روايــة #صغار_العم
الحَــلْــقــة الــرابــعــة 🌸
يوسف فتح المرش : بتركبي ولا لا ؟؟
هناء ركبت و يوسف ضحك
هناء : احيانا الظروف تحكم
يوسف : عادي ماتدوري شي ... و طلع بالسيارة
هناء فتحت مراية الشمسية تشوف ف مكياجها
يوسف شبحلها : شن اديري
هناء : نشوف ف روحي
يوسف : ترا اشبحيلي
هناء شبحتله
يوسف يشوفلها : شن قتلك عليه المكياج ؟
هناء تكنطت : تبيني ننزل و ناخد تاكسي ؟
يوسف سكت و شبح قدامه
هناء : غر ماما قعدت على خاطر المرا اللي جاية كان هذا هي رفعتني ؛ و بنحاول نروح بكري حتى انى
يوسف يقول ف عقله .. ( كان لحقتي عليها مانبداش يوسف )
هناء : و بابا ديوتي اليوم مازال ماروحش و هداكا اصيل طالع من الصبح ماريتاش اليوم
يوسف : خيرك درتي قصة هاني رافعك ؛ قولي شكرًا حتى بالكذب
هناء : شكرًا حتى بالكذب
يوسف شبحلها
هناء ضحكت : انبصر انبصر
يوسف : عفوا
هناء سكرت الشمسية و قعدت تشوف ف السيارة : ماشاء الله حلوة
يوسف : عيونك الحلوات
هناء تلخبطت : محركها و كمبيوها تمام ؟
يوسف : ايه ملاح
هناء سكتت
يوسف : تبي تجربيها ؟
هناء ضحكت : كانش و حني مروحين
يوسف درس السيارة
هناء : خيرك وقفت ؟
يوسف : هي جربيها
هناء : خليها و حني مروحين
يوسف : بري بيها توا لان حتى القناة مانعرفش مكانها
هناء : به
كيف بتنزل ...
يوسف : ماتنزليش ؛ نقزي من هني
هناء استغربت : كيف ؟
يوسف : اني ننزل و انتي نقزي من مكانك
هناء : علاش ؟!!
يوسف : ماتشوفيش ف زحمة القهوى مقابلاتك ؟؟
هناء شبحت للقهوى : اه اليوم مباراة قوية قالو
يوسف : عيونك هني
هناء شبحتله
يوسف نزل و سكر الباب
هناء ضحكت : خيره هذا !! ... حطت شنطتها ع الكرسي اللي من تالي و نقزت ف مكانه
يوسف ركب ف مكان هناء : هي
هناء : بسم الله .. وطلعت بالسيارة
يوسف : قيمي الكرسي شوية
هناء تسوق : لالا تمام هكي
يوسف : ها مشت معاك ؟
هناء : ماشاء الله ثابتة سواقتها ؛ شكلي اني بنشريها منك
يوسف ضحك
هناء : نبو الزردة عاد
يوسف : بعدين تو تاخديها
هناء : خليها غدوا اليوم مافيهاش كيف
يوسف : اه جايينك خطابة اليوم
هناء ضحكت
يوسف : بتوافقي عليهم اوه
هناء : غر يجو و نشوفهم و بعدين ساهل
يوسف : اه يعني لو عجبوك بتوافقي
هناء : ايه عادي
يوسف سكت يقول ف عقله ( و الله ماصايرة )
هناء ساكتة ؛ تقول ف عقلها ( زعما ف شن يفكر ؟؟ والله جو ف وقتهم الخطابة ع الأقل نعرف مشاعره تجاهي شني )
يوسف : انتي علاش مانخطبتيش من قبل ؟ سمعت ان ديما يجوك خطاب
هناء : نراجي في فارس أحلامي يجيني على الحصان الأبيض
يوسف ضحك
هناء : بالك جاي اليوم
يوسف : ماظنيتش
هناء : علاش ماظنيتش ؟
يوسف : خليك لاهية ف الطريق
هناء زادت ف السرعة : هي نديرو تسطريبة ؟
يوسف شبحلها : بالله عليك !
هناء ضحكت
____________________________
محمد ف حوش عمه اسماعيل يقري ف سنابل في مادة الرياضيات و سنابل سارحة
محمد علّا صوته : معااي !!
سنابل شبحتله : ايه معاك
محمد حط القلم ع الكراسة : اشريحلي شن كنت نقول
سنابل تشوف للكراسة و ساكتة
محمد عقد حواجبه : لمني كنت نخرف من بكري
سنابل تبي تتكلم و مترددة
محمد : بنعاود اخر مرة و ركزي معاي راهو لينا ساعتين مقعمزين
سنابل : محمد !
محمد سكت
سنابل تشوف جهة المطبخ : في موضوع نبي نحكيهولك
محمد استغرب : موضوع شني
سنابل : مانقدرش ندوي توا
محمد : شن فيه ؟
سنابل : ماما تو تسمعني ، انت انزل و اني نلحقك و نقولك
محمد فنص فيها : شن مدايرة من فالطة ؟
سنابل : والله ما اني الله
محمد : تي ادوي الزفت شن فيه
سنابل تليفونها شرين داراته سايلنت
محمد جبده منها : هاتيه هني
سنابل تجبد فيه منه : هاااااات
محمد قام ايده فوق : مفيش
سنابل تعافر فيه بتاخده : هاته يا محمد
محمد هز راسه بإستفزاز بمعنى لا
سنابل وقفت و تلحق ف ايده
محمد ضحك : تي اعقلي
سنابل شدت التليفون و تجبد فيه : مصحك عاد
محمد شاده بالقوة : تي ياسري بلا هبال
سنابل واقفة قريبة منه و تعافر فيه
محمد جبدها بالتليفون ليه و قربها لوجهه : بتبطلي ولا لا
سنابل تحشمت وجهها انحمر و وخرت
جت سلسبيل : خيركم تتعاركو
محمد حط التليفون ع الطاولة و وقف : اختك ادير ف حراكات مش قدها
سلسبيل ضحكت : كيف 😂
سنابل ساكتة
محمد طلع و سكر الباب وراه
سنابل شبحت لأختها
سلسبيل : شن درتيله
سنابل تلخبطت : كنت بنحكيله على بوه غيرت الموضوع ف اخر لحظة
سلسبيل : حقا أبرار حصلت ال400 و باعتهم 💃
____________________________
