اخر أميرات سومر

التفاتت محارب

رغد راحت لأمي تبجي وانا رحت اعبي الماي من البير الي ببيتنه جان مهمه صعبه بالنسبه لبنيه بعمري بس انا احب اعاند روحي واسحب المي من البير اجهزه لاخواني حتى من يرجعون من الشغل يكون جاهز يغسلون بيه جنت اشيل مسؤلية كل شيء وانا صغيره،،
نلتم دائما بالحوش (المساحه الي تصير كدام البيت )نتعشى ونكعد نتسامر ونباوع على التلفزيون الي تطلعه امي بالحوش مرات نشوف فلم السهرة ومرات ننام وجنه ننام بالسطح انا دائما اصفن قبل لا انام افكر بكل شيء وشنو راح يصير لو كبرنا وهل راح تتحسن احوالنا لو لا جنت بعقل جبير جيلنا يختلف عن هالايام بعد فترة كامت تجيني كوابيس هواي مرات اشوف ناس ما اعرفهم ومرات اكعد الهث عبالك جنت اركض وانا نايمه استمرت هالكوابيس وياي  لحد ما كبرت ما حجيت لأمي او اي احد الي يصير وياي كمت من اطلع كا اشوف حسن لا يجي ولا يروح ولأن محد اله محد افتقده او يجوز موجود وانا ما كمت اشوفه لاني كبرت وبطلت ما صرت اطلع بالباب  ،
كبرت وصرت شابه وصار عمري ١٧ سنه صرت حليوة شعري بني وبشرتي خمريه عيوني بنيات كبار جنت ضعيفه وطويله وبدت معاناتي الفعليه اخواني صاروا يشوفوني حمل عليهم وكل شويه واحد جاي لأمي يمه زوجيني ومن امي تكله منيلي فلوس ازوجك يباوعلي ويكول هاي تغريد ننطيها وناخذ بيها مرة كصه بكصه يعني قصده ينطوني لأي رجال ويأخذون منهم مرة بمكاني يعني وحدة بمكان وحده ،،
فلسفه قديمه بس جانت تمشي بقوة وانا اباوعلهم وعيوني تمطر دموع ومن اكللهم انا مو سلعه للبيع يعصبون ويطردوني ومرات حتى يضربوني جنت أروح يم البير بحجه اطلع ماي واغسل وجهي وابجي حتى محد يحس بيه جاي ابجي ويحسوني ضعيفه وكفت اطلع الماي واغسل بوجهي حت. اختلطت قطرات الماي ويه دموعي فجئه وانا امسح وجهي فلت مني دلو المي وبسرعه مديت ايدي كضيته بس السرعه الي نزل بيها وهو متروس مي سحبني حيل وياه وردت فعلا اطيح ببطن البير لولا ايد سحبتني حيل وشمرتني بصف البير كمت وباوعت مالكيت احد يمي بقيت صافنه احاول الكى تفسير للي صار وياي وما لكيت تفسير ،
طبيت جوة البيت اركض ورحت نمت من وكت وبدون عشا من كد ما انهضمت من معاملة امي واخواني الي وانا جنت مثل امهم رغم صغر سني حسيت روحي سلعه وحان وقت بيعي بجيت وبجيت لحد ما نمت وحلمت اني كاعده على نهر واجئ شخص كعد يمي وكال :لا تبجين لا تضعفين كل شيء بوقته يصير
رديت عليه :شلون ما ابجي واهلي يردون يبيعوني انا ما كلت ما اتزوج بس مو بهالطريقة
ابتسم وباوع بعيوني وكال :انتي بالذات مايصير تنباعين انتي بس اتمني وهو يصير لا تخافين انا وياج
سكتت وضليت اباوع للنهر بدون ما التفت عليه لمن كعدت ،
بقى هالشخص يجيني بنومي وصرت اشتاقله واروح بسرعه انام بس اكمل شغلي حتى اشوفه

ومرات يجافيني النوم واضل اقرأ قرآن لمن انعس وانام
وظل يجيني بالحلم وشنو اتمنى يصيرلي من أبسط شيء لآخر شيء واي مكان اشوف صورته او اشوفه بالتلفزيون بس انام اروحله زرت هواي مناطق القدس وعمان ورحت المغرب والسودان ضلت الصور والاماكن مطبوعه بذاكرتي وكبرت وتزوجت بشخص زواج عادي مثل ما جنت اريد وانقطعت أحلامي اتذكر اخر شيء كاله الي انتي راح تتزوجين مثل ما تردين بس يبقى. هالشخص سر ورا تصرفاته مو شرط يكونلج زين طول العمر او ربما. يصير كل العمر زين ،،
ذب الكلمات وراح وبعدها ما شفته من وقت زواجي وعيشتي ببيت زوجي ويه إخوانه المتزوجين الاربعه وجهالهم جنن نسكن ببيت جبير بس ما يهمني انا احب العائله الجبيره وما اهتميت بالشغل بالبيت لاني متعوده عل شغل حملت بأول طفل الي ومر الحمل بأفضل مايمكن وجبت اول طفل الي وسماه زوجي عبد الله
علاقتي بزوجي الي اسمه فاضل عاديه جدا واجبات وحقوق وهو زين وياي وانا هم مداريته لحد ما حملت بابني الثاني وبدت المشاكل بينه تدخلات نسوان وعرايك جهال ونسوان تتدخل جنت احاول ابقى بعيده بحكم انا ابني عمرة سنتين بس هم المشاكل ما تعوفني جانت عمتي ام زوجي بيها طبع كلش مو حلو اذا وحده غلطت من نسوان أولادها ما تحجيلهم فلانه غلطانه لا هاي تلمهم وتحجيلهم نسوانكم هيج سون بعد هنا كلمن يجي على مرته ويتعارك وياها هالطبع سببلنا هواي مشاكل الكل تتحاسب المذنبه والبريئه تعبت نفسيتي حيل ومرات هواي انعزل بغرفتي وابجي جان زوجي منتسب وجنت اتمنى يبقى بدوامه وما يرجع بسبب هالمشكلة
وبليله من الليالي نمت وانا تعبانه واجاني بالحلم يبتسم وكلي ،،،،،،،،،،