد ماكايخرج من القصر أو يدخلو بلا ما يتحققو من هويتو هانتي جلسي فدار مع مرتي معززة مكرمة فالليلة السابعة غايديرو وليمة ندخلك مع الطيابات والحمالة
يزة : الله يكتر خييرك أخويا
نهاية الفلاش 🔙
..............
عند بهاء وجد راسو هو وولد عمو وعوينو وتوجهو للقصر لي استقبلوهوم فيه أحسن استقبال دخل عند الحاكم عدنان لي رحب بيه وعانقو بحرارة كيما كان الحال راهوم عائلة وحدة واخا ريحة الشحمة فالشاقور .. أخيرا تجمعو حكام الممالك بتلاتة أحمد لي عيا يماطل ويلقى تخريجة يرجع بحالو ما خلاوهش يوطا لباب حتى يكمل السبعيام تجاذبو أطراف الحديث وتكلمو على امور السياسة والحدود الخ حتى طلبو منهوم يتفضلو لقاعة الاحتفال باش يبداو الأمسية ديالهوم
.............
دارت لمساتها الأخيرة وقلبها كايتراقص بالفرحة أخيرا غادا ترجع لبلادها وناسها .. أخيرا غادي تخوي هاد الرحبة لي خنقاتها عيات بالكذوب والنفاق .. عيات من سمية ياقوت ليي محاوطاها من كل جيه .. عيات من انها تبغي تنطق إسم صاحبتها وتصرط كلامها تفكر فالسمية الجديدة ديالها
توجهو لبنات للقاعة وجلسو بدات الحفلة توجهات بناظرها لجنابها بعفوية لمحات ريحان كارزة على إيدها والدموع ماليا عينها زعما تكون بسباب لي طرا ولا عندها مشكلة أخرى ؟ نترات هاد الأفكار من دماغها منين سمعات بلي نوبتها جات
بدات الموسيقى وهي مغمضة عينها بدات كاتغني والذكرايات ماليين دماغها كأن شريط فلم داز قدام عيونها تفكرات أول نظرة .. اول كلمة .. أول لمسة .. اول بسمة .. تفكرات كولشي أي حاجة دارت بيناتهوم كيفاش لا وهي كاتغني نفس الأغنية لي سمعها اول مرة كاتغنيها "آه يا سلطاني"
في الضفة الثانية مع اول كلمة وأول نغمة انتفض كأنه تكب عليه ماء بارد فعز نومو
بهاء الدين : هي 😳
بقى كايسمع الأغنية ومشى مع ذكراياتو حتى هو أخيرا وبعد عذاب لقاها ما فكرش كيفاش وعلاش او وقتاش الحاجة الوحيدة لي فكر فيها هو أنها "هي"
كملات أغنيتها وسمعات تصفيقات حارة عليها
كملات أغنيتها وفاق من سهوتو كيحاول يقلب عليها
كانو تحت سقف واحد فبيت واحد فوق أرض وحدة لكن ماقادرينش يشوفو بعضهم .. ماقاطع هاد اللحظات غير صوت السلطان عدنان ناض كيتكلم ويخطب على ضيوفو وبزاف دالناس على نار بغاو غي فوقاش تسالى الحفلة
بهاء بغاها بغى يشوفها بغى ياخدها ويمشيو
سيليا بغات تخرج بغات ترجع لديارها بغات تشوف حبابها
إيمان بغات تهرب بغات تخوي القبيلة حيت سمعات برجوع خوتها
أحمد بغى يرجع لقصرو بغى يلقى بنتي لي غابت بلا رجوع
ريحان بغات تتسالى الحفلة بغات تتوسد فراشها وتنعس ماتفيق حيت لي غايوقع غايحطمها
عدنان : ........ وعليه بغيت نختم كلامي بفرحة تانية بغيت قدامكوم ومعاكوم نشارك فرحتي أنا اليوم كانعلن زواجي
ريحان :😭
الحضور: 😳
إيمان:(كاتهدر فودن سيليا) شتيي السلكوط ما خلى حتى قنت صحيح
سيليا:  ناري مسكينة مرتو عليها كانت مقلقة من الصباح كاتبكي
إيمان : ماشغلناش حنايا يتزو....
قبل ماتكمل كلامها سمعات عدنان قال
عدنان :  بلالاة البنات ياقوت ........
فنظركم البنات آش غايوقع مور هاد لفضيحة ؟ واش غاتفك الجرة على خير ؟ ولا غتنوض الحرب بين البلدان؟ هادشي لي غانعرفوه فالاجزاء الجاية من قصة #قرية_النساء💃