دارت الدنيا لتدق طبول قلبي

البارت السادس والأربعون 46

فهد...

وانك حين ارتحلت سرقت تعاويذ عمري ..

فصار مباحاً 

وصار مشاعاً 

واني بعت الليالي

وفي كل يوم يدور المزاد 

ضيغم

ابيع الحنين

ابيع السنين 

وارجع وحدي

وبعض رمادي

ملاك..

جنت اكلك دير بالك على كلبي روحه بيك..

وجنت اذا اتأذه من انسان اجيك

هسه من عندك اذيتي ياهو الأشكيله عليك !!!

هجان 

يلتمن عليه مشتتات البال وانفضهن نفض وانهض ولا جني..

نرمان

إيّاك أن تُعاتب من هُنت عليه، فلا عِتاب لمن استباح أذيّتك...

_________

ملاك يا ملاك وين بالج اليوم اويلي عليه من وحدة لوحدة استغفر الله ربي واتوب اليه.

كرار : ها خير شو اليوم مخبوصة ..

التفتت علية باوعتله ودرت وجهي كلت..

ملاك : صباح الخير شو من وكت كاعد؟

كرار : صباح النور كعدت حتى اوصلج غير..

ملاك : ما يحتاج اني اروح مثل كل يوم..

كرار : عليمن تروحين تكسيات انه متفرغ واخذج ومن يخلص دوامج اتصلي اجيج..

التفتت عليه باوعلته منتجي على اطار الباب ومكتف ايديه شعره مهوس مثل ضيغم وعيونه نعسانه ، كلش يشبه ضيغم بالملامح بس الفرق عيونه لونهم اسود وكبار ...

ملاك : شو طولت هنا ؟ الأعرفة عندك دوام ببغداد وملتزم بيه..

كرار : اخذت اجازة سألتي قبل وكلتلج عندي شغل هنا..

ملاك : هاا شغل اي كلتلي..

مبين عليه اسايرة بالكلام وما مصدكه يعني حس بية هيج فكرت كال.

كرار : احسج ما مصدكة.

ملاك : لا ليش ما اصدك اكو اهم من الشغل البيدك بس لا تاخذ اجازات هواي خاف يخلص رصيدك..

كرار : عوفج مني على شنو تدورين ؟

ملاك: موبايلي ماكو البارحة عفته هنا وهسه اجيت ما لكيته..

طلعه من جيبه وكال ..

كرار : هذا موبايلج.

باوعت عكدت حاجبي وتقربت منه اخذته منه وخزرته..

ملاك : شجابه يمك ؟

كرار : ادلم جان يمي ويلعب بيه كلت اكيد مالتج خليته على القنفه ومن حسيت عليج تدورين على شي عرفت الموبايل وجبته الج...