نزلت لكيت زوجه اخو ابراهيم كاعده ضلينه نسولف و بدت تعرفني و تحجي على شخصيات كل واحد منهم كالت عن ابراهيم انه هادئ بس يصير عصبي اذا الشيء يتعلق بأمه يحب أمه و هواي ، و همه يحب السمج و يحب الچاي و المشروبات الحاره كلها يحبها و حتى البارده چنت استمع و فجأة سألتني سؤال
" انتِ تحبين ؟"
" شهالسؤال الغريب " ضحكت مستغربه
" لا يعني صدك، يعني يجرح أكثر اذا انتِ تحبين شخص و تزوجتي إجبار "
" مَ حبيت بِعمري، كله اعجاب "
" لج ها حركات اعجاب و هيج تعاي راويني الي معجبه بيهم "
ضحكت و كلت "كلهم هسه متزوجين و نصهم صاير عندهم كرش "
ضلينا نضحك و نتعرف على بعض اعترفت و كالت ان حبها الوحيد هوه زوجها ، هيه جانت حامل بِشهر 6 ،
دخلت ام ابراهيم و كالت الي " بنتي انبهتت روحي ، عادي تسوين الي عصير برتقال سريع قبل لا تجي الخطار، هاي عجوزيه " أشرت على ام يوسف مرت اخو بايش ضحكت و كلت الها " من عيوني يمه "
فجأة و اني اسوي عصير بدت تسولف الي على ام بايش و چنت بس استمع و اضحك و تارة اجاوب جواب بسيط ، صاحها زوجها و راحت اله بديت ادندن بِأغنيه، دخل ابراهيم المطبخ و اجاني شافني اسوي عصير ما انتبهت اله الا لما كال
" شتسوين "
" عصير "
" اي ادري عصير، المن "
" الى امك ، رادته كالت انبهتت روحي "
ابتسم هوه و كال " تريكتي؟"
" لا، "
" سوي لنا ريوك " باوع بِخبث استغربت، وقربت وجهي منه " شهالنظرات "
" لا بس هيج ،نريد نضوك أكلك ، "
" اصلاً اكلي ماكو احسن منه، الطماطه لو أسويها محروكه تطلع طيبه "
ضحك هوه ،. و گال " نشوف "
" اي طبعًا نشوف "
دخلت امه بِوسط النقاش و ضحكت" اي يا يمه قاطعنا عصافير الحب، "
خجلت و ابراهيم ضحك " لا يمه انتِ ما تقاطعين مرحب بيج دوم "
ضحكت امه و تقربت مني ، انطيتها العصير و شربت منه ، همست بِأذن ابراهيم شيء سمعته
" يا يمه مرتك النادره، شلون عصير يرد الروح"
طلعت و هوه سحبني، " شكد خجوله "
" انطم "
" شكد تكولين انطم، راح انطم وداعتج "
" تمام "
بديت اتحرك بِالمطبخ ، علمتني ام يوسف على كل الأماكن ، اسوي أكل هوه تارة يباوع تارة يگلب بِتليفونه
كملت، حسيت واه ، وين الصمون ، دورت بِعيني ما لكيته
هوه باوع سألني" كملتي؟ "
گلت " ايي ، بس وين الصمون "
گال " هذا منتچي عليه "
