عوده هيما 2
جريت هدى وسما على المستشفى والخوف مالي وشهم وقلبهم وهما ساحبين جدتهم في ايدهم ودا اللي مقلل حركتهم شوية بحكم سن جدتهم وضعف حركتها بعد الاتصال الل جالهم ان هيما ف المستشفى
واول ما وصلوا ع الاوضة اللي فيها هيما جم يدخلوا الممرضة قالت
_ممنوع ممنوع الدخول
هدى _ممنوع ايه ده اخونا اللي جوه واحنا عايزين ندخل نطمن عليه الممرضه
_ الدكتور هيخرج دلوقتي ويطمنكم مسكت الحاجه فريده ايد البنات وقعدوا قدام باب الاوضه وحاطين ايديهم على قلبهم ومنتظرين خروج الدكتور وبعد شوية خرج الدكتور
فقاموا وقفوا بسرعة
سما _خير ياكتور ارجوك طمنا فيه ايه
الدكتور_ للاسف الحاله متبهدله خالص جسمه متكسر من كل حته و عنده نزيف بسيط ع المخ
وعلى حسب كلام الناس اللي جابته ان تقريبا كده في بلطجيه طلعوا عليه هما اللي عملوا فيه كده
بلعت الحاجه فريده ريقها وقالت _طمني عليه يا ابني المهم هيعيش؟ الدكتور _ان شاء الله يا حاجة زي ما قلت لك كسور في كل جسمه والنزيف بسيط وبنحاول نوقفه انما مش خطر ع حياته
اتنهدت براحة _طيب الحمد لله ... هيما حفيدي قدها وقدود وياما شاف من صغره وهيتحمل الكسور والضرب دا ....اهم حاجة ان حياته مش في خطر الحمد لله الحمد لله يارب انك حفظتهولي
ابتسم الدكتور للست الطيبة الصابرة دي وقال
_تقدروا تتفضلوا تدخلوا ليه بس محتاجين حد يدفع حساب المستشفى من فضلكم
هدى وسما بصوا لبعض بتوتر لأنهم بالكاد معاهم تمن المواصلات لانهم على قد حالهم وهيما اللي بيصرف عليهم
سما قالت _هنعمل ايه يا هدى
هدى_ ندخل نطمن على هيما الأول وانا هرجع البيت اجيب القرشين اللي محواشهم ادفعهم للمستشفى
سما
_ماشي يارب متكونش التكاليف كتير
هدى _سيبها لله
دخلوا البنات واطمنوا على اخوهم اللي كان نايم مش حاسس بالدنيا
وطت عليه جدته وباست راسه
_طول عمرك حمال قسية يا ابني ربنا يكون في عونك ويشفيك ويعافيك
هدى وسما
مسكوا ايديه
هدى ببكا _ سلامتك يا أبيه الف سلامة عليك
سما وهي كمان بتعيط _يا حبيبي الف بعد الشر عنك تقوملنا بالسلامة يارب
لفت الحجة فريدة بوشها بتدور عينيها على سلسبيل لانها مفكره ان هي مع هيما لكنها ملقتش حد
فقالت_ غريبة فين سلسبيل ؟؟
هدى وسما
_صحيح سلسبيل فين معقولة تكون اتأذت هي كمان
سما _لا انا متأكدة ان ابيه هيما دافع عنها وحماها بكل قوته
الحجة فريدة خرجت دورت ع الممرضة
_من فضلك يا بنتي فين البنت اللي جت معاه هي في اوضة كام وطمنيني هي عاملة ايه؟
الممرضة_ بنت مين ما فيش حد جه معاها اللي جابوه جابوه لوحده بس
_ازاي ده دي مراته كانت معاه كانوا خارجين مع بعض
_لا زي ما بقولك محدش جه معاه هو كان لوحده لما الناس لقته مرمي في الشارع وغرقان في دمه
