أسرار نجلاء

الجزء الأول : الدصارة اللي جيب الخسارة

كي العادة دخلت لبيتها كارهة قررت تفتح الميكرو تكتب شويا ، مبعد بدلت رايها فتحت التيليفون كاشما تشوف فيه ،دخلت لتطبيقها المفضل ، هو تطبيق شات بين الأجانب معمول أساسا لتعلم اللغات ، ما فيه حتى شي يصلح بصح يفيدها في انو تبقى تقرا اللغة الإنجليزية فيه على الأقل من البوستات ، صابت بزاف مسجات جدد كلهم من ولاد 🤦🏻‍♀️ ( حلابين الله غالب ، حتى و كانو أجانب ) لفت نظرها ميساج واحد من بينهم كلهم ، بصح بطريقة سيئة ،ميساج وقح وقاحة مموهة " واش يا أميرة ما تنزليش شويا من برجك وتختلطي مع البشر ما تخافيش ما نعضوش " كان مكتوب بالإنجليزي
ترددت ترد و لا ما تردش ..عادة تجاهل مسجات هكا بصح أحيانا كي تكون مقلقة تحب ترد عليهم تحطهم عند حدهم و تبلوكيهم
قبل ما تقولو اي حاجة دخلت تشوف بروفيلو، ماشي حابة طيح في واحد منحرف و لا مريض نفسيا و يلصق فيها. كي دخلت لبروفايلو زادت تنشعت لقاتو حاط بزاف حاجات فيهم قلة إحترام للمرأة ( على الأقل من وجهة نظرها، هي عندها كل حاجة فيها تغزل بالمرأة تعني قلة احترام )  و زيد ملفوق خرج دزيري ،هنا اللي قررت جاوبو و تسمعو هدرة على الطريقة اللي هدر بيها معاها
......
اااه نسيت ما عرفتكمش على بطلتنا
نجلا 25 سنة قارية إعلام و صحافة لكن ما لقاتش خدمة نجلاء جاية بيضا و حلوة بزاف عندها ضحكة تقتل و عينيها كبار و عسليين ، فيهم لمعة تخلي الراجل اللي يشوفها يعجب بيها بصح هي ما تعجب بحتى رجل الله اعلم علاش ،  هكا جاية تكره الرجال و ما توثقش فيهم . شعرها بني و حرير يوصل لنهاية ظهرها  ، فيها 165 سم طول و توزن 60كيلو رشيقة و تحب الرياضة بزاف و تحب الاكل ثاني ( علابالي، تناقض 🤷) أصلا اكبر ميزة عندها هي انها متناقضة و متقلبة :في نفس الوقت ذكية بزاف و طيبة اكثر من اللازم  ،  شخصيتها قوية لكن مترددة في اتخاذ القرارات المصيرية  ، خجولة و ماشي اجتماعية لكن ثرثارة مع الأشخاص المقربين.

نولو لحكاياتنا،. بدات تكتب باش جاوبو " نهار لي تفتخر بجنسيتك ارواح أهدر معايا "
هو كان داير علم امريكا في بروفايلو بصح هي شكت انو دزيري من الوقت .
حطت التيليفون و نسات الحكاية قاعدة تتفرج حتى قراات ميساج خلى دمها يغلي " ما يهمش دزيري و لا أمريكي المهم انك تحمستي كي صبتي الميساج تاعي و خممتي الف مرة واش تقوليلي باش تخلي انطباع اول مليح و تخليني انتيريسي بيك ، نعرفكم نتوما النسا ما كاش حاجة تفرحكم اكثر من انو يكون كاين راجل معحب و لا مهتم بيكم  "
قبل ما جاوب ، زاد بعث
" برافو عليك ، نجحتي 🎩"
نجلا : " هاذي آخر مرة تزيد تبعثلي و راك غالط اذا حاسبني نعبر واحد كيما نتا البنات كامل سيا زهرو معاهم ، نشفق على اي طفلة تسكن قريب ليك و نشفق حتى على القطات اللي في داركم باين حتى هوما ما سلكوش منك و من طريقتك المبتذلة في المغازلة ، المهم عندك أي حاجة تكون أنثى تلصق فيها  "
هنا هو تبسم في غرور ، بدات تقرب منو ، بهاذ السرعة قدر يعرف معلومة شخصية عليها ، و بلا ما يطلب .. تحب القطط  😼
هو ، لاحظ انو طريقتو ستفزتها و قرر يزيد : " ههه بديتي تغيري من ظكا من قطاتي ؟ ما تخميش ما عنديش قطة ، نتي راح تكوني قطاتي إذا حبيتي 😉"  
نجلا هنا تصدمت ، حياتها كامل عمرها لا راجل هدر معاها هكا . لا في الواقع و لا في المواقع ، دايما تخلي حدود بينها و بين الرجال. حتى انو كي كانت تقرا كانو يقولو عليها المعقدة لأنو جامي تحكي مع ولاد .
تقلقت من الحكاية و بدات تهدر معاه بطريقة ماشي مليحة ، الظاهر انو خلاط و تع بنات و هي ما أمنت تصيب واحد هكا يطيح بين يدها باش تهينو .
بقات تهدر معاه يامات و هو يحاول يغازل فيها بكل فرصة و هي ترد عليه بكل إهانة محترمة تعرفها ، لحد ما وحد النهار بعثلها فوتو ، هي مباشرة خمت فالأسوء ..قالت هذا منحرف و ما يحشمش و باينة بعثلي حاجة عيانة ما نفتحهاش
نجلا: وقيل راك حاسبني جايحة نفتح فوتو بعثهالي واحد منحرف كيما نتا
هو : تقولي عليا منحرف بصح عارفتني ماشي منحرف و إلا ما تهدريش معايا. انا برك نحب أجمل حاجة خلقها ربي فوق الكون و نحب نحسس المرأة بقيمتها ، و مستحيل نبعثلك حاجا عيانة ، حتى و نحبك تشوفي حاجة من اللي في بالك  راح يكون كلش برضاك. مالا غير افتحيها و ما تخافيش ، راهي تعبير مني عن اعتذاري إذا غلطت معاك بالهدرة "
خمت شويا و قتلها الفضول من جهة تعرف واش فيها و من جهة تعرف اذا راهو يكذب بيها و هي في قرارة نفسها متأكدة انو حقير و راح يبعثلها حاجة عيانة مالا فتحتها غير باش تأكد ظنونها...
وهي شافت واش فيها رمات تيليفونها بعيد تجري من واش شافت ..