أسميتها مريم

مُشهد

-طلعت لفلفت الطفل الدنيا بارده تكص كص لفيت الشيله وحطيت العبايه على راسي ضليت امشي عسى ولعل ما شوف سيطره الدنيا حصار وهو شارد من عدهم تعديت من يم المقبره مشيت مترات طويله شفت الدنيا امان رجعت اني وبالرجعه شفت سيطره لزمت كلبي

-ها حجيه كواج الله

-هلا يمه

-وين طالعه بهل ليل وتدرين بالدنيا شلونها

-رجلي ضاربني واريد اروح لبيت اهلي

-افا رجلج ضربج ليش تحبين تشتكين عليه

-لا لا هذا بيت اهلي هسه اروح

-صاح ضابط مناك حجيه تعاي صعدي هسه اخلي واحد من الولد يوصلوج

-لا يمه هسه اروح ماعولت انهي الكلام وياهم مشيت سريع اريد اوصل الجلاب تنبح ورايه تلكاني جلب بالطريق اسود وفاتح حلكه خفت على ابني

-ياعلي ياحاضر الشدات وينج يا ام البنين ياسبع الكنطره ضليت اردد لمن شفته ابتعد سرعت للبيت الهوى عالي وسعفه تضرب سعفه وصلت دفعت الباب وطبيت

-هادي لتطلع

-موجودين

- حطيت ابراهيم على الكرويته وكعدت احس حيلي وكع جاوبته اي اكعد اجه عمي مناك

-ها فخريه

-عمي الامن واكفين ميكدر يطلع

-اي خوش اكعد وانتِ كومي سويلنه اكل

-رمقته بنضره كلها تعب من عنده اي عمي صار

-دخلت للمطبخ اسوي الاكل حضرته وكعدنه انفتح نقاش على السياسه حطيت ابني بحضني وكعدت اكل

-كومي سويلنه چاي

-اي عمي بس ابراهيم اغسله

-شمرت الخاشوكه وكمت وتجادلين

-طفرت ذيج الطفره عمي ما مجادله بس كتلك اغسله بعدني ما مكمله اجتني لطمه على حلكي طلع دم كل هذا ومهدي كاعد باوعتله ولا كأنُ ابو جاي يضرب مرته حصلت دفر وضرب وتلمخ

-مهدي اله متى كتلي

-صوتج يمعوده روحي لعبت منكم ومن البيت