البداية 🎬
الجزء : 1
👑 ألف ليلة و ليلة 👑
بقلمي: نونة ✍🏻
واقفة قبالت الپلاكار ديالها، كاتشوف فقطعة الصوف الأحمر المعلقة قبالتها و تنهد، هاديك القطعة الشتوية الوحيدة اللي عندها باش تلبسها فهاد الطقس البارد اللي حل عليهم مع قدوم فصل الشتاء
جرات القطعة و العبوس باين فملامح وجهها الناعمة .. كيف لا تكون ناعمة و هي عندها بشرة مثل بشرة الأطفال، بيضا و رطبة .. وارثة ملامحها من جذور عائلتها الإنجليزية الأصل .. جداتها فالأصل من على برا و لكن كانت مستقرة فالمغرب مع راجلها .. واخا مكانتش شابهة لماماها اللي ملامحها كانو شابهين لجدها بالعوينات القهويين و الشعر الكيرلي و البشرة السمراء .. على عكس ماماها هي كانت ببشرة بيضاء فحال الحليب و عوينات زرقين فحال زرقة السماء و شعر أشقر طبيعي و رطب بلا ماتحتاج تصبغو و تجبد فيه
جلسات قبالت المراية اللي كانت فحجرتها الصغيرة و تمتمات بخفوت و تذمر
"هانتي عاوتاني غاتخرجي تا هاد العام بهاد المونطو الحمر .. اووووف ياربي علاش انا ماعندي فلوس تا باش نكسي راسي (خنزرات فداك المونطو و شافت فصورة معلقة فالحيط قبالتها) لا كنتو غا خديتوني معاكم مللي متو و لا هاد الحياة هادي! تا طريف دالخبز كانشد فلوسو بالزز بقاليا غير نلبس حوايج زوينين فحالي فحال قراناتي!"
ناضت من بلاصتها و العصبية باينة عليها، لبسات داك المونطو الأحمر و شدات القب ديالو غطات بيه راسها .. عقدات سيورو تحت عنقها و هبطات عويناتها للسروال الجينز اللي لابساه، كان مقطع و لكن ماشي التقاطع ديال الموضة!
مقطع بسباب كثرة اللبيس فالصيف و الشتا هادي ثلث سنين و هي كاتلبسو غير هو و واحد آخر كاتبدل بيهم .. تأفأفات خارجة من حجرتها الصغيرة و اللي كانت عبارة عن بيت فالسطح كارياه فمنطقة شعبية محشرة و لكن ماعندها مادير!
ميزانيتها هادشي اللي تقدر عليه بيها. . هبطات فالدروج الضيقين تا وصلات للباب دالزنقة .. قادات شعرها تحت القب باش مايفزگش و خرجات بعدما زدحات وراها داك الباب المصدي
غير خرجات للزنقة عيون الجيران تربصوها، خصوصا البرگاگات دالحومة، كيفاش مايحضيوهاش و هي الزوينة دالدرب بدوك الملامح اللي عندها فحال شي گاورية ، و عاد ساكنة بوحدها و مللي كاتخرج فهاد الساعة مكاترجع تا لنص الليل .. هادشي كايخلي الهضرة تتناقل عليها و لكن هي كاتنخلهم بليزيكوتور اللي كاديرهم فوذنيها، كاتحني الراس و تمشي بحالها
دازت من جنب كليكة ديال الشمكارة دالدرب، غير شافوها بداو كايطلعو و ينزلو فيها كيما عادتهم .. دارت راسها مامسوقالهمش، حتى وصلات جنب واحد فيهم و هي تسمعو نطق بصوت عااالي
"مولات المونطو الحمر توحشناا نشوفوك باللبسة دالشتااا"
بعدما قال كلامه، تسمعو ضحكات صاخبة من الدراري اللي معاه و لكن هي دارت راسها ماسمعاتوش، كملات طريقها بملامح جاحدة و كاتسبو فخاطرها و هي غادة
أنت تقرأ
ألف ليلة و ليلة
Fantasyيحكى أنها بين عشية و ضحاها وجدت نفسها مثل شهرزاد، تحكي قصتها للذئب كي لا يلتهمها الليلة على العشاء! و في حكاية أخرى تمنت تلك المغرورة أمنية لا تعقل، ستتحقق بفعل القلم السحري! هي ليلى و هو الذيب و هادي حكاية ليلى للذيب 👑 ألف ليلة و ليلة 👑 بقلمي :...
