اخر أميرات سومر

مفتاح اللغز

بديت ابحث وادقق بتفاصيل حسن واسئل عن ماضيه ورحت لمنطقتنا القديمه الي حالياً انا ساكنه قريبه منها وبديت انبش الماضي واسئل ومحد انطاني إجابه جانوا من يشكون بسؤالي عن حسن وماضيه اجاوبهم إني اريد اساعده واقدمله مساعده وكانوا يقتنعون بكلامي لأن الكل تقدمله مساعدات ويعتبرونه وحيد ومحد اله وعقله مو تمام فالناس جانت تعطف عليه
ولحد ما لكيت عجوز جان عدها دكان صغير كبال بيت حسن جنه نشتري منها واحنه صغار فكأن احد همس بأذني وكلي روحيلها. اسئليها عنه فقررت ما اطب بالموضوع كبل لازم انطيها شوية مقدمات حتى ما تشك بيه المهم اجيت اتمشى عليها ولكيتها بعدها نفس ماجنه متعودين تكعد بالدكان الصغير اجيت وكعدت يمها وجان الوقت غروب فسلمت عليها وعرفتها بنفسي وابتسمت بوجهي وهيه تسئلني عن امي واخواني وعن جهالي ووين صفت بيه الدنيا فحجيت الها عن احوالي وكامت تدعيلي بالخير وتجاذبنا أطراف الحديث لحد ما طبيت بصلب الموضوع وسئلتها مسويه روحي ما اعرف حسن موجود بالمنطقه او لا
كلتلها: والله ياخاله ام داوود الدنيا تغيرت وغيرتها انا اشتاقيت للمنطقه ولطفولتنا ولكل بيت بالمنطقه
ضحكت هيه وردت عليه:الناس الطيبه ما تنسي يا ام عبدالله
بلوعت بنظرة خاطفه على بيت حسن ورجعت نضرتي الها وسئلتها :حسن خطيه بعده هنا محد اجى أخذه هسه اكيد هو شايب
ردت عليه :اي بعده هنا بس بعده هذاك حسن ماتغير هو نفسه
ابتسمت وكملت كلامها :صدك ياخاله لو كالوا للي كلبه فارغ مايشيب وحسن كلب طفل وعقله نص عقل ولهسه نفس شكله ماتغير
صفنت وكلت بكلبي :لا ياخاله انا ابدا ما اصدك  بهالشيء حسن وراه سالفه
وبعدني ما علقت على كلامها  طلع حسن من العدم وكاللها :خاله انطيني جكاير
ضحكت ام داوود وكالت : الخير عند ذكره
وراحت تجيب جكاير لحسن صفن بوجهي حسن وكال بهدوء :شلونج تغريد
رديت عليه بتوتر:الحمدلله زينه
اول مرة حسن يسلم على احد او يحجي ويه احد الا اذا راد يشتري شيء او ياخذ شيء من احد جان اكثر شخص صامت عرفته بحياتي
يباوع عليه وعيوني بيهن الف سؤال وعيونه مانزلهن عليه ابدا نضراته كلهن شباب وشجاعة لدرجة انا ما اتحمل ابقى اباوع عليه
نزلت عيني وكتله:شلون الدنيا وياك
ابتسم بهدوء وكال :هسه انتي الي اعرفج من تردين تسئلين عن احد روحي اسئليه هو لا تسئلين الناس عنه
توترت وحسين كأنما قرأ أفكاري او جان واكف يسمعني وانا احجي ويه ام داوود
قررت اجادله وارد عليه :يجوز الي نسئل عنه مايحب ينسئل
ابتسم ونزل راسه وكال بصوت كله حزن : الا انتي ياتغريد تمونين على كل شيء
قطعت انبهاري بنبرة صوته وهدوئه وكلامه الي الف شخص عاقل ما ينطقه جية ام داوود
اخذ حسن الجكاير ودار راح للبيت وطب وسد الباب انا ودعت ام داوود ودرت وجهي راجعه للبيت ببالي مية سؤال محتاجات الف اجابه لان السؤال الواحد يحتاج اكثر من اجابه 
وصلت للبيت كملت شغلي وعشيت جهالي ورحت انام
وبيت النايمه والكاعده حسيت كل جسمي انشل وبقيت اشوف الحايط ينفتح واشوف أقل ما اوصفها جنه مد أحدهم ايده الي وكومني واخذني وياه وحبيت هاي الجنه شلالات وحيوانات وفراشات وورد الوان حلوه وزاهيه تمتد بمساحات واسعه ابتسمت وكعدت اشتم بالورد سمعت صوت من وراي يكلي ريحتج احلى من كل هالورد التفتت شفت شخص وراي ملامحه مو واضحه كلش بس جان وسيم وملابسه حلوه بس كلما احاول افك طلاسم ملامحه ما اكدر وكأنه يتعمد يشوش عقلي او هو اساسا يتحكم بلي انا اشوفه سحرتني المناظر الحلوه وخلصت وقتي اباوع واتأمل الطبيعه وسئلته اكدر اخذ هاي الورده كال اي تكدرين تأخذين اي ورده تعجبج باوعت للورد وكطعت ورده بنفسجيه وعلكتها بشعري شويه ودرت عيني وشفت فراشات ملونه كتله حرامات ماعندي حديقه جان اخذت الفراشات وياي
سمعت صوت ضحكه خفيفه وكال بصوت رزن :الفراشات من تاخذينها يتغير لونها للبني ماتظل هيج الوانها زاهيه
ما علقت على كلامه وحسيت بيه فلسفه وانا نا اريد اضيع وقتي بالحجي بقيت اتأمل الطبيعه سئلني هو:شعجب ما كلتي جوعانه مو من طبيعتج
رديت عليه وانا اباوع للنار الي يتلالئ بسبب ضوء الشمس :لو عندك اكل ليش لا
همس بكلام ماجنت اسمعه وكأنه يحجي ويه روحه
شويه وفزيت من نومي وابتسمت لأني جنت احلم احلام حلوه والي صدمني اني شفت بشعري ورده بنفسجيه ما كدرت اسيطر على روحي من الخوف
شلون اجت الورده هنا ونفس الي شفتها بالحلم يعني انا الي اشوفه مو احلام يعني هاي حقيقه طيب اذا حقيقه شلون من انام اروح شلون ومنو الي اشوفه هذا وليش يتكرر هذا الشخص بأحلامي ما ادري بالحقيقه تشوش راسي وبديت اتعب من التفكير شمعنى هسه راد هذا الشخص أحس بوجوده بحياتي شمعنى بهذا التوقيت تعبت من التفكير وقررت اطلع اتمشى شويه وهم رجعت تفكيري زايد مو ناقص وقررت ابحث عن هالشي بلكي الكالي خيط يوصلني للي انا بيه انا حقيقه او هو خيال