خيال قريب من الواقع

البارت الاول

رحت بكل مكان وسيفك گبالي
أروح لوين اله اشلع جذر گلبي بشراينه
واجمع نار وأحرگ كلشي من بالي

من تاخذ منك الدنيا شي غالي وانته ما بيدك شي غير بس تتخيل ايامك بدونه وشنو الي راح تعيشه من يكون هذا الشخص سندك بس انته خسرته وحياتك تدمرت بدونه بس ما بليد حيله

قصتنه تبدي من الريف وبطل القصه حيدر

حيدر : من بعد ما خسرت ابوي وبقيت اني وامي ومرت ابوي  واخواتي صار لازم اعتمد على نفسي واشتغل حتى اكعد اعيشهن من جهه دراستي ومن جهه هاي المسؤوليه الي طاحت عليه اني طالب سادس وهاي اخر مرحله دراسيه الي وبيهه يتحدد مصيري جنت مخلي بالي ادخل جامعه بس هسه تغير كلشي لان امكانيتنه ما تساعد

من بعد ما جمعت أفكاري رحت للبيت حتى ابدي اشتغل الشغل الي تركه الي ابوي وهوه صياد سمج
اخذت الغراض الي احتاجهن ورحت لشط وبديت اشتغل
وأثناء ما جنت اني بنص الشط صاحني استاذي الي يدرسنه بالمدرسه

الاستاذ : حيييدرر تعال بويه شويه

حيدر : صار استاذ

الاستاذ : ليش ما اجيت للمدرسه مو بصالحك الغيابات وانته طالب متفوق حرامات تضيع مستقبل هيج

حيدر : استاذ اني قررت اخلص السادس شلون ما جان وبعدين ابطل لان ما عندي الإمكانية ادخل جامعه

الاستاذ : لا ما مقبوله منك حدوري اخر شي جنت اتوقعه انك تترك الدراسه اعتبرني ابوك وانه وياك خطوه بخطوه واساعدك بكلشي انته بقيت المعيل لأهلك وهاي الشهاده هيه الي راح تحل بيهه كل المشاكل الي ممكن تواجهك بحياتك وتكدر بهاي الشهاده تأمن مستقبل اهلك لا تخلي هاي الظروف تكسر صير انته أقوى من هاي الظروف وتخطاها

حيدر : صار استاذ

الاستاذ : باجر اريد اشوفك بالمدرسه

حيدر : إن شاء الله

كلام الاستاذ انطاني دافع انو اكمل واحصل أعلى معدل حتى أكدر اعيش اهلي كمت اذا عندي دوام الصبح اطلع العصر للشغل وباليل اقره واذا ظهري اطلع الصبح لشغل وباليل جان وقت دراستي وابقى سهران لحد ما اكمل كلشي تعبت على دراستي كلش وما قصرت وي اهلي لحد ما اجت وقت الامتحانات وجانت أصعب فتره امر بيهه لان الوزاري جانت أصعب مرحله لان تعب نفسي مو طبيعي قلقه وتفكير لان هاي تحديد المصير بعد من عدهه وابدي حياة جديد ومرحلة دراسيه جديد تختلف عن كل المراحل

كملت الامتحانات وجانت احلى شعور من تخلص امتحانات وما عندك شي تهم بي بعد غير النتائج من بعد ما خلصت امتحانات رجعت الشغلي ولتفتت لاهلي جانت الناس كلهه تساعدني لان ابوي جان معروف ويحبوني على محبته وما جانو يسموني غير ابن الشيخ

ابن الشيخ الي بعمر ٢٠سنه شايل مسؤوليه عائله كامل وقرر يحقق حلم ابو ويكمل طريقه

طلعت النتائج وجان معدلي ٩٨ ما جنت متوقعه هذا المعدل الصراحه جنت متوقع اقل بس الحمدلله
جانت فرحتي بالمعدل ناقصه ابوي الي تعب وياي حتى وصلني لهاي المرحله ما جان موجود تمنيته وياي يشاركني هاي الفرحه تمنيت اشوفه شلون فخور بي تمنيته يمشي وياي حتى اسجل بالكليه الي أريده بس الحمدالله على كل حال