Against All Odds ✓

Kabanata 7

Kabanata 7

NAPAILING na lang ang manager ni Sabrina nang dahil sa ipinaalam niya rito. Halos dalawang linggo rin niyang pinag-isipan ang tungkol sa bagay na 'yon at kanina nga ay nakapagdesisyon na siyang itapon ang lahat ng nakaimbak niyang pills. Wala na kasi siyang balak na inumin pa ang mga 'yon.

"Sigurado ka na ba talaga sa desisyon mo? Sabrina, you're still young and on the peak of your career. Kapag nagbuntis ka ay puwedeng mawala ang kinang mo," bulong nito sa kanya kahit silang dalawa lang naman ang nasa loob ng dressing room.

Malalim siyang napabuntonghininga. "Sigurado na ako. Titigil na ako sa pag-inom ng pills. Kung mabuntis man ako agad ay ayos na sa 'kin. Sa oras naman na mawala ang kinang ko kapag nangyari 'yon ay alam kong magagawa ko pa rin na maibalik 'yon balang araw," paniniguro niya rito.

Natampal naman ng manager niya ang noo nito. "Sa totoo lang ay tutol ako sa ginawa mong pagpapakasal agad noon. Pero wala kang narinig mula sa 'kin. After all, your life, your choice. Kahit kasal ka na ay pilit pa rin kitang hinanapan ng mga magiging proyekto mo." Inabot nito ang dalawa niyang kamay at mahinang pinisil 'yon.

"Pero ibang usapan na kapag nagbuntis ka. Maraming oportunidad ang dumadating sa ngayon at alam kong patuloy na darating para sa 'yo. Pero mawawala ang lahat ng 'yon sa oras na magbuntis ka. Naiintindihan mo ba 'yon?"

Bumitiw siya mula sa pagkakahawak nito at masuyo itong niyakap sa tagiliran. "I know. And I'm really thankful and grateful on you for that. Dahil talagang ginagawan mo ng paraan para lang magkaroon ako ng proyekto. Dumating pa nga sa punto na mayroon ng nag-aalok sa 'kin na gumanap sa isang teleserye." Napahiwalay siya rito at mariin itong tinitigan.

"But right now, I want to fulfill my duty as a wife to my husband," paliwanag niya rito.

Nalukot naman ang mukha nito. "Sabrina, hindi lang sa pagkakaroon ng anak masusukat ang pagiging asawa mo kay Tyler. Tandaan mo 'yan." Nagkibit balikat ito. "But still, it's all up to you. No matter what your decision is, I'll respect that."

Napangiti na siya. "Thank you."

Tumayo na ang manager niya at kunwari na nagpunas ng mga mata nito kahit wala namang luha.

"Tara na nga at magsisimula na ang photoshoot. Mamaya magkaiyakan pa tayo rito, eh," malandi nitong wika bago nauna ng lumabas.

Pinasadahan muna niya ng tingin ang sarili sa harap ng salamin bago sumunod rito. Tahimik niyang hinihiling na sana ay mapatawad na siya ng asawa sa oras na banggitin niya rito ang tungkol sa naging desisyon niya.

HAPON na ng matapos ang photoshoot ni Sabrina ng araw na 'yon para sa isang kilala na catalog. Nagyaya ang manager niya na kumain sila sa labas kasama ang ibang staff pero tinanggihan niya ito. Excited na kasi siyang umuwi sa mansyon.

Akmang sasakay na siya sa kanyang kotse nang may mahagip siyang pamilyar na sasakyan na nakaparada sa hindi kalayuan.

Pinaningkit niya ang kanyang mga mata upang matitigan itong mabuti. Ngunit tinambol ng kaba ang kanyang dibdib nang mapagtanto na kotse ito ni Tyler. Nakumpirma naman ang hinala niya nang bumukas ang pinto sa likod nito at lumabas mula roon ang asawa.

Natulos siya sa kinatatayuan at nabitin sa hawakan ng pinto ang kanyang kamay. Samot saring emosyon ang nararamdaman niya ngayon habang seryoso itong naglalakad palapit sa kanya.

What is he doing here?

Napaayos siya ng tayo at hinamig niya ang sarili nang tuluyan na itong tumigil sa harap niya.

"Anong ginagawa mo rito? Hindi ba dapat ay nasa opisina ka pa?" Bumaba ang tingin niya sa suot na relo. Alas-tres pa lang ng hapon.

Sa totoo lang ay kaninang umaga niya sana ito gustong kausapin. Kaya lang tulog pa ang asawa noong umalis siya.