اخر أميرات سومر

اميرته الضايعه

كعدت من الصبح على صوت امي تبجي جنت متوقعه انها تعاركت ويه جدتي بما انه احنه نسكن ببيت العائله الجبير ركضت وايدي على كلبي واحجي ويه روحي شوكت تخلص مشاكلجن اجيت وشفت الناس ملتمهبغرفة امي عمامي وزوجاتهم دفعتهم وانا كوة امشي بنصهم لاني جنت طفله عمري سبع سنوات ولما وصلت لكيت امي وجدتي متكابلات على ابوي ويبجن انهدم حيلي وانا طفله تيتمت ذبيت نفسي على ابوي وكتله بويه لا تروح فدوة لا تخلينا وحدنا بس ابوي ما سمعني ولا رجع الي ،،
انا عندي خمس اخوان واخت وحده انا ترتيبي بينهم قبل الأخيرة اسمي تغريد بس رغم صغر سني حاسه بالمسؤولية تجاه اخواني جنت اغطيهم من ينامون اسوي عشا للمتاخر الي مايعرف يقرأ اترجمله الفلم واسهر وياه وانا صغيره والي يريد يكتب لحبيبته رساله انا اكتبله رساله لان ماكو بوقتنا تلفونات بس الأرضي ومو كل الناس عدها انا شاطرة بكل امور الحياة وذكيه  حيل بس رغم قوتي من صغري الا انه فراق ابوي هد حيلي جان الوحيد الي احس بطفولتي وياه جان بس هو يحسسني اني بعدني صغيرة ،
راح ابوي وبعد وفاته بفترة جدتي طردتنا ورحنا لبيت جدتي الي هيه ام امي وهم ما استقبلتنا لان احنه هواي سبعه وهذاك الوقت حصار والناس عايشه عل حصه التموينيه صعبه يتكفلون بسبع أشخاص وامهم جدتي ام امي كلتلها بالخط العريض ،،ذبي جهالج على اهلهم تقصد على عمامي وتزوجي بعدج صغيره
بجت امي وراحت اخذتنا ودكت باب ابن عمها جان عنده بيت وقررت نكعد بيه وهذاك كن الطمع كال لأمي تكعدون بس بايجاره وامي قبلت وبقينا اخواني حازم ورضا اشتغلوا وهم اعمارهم بال ١٥ و ١٧ وبدينا حياة جديدة بعيدا عن كل الناس من سكنا بالبيت جنت وقت العصريه اكعد بالباب اباوع للناس رايحه وجايه وجان اكو شخص بالمنطقه يسمونه حسن المسودن يعني حسن المجنون يسكن ببيت وحده وجان دائما يلبس دشداشه سودة بس شكله مو مال مسودن يعني نظيف ومشيتها وتصرفاته عاديه بس هو دائما ساكت مايحجي ويه احد وبيته دائما ضلمه جان شاب تقريبا عمره ٣٠ سنه اخذله فترة يمر من يمي وما يباوع الي ابدا إلى أن مرة صاروا جهال المنطقه لاختي رغد تلعب وياهم فضربوها وانا ركضت عليهم جانوا اربع جهال ٣ بنات وولد حسن جان مار كالعاده وشافني لزمت اختي وخليتها وراي وكلتلهم :اذا تلمسون اختي بعد ياويلكم من عدي، وعيوني تطير شرار وضربت الولد راشدي فريت وجهه ، جنت مثل امهم مو اختهم لاخواني
حسن وكف وظل يباوع ولما التموا رادوا يضربوني صاح بيهم حسن :يله منا كلمن على بيته
جانت هاي اول مرة الي اسمع بيها صوت حسن جان خشن ورجولي ،
باوعت عليه وانا كاضه رغد من ايدها ومتجهه للبيت وصارت عيني بعينه لأول مرة اباوع بعين احد وهو هم مانزل عينه حسيت هالرجال بيه شيء غريب او يجوز انا ذكرته بشيء ظل يباوع عليه لمن دخلت للبيت يله راح ومن دخلت صحت برغد :إلى متى تضلين جبانه لا تخلين احد يضربج افتهمتي لو لا ،